Baibul wacci: “Ka jo maraco aye loyo, lwak cur marac.”​—Carolok 29:2.

Ka ineno i tekwaro pa dano, inongo ni gamente mogo gubedo ka loyo dano i yo me aconya kun giweko gideno can. Ento, man pe tye ada pi luloc ducu. Jo mogo gidonyo i loc ki cwiny me konyo dano. Ento, tekke dong gitye i loc, ginongo pulangi cako balle pien jo mukene gicako laro tela. Nyo gicako nywaro twero ma gitye kwede pi nongo lonyo madit kun weko jo mukene gideno can. Henry Kissinger, ma kong otiyo macalo Karan Madit me lobo Amerika owaco ni, “Tekwarowa opong ki tute ma pe onyako nyige ki bene gen ma pe ocobbe.

Baibul bene wacci “Pe tye ngat mo ma tye ki twero me loyo kwone.” (Jeremia 10:23) Dano ma gitye ki roc pe gitye ki ryeko muromo dok pe gingeyo kit me gwokke kengi maber ki i gin ma bitimme anyim. Ka dano pe gitwero loyo kwogi kengi, ci gitwero telo dano mukene me lobo moni nining? Tika dong itwero neno ni dano pe ki kero me jwayo deno can ducu? Ki lok ada, gamente marac, nyo loc aconya, aye tye ka kelo deno can!

Yecu owacci: “Pi man dano ducu bingeyo ni wun lupwonnyena, ka mer tye i kinwu.”​—Jon 13:35.

Lutela dini me kanica mapat gipwonyo dano me bedo ki mar kun ginote i kingi. Ento, lok ada tye ni gin pe gupwonyo romigi me bedo ki mar matek wek ojwa cwiny me apokapoka. Ma ka konyo dano wek gubed ki mar, dini goba pol kare poko dano, miyo gitamo macek, dok bene kelo lweny i kin dano kacel ki lobbe. Hans Küng, ma okwano lok me dini i yo matut odolo te lokke i bukke me Christianity and the World Religions (Lukricitayo ki dok Dini me Lobo) kun waco ni “Dini aye ocako dok ocuko cwiny dano me donyo i kukukuku ma pud dong raco loyo ma lubbe ki lok me wibye.”

 Medo i kom meno, lutela dini mapol gicwako atyer ka maleng buto i kin jo ma pe gunyomme, tim abor ki dong tim pa co nyo mon ma gibuto ki luwotgi. Man oweko two onya, okelo tim me oyo ic, yaco ma pe opore, oketo nyom kacel ki odi, ma okelo arem ki dong turcwiny.

“Dano acel acel gire mitine kene aye ma bite, ywaye, kun omo cwinye. Miti ka oyac ci nywalo bal.”​—Yakobo 1:14, 15.

Pien wan ducu kinywalowa ki roc, man weko kare ki kare watimo bal dok bene myero walweny ki cwiny me ‘cobo miti me komwa.’ (Jo Epeco 2:3) Tek tutwal me kwero miti marac ka watye i atematema. Ka waweko miti maraco bwoyowa, ci adwogine twero bedo marac.

Lacoc mo ma nyinge P. D. Mehta ocoyo ni: “Pol pa pekki ma wadeno-ni bino macalo adwogi me bedo ki miti matek tutwal pi gin moni marac, yenyo yomcwiny cawa ducu, timo gin moni i yo mukato kare woko, cwiny me woro ki apokapoka.” Bedo opii pa jami calo kongo, yadi calo jayigi-gu, tuko me goyo cente, tim me buto ki dong mukene obalo “dano mapol ma kiworogi,” dok man omiyo lupacogi, luremgi, ki jo mukene gideno can. Pien watye ki roc, omyero waye lok man ma kicoyo i Baibul-li: “Wangeyo ni ocakke con wa i kareni, jami ducu ma onongo giketogi, gitye ka cur acura dok gitye ki arem.”​—Jo Roma 8:22, Baibul pa Katoli.

Baibul waco ni Catan aye “lubanga me lobo man” dok lumalaika maraco ma kilwongogi ni cen guribbe kacel kwede.​—2 Jo Korint 4:4; Niyabo 12:9.

Calo Catan, cen magi gitye ka tic ki mit kom me doro ki dok rwenyo dano. Lakwena Paulo oye lok man i kare ma en owacci: “Wan pe walwenyo i kom dano ma tye ki kom ki remo, ento walwenyo ki luloc ki wegi twero ma woko, ki i kom gin ducu ma loyo wi lobo ducu i kare man me colpiny, dok ki dul mony mogo maraco me cwiny ma tye i polo.”​—Jo Epeco 6:12.

Kadi bed cen magi cwinygi yom ka giyelo dano, ento man pe gin ma pire tek loyo botgi. Gin ma pire tek botgi aye me mayo dano ki bot Lubanga Jehovah, Ngat ma Mamalo Twal. (Jabuli 83:18) Tim mogo calo ngiyo lakalatwe, timo tango, tic ki lwit, ki dong ngiyo i cing dano nyo yero war gitye i kin jami mogo ma cen gitiyo kwedgi me bwolo ki dong doro kwo pa dano. Man aye gin mumiyo Jehovah poyo wiwa i kom jami magi maraco-ni dok gwoko jo ducu ma gikwero Catan kacel ki cen magi.​—Yakobo 4:7.

Mwaki alip aryo mukato angec, Baibul otito ni: “Omyero iniang man ni, i kare me agikki, piny bibedo marac.”

Baibul tito gin mumiyo piny bibedo marac, kun wacci: “Dano bibedo ka maro komgi kengi kun gibedo lumar lim, luwakke, lucac, . . . pe gibimaro dano wadgi, gibibedo jo ma pe timo kica bot dano, gibibedo lucok dog jo mukene, gibibedo jo ma mitgi pe jukke, jo ma ger ma gidag gin mo maber, luroro, jo ma tye atata ma pe giparo piny, jo ma gikette malo kengi ki wakke, jo ma maro yomcwiny ma ka maro Lubanga.” Ada, tyen lok ma pire tek mumiyo wadeno can mapol i kareni aye ni watye ka kwo i “kare me agikki.”​—2 Temceo 3:1-4.

Jami ma dong watyeko nenogi-ni guweko wangeyo maber adada gin mumiyo dano pe gitwero jwayo deno can kadi bed gitye ki miti me konyo dano. Ci dong, waromo nongo kony kikwene? Omyero wayeny ki bot Lacwecwa, ma ocikke me “turo tic pa Catan [Larac-ci]” kacel ki jo ma lubbe. (1 Jon 3:8) Pwony ma lubo man binyamo gin ma Lubanga bitimone me jwayo gin mumiyo dano gideno can mapol.