Nong Pwony Ki I Lok Pa Lubanga

Ker pa Lubanga Obedo Gin Ango?

Pwony man nyamo lapeny mogo ma gwok nyo ibedo ka tamogi dok nyutti ka ma itwero kwano iye lagamgi ki i baibul-li. Lucaden pa Jehovah cwinygi bibedo yom me nyamo lagam magi kwedi.

1. Ker pa Lubanga obedo gin ango?

Ker pa Lubanga obedo gamente ma tye i polo. Bileyo ka wang gamente mukene-ni dok bimiyo kitiyo mitti pa Lubanga i polo kacel ki lobo. Pi meno, Ker pa Lubanga bicobo mitiwa pi gamente maber.​—Kwan Daniel 2:44; Matayo 6:9, 10.

Ker myero obed ki kabaka. Jehovah ocimo Wode, Yecu, me bedo Kabaka me Kerre.​—Kwan Luka 1:30-33.

2. Pingo Yecu aye Laloc maber loyo?

Wod pa Lubanga aye Kabaka maber loyo pien en lakica, cung pi gin matir dok tye ki teko ma twero tic kwede me konyo dano. (Matayo 11:28-30) Inge cero Yecu, en odok i polo ka dong obedo piny i nget Jehovah tung acuc kun kuro ni kimine loc. (Jo Ibru 10:12, 13) I agikkine, Lubanga omine twero me loc ki i polo.​—Kwan Daniel 7:13, 14.

3. Angagi ma gibiloc kacel ki Yecu?

Gurup pa lwak ma kilwongogi ni “jo maleng” aye Lubanga oyerogi me loc kacel ki Yecu i polo. (Daniel 7:27) Jo maleng ma gin lugen ma kiyerogi mukwongo aye lukwena pa Yecu. Jehovah pud tye ka medde ki yero co ki mon ma gin lugen ma gitye jo maleng wa i kare-ni. Calo Yecu, kicerogi ki kom me cwiny.​—Kwan Jon 14:1-3; 1 Jo Korint 15:42-45.

Dano adi ma gicito i polo? Yecu olwongogi ni “romi manok.” (Luka 12:32) Welgi ducu tye 144,000, dok gin bene biloyo lobo kacel ki Yecu.​—Kwan Niyabo 5:9, 10; 14:1.

  4. Ker pa Lubanga ocako loc awene?

Yecu odoko Kabaka i 1914. * Inge kare manok, en obolo Catan kacel ki lumalaikane piny i lobo. (Niyabo 12:7-10, 12) Cakke i kare meno, can ma dano gitye ka denone omedde adada. Lweny, oyengyeng, kec, two gemo, ki turo cik gitye but lanyut ma cimo ni watye ka kwo i kare me agikki. (2 Temceo 3:1-5) Jo ducu ma gimito nongo adwogi maber ma Ker pa Lubanga bikelone myero gupwony kit me bedo lulub kor Kabaka, Yecu.​—Kwan Luka 21:7, 10, 11, 31, 34, 35.

5. Gin ango ma Ker pa Lubanga cobo?

Ma lubbe ki kwena ma kitye ka titone i lobo ducu-ni, Ker pa Lubanga dong tye ka konyo dano milion mapol i twok lobo lung wek gupwony yo pa Lubanga. (Matayo 24:14) Ker-ri bigwoko “lwak dano mapol ata” ma gin lugen bot Yecu i kare me tyeko yub maraco me lobo-ni.​—Kwan Niyabo 7:9, 10, 13-17.

I kare me mwaka 1,000, Ker-ri motmot biloko lobo lung doko paradic. I agikkine, Yecu bidwoko Ker i cing Wonne. (1 Jo Korint 15:24-26) Tika ingeyo ngat mo ma itwero tite lok i kom Ker pa Lubanga?​—Kwan Jabuli 37:10, 11, 29.

Pi ngec mukene, nen dul me 8 ki 9 i buk me Baibul Mono Ada Pwonyo Gin Ango? ma Lucaden pa Jehovah aye gucoyo.

[Lok ma tye piny]