MUNYU nɛ Zahra tu nɛ ngɛ hiɔ nɔ ɔ ngɛ mi nitsɛnitsɛ. Ngɛ je ɔ mi tsuo ɔ, a peeɔ yihi basabasa nɛ a bui mɛ. Mo susu anɔkuale munyuhi nɛ nyɛɛ se nɛ ɔ a he nɛ o hyɛ.

• Bumi nɛ a be ha yihi. Ngɛ Asia a, fɔli fuu suɔ kaa a fɔ binyumuwi pe biyiwi. Amaniɛ bɔmi nɛ́ Je Ma Amɛ A Kake Peemi blɔ nya tomi ɔ kɛ ha ngɛ jeha 2011 ɔ tsɔɔ kaa ngɛ Asia a, akɛnɛ ke yihɔyihi na kaa a ma fɔ biyo nɛ́ a jeɔ hɔ ɔ, aloo ke a fɔ biyo ɔ a gbeɔ bimwɔyo ɔ, aloo a kuaa lɛ heje ɔ, yihi a yibɔ ngɛ Asia a nɔ gbɔ maa pee ayɔ 134.

• Sukuu yami. Ngɛ je ɔ mi tsuo ɔ, ke a hla nihi etɛ nɛ a yɛ sukuu kɛ sui jeha eywiɛ ɔ, a kpɛti nihi enyɔ ji yihi.

• Bɔmi nami sane nɛ a kɛ haoɔ nɔ. Loloolo ɔ, ngɛ ma komɛ a nɔ ɔ, ke nɔ ko kɛ e yo ná bɔmi pani nya a, nihi nɛ tɔmi ko ngɛ he. Yihi nɛ a hiɛ pe ayɔ akpe 2 kɛ e nya ayɔ 6 ngɛ ma nɛ ɔmɛ a nɔ.

• Nɔmlɔtso mi he wami nami. Ngɛ mahi nɛ a be sika tsɔ a mi ɔ, hɛngmɛfia enyɔ tsuaa hɛngmɛfia enyɔ mi ɔ, yohɔyo ko gboɔ ngɛ hɔ ngɔmi kɛ bi fɔmi sanehi a mi ngɛ hyɛmi kpakpa nɛ a hyɛ we mɛ ɔ heje.

• Weto ní. E ngɛ mi kaa yihi ji nihi nɛ a kɛ ngmɔ ní nɛ ngɛ je ɔ mi ɔ mi nɔ́ nɛ hiɛ pe fã baa mohu lɛɛ, se ngɛ mahi fuu a nɔ ɔ, yihi be he blɔ nɛ a náa mɛ nitsɛmɛ a weto ní loo zugba.

Mɛni heje nɛ a ngmɛ́ yihi blɔ nɛ mɛ hu a ná níhi nɛ sa kaa nɔ tsuaa nɔ nɛ ná a eko ɔ? Ni komɛ kaseɔ jami mi hemi kɛ yemi kɛ ní peepeehi nɛ haa nɛ nihi peeɔ yihi basabasa nɛ a waa mɛ yi mi ɔ. French adafi fiami womi ko tsɛ India mlaa lelɔ ko nɛ a tsɛɛ lɛ Chandra Rami Chopra a munyu se. Adafi fiami womi ɔ tsɔɔ kaa mlaa lelɔ ɔ de ke: “Mlaahi nɛ a wo ngɛ jamihi tsuo a mi ɔ kplɛɛ nɔ́ kake ko nɔ: A fi se kaa nihi nɛ a ko bu yihi.”

Anɛ mo hu o hɛɛ susumi nɛ ɔ lo? Anɛ o susu kaa Baiblo ɔ tsɔɔ kaa yihi a he hia we kaa bɔnɛ jami mi womi kpahi fuu tsɔɔ ɔ lo? Ngɛ ni komɛ a blɔ fa mi ɔ, a susu kaa jã ji bɔnɛ Baiblo mi ngmami komɛ tsɔɔ. Se kɛ Mawu nɛ e ha nɛ a ngma Baiblo ɔ buu yihi ha kɛɛ? E ngɛ mi kaa munyu nɛ ɔ yeɔ nihi a tsui mohu lɛɛ, se ke wa ná tsui nɛ waa kɛ anɔkuale yemi susu nɔ́ nɛ Baiblo ɔ de ɔ he saminya a, e maa ye bua wɔ nɛ wa maa na heto ɔ.