Ta nɛ a ngɛ hwue ngɛ Ukraine ɔ ná jeha kake ngɛ Soha, February 24, 2023 ɔ nɔ. Amaniɛ bɔmi ko tsɔɔ kaa Ukraine kɛ Russia ta buli abɔ nɛ a gbo, kɛ abɔ nɛ a plaa a yibɔ maa su 300,000 nɛ ma bi nɛ nihi he ye kaa a gbo ngɛ ta a he je ɔ hu a yibɔ maa su 30,000. Se eko ɔ, yibɔ ɔ ya hɛ mi pe bɔ nɛ a tsɔɔ nɛ ɔ.

 Aywilɛho sane ji kaa, e ngɛ kaa nɔ́ nɛ ta nɛ ɔ se be poe piɔ.

•   “Kɛ je benɛ Russia ta buli ɔmɛ ya tua Ukraine maa pee jeha kake ji nɛ ɔ, a nɛ́ nɔ́ ko nɛ tsɔɔ kaa ta nɛ ɔ se maa po piɔ. E ngɛ kaa nɔ́ nɛ ma enyɔ nɛ ɔmɛ ekoeko be nyɛe maa ye kunimi ngɛ ta a mi, nɛ jehanɛ hu e ngɛ kaa nɔ́ nɛ e he maa wa kaa a kɛ a sibi ma kpa gbi ngɛ níhi a he.”​—NPR (National Public Radio), February 19, 2023.

 Nihi babauu hao wawɛɛ ngɛ nyagba kɛ nɔ́ nami nɛ ta nɛ ɔ kɛ ekpahi ngɔ kɛ ba a nɔ ɔ he, nɛ sisi numi ngɛ he kaa a nu he jã. Mɛni hɛ nɔ kami nɛ Baiblo ɔ kɛ ha? Anɛ ta se maa po ligbi ko lo?

 Baiblo ɔ tu ta ko nɛ ma he adesahi a yi wami se pi nɛ e ma kpata a hɛ mi ɔ he munyu. A tsɛɛ ta nɛ ɔ ke Hamagedɔn, nɛ a kale lɛ kaa e ji “Mawu Ope ɔ ligbi ngua a nɔ ta.” (Kpo Jemi 16:14, 16) Kɛ gu ta nɛ ɔ nɔ ɔ, Mawu maa po adesa nɔ yemihi nɛ́ a haa nɛ tahi fuu yaa nɔ nɛ́ e kpataa níhi a hɛ mi ɔ se. Ke o suɔ nɛ o kase bɔ nɛ Hamagedɔn maa ngɔ tue mi jɔmi nɛ maa hi si kɛ ya neneene ɔ kɛ ba ha a he ní ɔ, moo kane munyuhi nɛ nyɛɛ se nɛ ɔ:

•   “What Is the Battle of Armageddon?”

•   “Hamagedɔn Ji Sane Kpakpa!”