Lubanga Jehovah mito ni watite kit gin mo keken ma keliwa par. (Jabuli 55:22) Pe tye peko mo madit nyo matidi tutwal ma pe watwero lega pire. Ka pire tek botwa, ci pire bene tek bot Jehovah. Tye kit meno pien Jehovah paro piwa ki kit ma wawinyo kwede. Lega bote obedo yo acel ma pire tek ma twero konyowa me bedo ki wic ma opye mot.—Jo Pilipi 4:6, 7.

Ka watye ka lweny ki pekowa me two wic, watwero winyo ni watye kenwa. Watwero winyo calo jo mukene pe giniang maber peko ma watye ka lweny kwede. (Carolok 14:10) Ento ka watito bot Lubanga kit ma wawinyo kwede kikome, en biniang pekowa dok bitero ite ka winyo legawa. Jehovah nenowa, en ngeyo aremwa kacel ki pekkiwa, dok mito ni waleg bote i kom gin mo keken ma keliwa par.—2 Tekwaro 6:29, 30.

Lega bot Jehovah jingo genwa i kome ni en paro piwa. Watwero winyo calo laco jabuli ma olego ni: “Dong ityeko neno can ma omaka, dok ityeko winyo koko me can ma odiya.” (Jabuli 31:7) Ngeyo ni Jehovah neno peko ma watye ka lweny kwede twero konyowa matek me medde ki kanyo pekowa. Ento en pe neno pekowa keken ci dong otum. En niang peko ma watye ka kato ki iye dok konyowa me nongo cuko cwiny kacel ki kwecwiny i Baibul.