Tika watwero bedo labongo akalakala mo ni jami ducu ma Lubanga ocikke pire bicobbe kakare? Yecu onongo pe ki akalakala mo, dok pwonye ojingo niye pa jo ma winye. Nen kong lapor ma en omiyo i Pwonye me wi Got-ti, kit ma kicoyo kwede i Matayo 5:18: “Ada awaco botwu ni, nio wang ma polo ki lobo bitum woko, latin ton mo acel, kadi ki nukuta mo acel me cik pe birwenyo, nio ka lok ducu ocobbe kakare.”

Nukuta matidi loyo i leb Ibru aye י (yod), dok bene tye nukuta mukwongo ma kitiyo kwede me coyo nying Lubanga, Jehovah. * Medo i kom nyig lok ki nukuta mogo me Cik pa Lubanga, lupwony cik kacel ki Luparicayo onongo gineno “nukuta” ducu ki acel acel ni pire tek adada.

Yecu onongo tye ka wacci bibedo yot loyo pi polo ki lobo me tum woko ma ka gengo cobbe pa lok matidi loyo ma kiciko. Kadi bed kumeno Ginacoya nyuto ni pe kibibalo polo ki lobo matwal. (Jabuli 78:69) Pi meno lok ma Yecu owaco ni nyuto ni lok ducu ma kiciko pire wang ma gucobo kakare.

Lubanga tika keto cwinye i lok ducu kadi wa matidine? Ki lok ada, en keto cwinye. Tam kong i kom lok man: Kiwaco bot Luicrael ni pe gutur cogo pa lee ma gibicamo i kwer me Kato. (Nia 12:46) Man onongo cik ma nen calo lam adada. Tika guniang pingo onongo myero pe gitur cogo mo keken? Twero bedo ni pe. Lubanga Jehovah onongo ngeyo ni cik man nyuto gin ma obitimme anyim ni, pe kibituro cogo mo keken ki i kom Meciya i kare ma gibigure i kom yat.​—Jabuli 34:20; Jon 19:31-33, 36.

Lok pa Yecu-ni pwonyowa gin ango? Wan bene watwero bedo labongo akalakala mo ni cikke ma Jehovah ocikke pire ducu wang ma ocobbe kakare, kadi wa tonne. Wanongo cuko cwiny madit adada ki i nukuta matidi loyo me leb Ibru.