Nyikke Cok Bot Lubanga

“Ai Rwot [Jehovah], . . . Ingeya Woko!”

“PE TYE peko mo madit ma ngat mo twero bedo kwede makato ngeyo ni pe tye ngat mo ma paro pire nyo ma niang en maber.” * Tika gin ma kit meno otimme i komi kare mo? Tika i kare mo iwinyo ni pe tye ngat mo ma paro piri nyo ma niang peko ma itye iye? Ka iwinyo kumeno, itwero nongo kwe cwiny i ngeyo ni: Jehovah paro pi jo ma giwore dok keto tamme i kom jami ducu ma timme i kwogi me nino ducu. Lok ma Daudi ocoyo i Jabuli 139 miyo wangeyo ni lok man tye ada.

Kit ma Daudi onongo ngeyo ni Lubanga tye ki miti i kome-ni, en owacci: “Ai Rwot [Jehovah], in dong ingiyo kwona ci ingeya woko!” (tyeng 1) Daudi otiyo ki lok mo mamwonya ma kelo cal i wiwa. Nyig lok me leb Ibru ma kigonyo ni “ingiyo” kitwero tic kwede me yenyo nyonyo ma kigolo ki i te ngom (Yubu 28:3), roto lobo (Lungolkop 18:2), nyo yenyo maber te lok mutimme (Nwoyo Cik 13:14). Ada, Jehovah ngeyowa maber atika calo iwacci tye ka ngiyo jami ducu ma timme i komwa. I tic ki lok ni “an” Daudi onongo tye ka pwonyowa ni Lubanga tye ki miti i kom luticce ducu. En ngiyogi dok ngeyogi ki acel acel.

Daudi oloko matut i kom kit ma Lubanga ngiyo kwede dano kun wacci: “kadi abedo piny nyo kadi aa malo, in ingeyo; iniang tamma woko ki ka mabor.” (Tyeng 2) Jehovah tye “ka mabor,” bedo i polo. Ento, en ngeyo bedowa piny, nyo gwok i nino ma nongo watiyo tutwal, ki ka waco odiko kun watimo ticwa me nino ducu. Jehovah ngeyo tamwa, mitiwa, ki gin ma tye i cwinywa. Tika Daudi obedo ki lworo pien Jehovah ngiyo en tutwal? Pe, en onongo mito kit meno. (Tyeng 23, 24) Pingo?

Daudi onongo ngeyo ni Jehovah tye ki cwiny maber i ngiyo jo ma giwore adada. Daudi oloko i kom cwiny man kun coyo ni: “Ingiyo [ipimo] yona ki ka butona piny, dok ingeyo [ingii ki nyo inaa ki] kit yo me kwona ducu.” (Tyeng 3) Jehovah neno ‘kwowa ducu’ nino ki nino​—jami maber ki maraco ma watimo. En mono keto wange i kom gin maraco nyo maber? Nyig lok me Ibru ma kigonyo ni ‘pimo’ twero bene gonye ni ‘kiyo’ nyo ‘pyeto’ kit macalo lapur pyeto kwede jami maraco ka tye ka yero nyig kodi ma pe mitte ki ma mitte. Lok ni “ngi nyo naa kwede” i leb Ibru twero bene gonye ni “marone.” Ka en tye ka ngiyo jami ma jo ma wore giloko dok gitimo nino ducu, Jehovah keto tamme i kom mabecone. Pingo? En pwoyo kit ma giyelle kwede me yomo cwinye.

Jabuli 139 pwonyowa ni Jehovah paro adada pi jo ducu ma giwore. En ngiyogi dok neno kit ma gikwo kwede nino ducu. En ngeyo pekogi, dok niang par ki arem me cwinygi ma bino macalo adwogi me pekki mapol ma giwok ki iye. Tika cwinyi teri me woro Lubanga ma lamar ma kit man? Ka cwinyi teri, ci itwero bedo labongo akalakala ni: Jehovah “wiye pe biwil i kom tic ma yam wutiyo, kadi ki mar ma wunyuto pire.”​—Jo Ibru 6:10.

[Lok ma tye piny]