Ku. Ka iporo ginacoya me kare-ni ki macon, ci ibinongo ni Baibul pe olokke kadi bed kibedo ka kopone tyen mapol kun kitiyo ki jami coc ma pe rii.

 Kinongo kopi me Ginacoya macon gin alip mapol ata. Kibedo ka nongo apokapoka mogo i Ginacoya magi, man nyuto ni jami mogo pe kikobo kit ma onongo tye kwede con. Apokapoka magi gitino ma pe loko kit ma kitwero niang kwede ginacoya meno. Kadi bed kumeno, kinongo apokapoka mogo madongo, ma nyuto ni jo mukene ma gukobo Baibul i kare macon onongo gimito loko kwena me Baibul akaka. Nen kong labol aryo magi:

1.   I Baibul mogo macon, kicoyo i 1 Jon 5:7 ni “i polo, Won, Lok, ki Tipo Maleng: dok gin adek-ki ducu gitye acel.” Ento kopi me Ginacoya ma gigenne moko ni lok man onongo pe i kopi me Baibul mukwongo. Man dong nyuto ni kimedo lok man ameda lacen a ma oweko Baibul ma gigenne i kare-ni gukwanyo lok meno woko.

2.   Kadi bed nying Lubanga onongo tye i Baibul macon tyen alip mapol ata, lugony Baibul mapol guleya ka wange ki nying me dog ticce calo “Rwot” nyo “Lubanga.”

 I kare-ni dong kinongo ginacoya macon mapol adada, ma weko yot kato kare mo keken me neno ka ma peko tye iye. b Gin ango ma kimoko i kom Baibul me kare-ni i kare ma kiporo lok ma nonge i Baibul mapatpat me kare macon?

•   Lacoc mo ma kilwongo ni William H. Green oloko i kom Ginacoya me Leb Ibru nyo “Cik Macon” ni: “Kitwero wacone ni pe tye buk mo macon ma kikobo kakare ma loyo Ginacoya man.”

•   Lacoc mo me Baibul ma kilwongo ni F. F. Bruce oloko i kom Ginacoya me Leb Grik, nyo “Cik Manyen” ni: “Jami ma moko ada pa lok ma kicoyo i Cik Manyen dwong loyo bukke mukene-ni ducu, kadi bed kumeno pe tye ngat mo keken ma tye ki akalakala i kom bukke magi.”

•   Lacoc mo ma kilwongo ni Sir Frederic Kenyon, owaco ni ngat mo “twero mako Baibul i cinge kun loko ki tekcwiny dok labongo akalakala ni emako Lok ada mua ki bot Lubanga, ma lok ma iye pe olokke pi mwaki mapol nicakke con i tekwaro pa dano.”

•   Lukob coc pa Lujudaya ki pa Lukricitayo gukobo lok ma nyuto ka maleng bal ma jo pa Lubanga gutimo. c (Wel 20:12; 2 Camuel 11:2-4; Jo Galatia 2:11-14) Gin bene gukobo lok me ciko Lujudaya ma lujemo-ni dok gunyuto ka maleng pwony gobagi. (Kocea 4:2; Malaki 2:8, 9; Matayo 23:8, 9; 1 Jon 5:21) Lukob coc man gukobo lok ducu kakare, dok man nyuto gennegi ki worogi i kom Lok pa Lubanga.

•   Dong pe pe myero wabed ki akalakala i kom Baibul, pien Lubanga ma oweko kicoyo Baibul-li bitute bene matek wek kikob kit macon onongo tye kwede d (Icaya 40:8; 1 Petero 1:24, 25) En onongo mito ni dano ducu gunong adwogi maber ki i Lokke ento pe jo me kare macon keken. (1 Jo Korint 10:11) Ki lok ada, “Gin ducu ma yam gicoyo i kare macon ca onongo gicoyo me pwonyowa, wek wacir can, dok bene owek wabed ki gen pi lok me cuko cwiny ma wakwano i ginacoya.”​—Jo Roma 15:4.

•   Yecu ki lulub kore gubedo ka tic ki lok ma i Ginacoya me Leb Ibru labongo bedo ki gungcwiny moka ce lok meno tye kakare.​—Luka 4:​16-​21; Tic pa Lukwena 17:​1-3.