ANƐ sane bimi nɛ ngɛ womi nɛ ɔ hɛ mi ɔ pee mo nyakpɛ lo? E peeɔ ni komɛ nyakpɛ, se nihi fuu a yi mi peeɔ mɛ enyɔɔnyɔ ngɛ he, nɛ ni komɛ hu susuɔ kaa Mawu yi mi wa niinɛ. Mɛni heje?

Ni komɛ biɔ sane nɛ ɔ ngɛ adebɔ mi oslaahi nɛ baa a heje. A biɔ ke: “Mɛni heje nɛ Mawu ngmɛ blɔ nɛ ní nɛ ɔmɛ ngɛ nɔ yae ɔ? Anɛ e susuu we adesahi a he lo? Aloo e yi mi lɛ wa?”

Ni komɛ hu biɔ sane nɛ ɔ nɔuu ke a ngɛ Baiblo ɔ kanee. Ke a kane níhi kɛ kɔ Noa kɛ Nyu Afua a he ɔ, a biɔ ke: ‘Mɛni heje nɛ Mawu nɛ e ngɛ suɔmi ɔ kpata nimli nɛ ɔmɛ tsuo a hɛ mi ɔ? Anɛ e yi mi wa lo?’

Anɛ mo hu o biɔ o he sane nɛ ɔ be komɛ lo? Aloo ke nihi bi sane nɛ ɔ, e yee ha mo kaa o ma ha mɛ heto? Ha nɛ wa susu sane bimi ko nɛ ma nyɛ maa ye bua wɔ ɔ he nɛ waa hyɛ.

Ngɛ e kpiti pomi mi ɔ, wa sume yi mi wami ní peepeehi, ejakaa wa le slɔɔto nɛ ngɛ kpakpa kɛ yayami a kpɛti. Wa be kaa lohwehi nɛ mɛɛ a li kpakpa kɛ yayami a mi tso ɔ. Wa Bɔlɔ ɔ bɔ wɔ ngɛ e “subai nɔ.” (1 Mose 1:27, NW) Mɛni enɛ ɔ tsɔɔ? Enɛ ɔ tsɔɔ kaa e ha wɔ nyɛmi konɛ wa je e su ɔmɛ kpo, waa ba wa je mi saminya, nɛ waa le slɔɔto nɛ ngɛ kpakpa kɛ yayami a kpɛti. Mo susu nɔ́ nɛ ɔ he nɛ o hyɛ: Ke Mawu ha nɛ wa le slɔɔto nɛ ngɛ kpakpa kɛ yayami a kpɛti, nɛ lɔɔ heje ɔ, wa sume yi mi wami ní peepeehi ɔ, anɛ enɛ ɔ tsɔɔ we kaa Mawu hu sume yi mi wami ní peepeehi lo?

Baiblo ɔ ma nɔ mi kaa Mawu sume yi mi wami ní peepeehi. Mawu ma nɔ mi kɛ ha wɔ ke: ‘Ye blɔ ɔmɛ a nɔ kuɔ pe nyɛ blɔ ɔmɛ, nɛ jã nɔuu ye susumi ɔmɛ hu pã nyɛ susumi ɔmɛ.’ (Yesaya 55:9) Ke wa deɔ ke Mawu yi mi wa a, anɛ lɔɔ kɛ nɔ́ nɛ Baiblo ɔ de ɔ kɔ lo? Anɛ lɔɔ tsɔɔ we kaa wa ngɛ dee ke wa blɔ ɔmɛ a nɔ kuɔ pe Mawu blɔ ɔmɛ lo? Nile ngɛ mi kaa wa ma hla níhi a mi loko waa ma wa juɛmi nya si jã. E sɛ nɛ wa de ke Mawu yi mi wa, mohu ɔ, e sa nɛ wa hla nɔ́ heje nɛ eko ɔ, e ní peepee komɛ haa nɛ wa susuɔ kaa e yi mi wa a. Bɔnɛ pee nɛ waa nu nɔ́ nɛ ɔ sisi ɔ, nyɛ ha nɛ waa hyɛ nɔ́ nɛ “yi mi wami” tsɔɔ tutuutu.

Ke wa ke nɔ ko yi mi wa a, lɔɔ tsɔɔ kaa wa susuɔ kaa nɔ ɔ hɛɛ juɛmi yaya. Ke nɔ ko yi mi wa a, e suɔ kaa nihi nɛ a na nɔ́, aloo e susuu we haomihi nɛ nihi kɛ kpeɔ ɔ a he. Enɛ ɔ he ɔ, ke tsɛ ko gblaa e bi tue akɛnɛ tsɛ ɔ suɔ kaa e pee nɔ́ ko nɛ e dɔ e bi ɔ, wa ma nyɛ ma de ke tsɛ ɔ yi mi wa. Se tsɛ nɛ e gblaa e bi tue akɛnɛ e suɔ kaa e tsɔse e bi ɔ loo e bu e he ɔ ji tsɛ kpakpa. Tsa pi be tsuaa be nɛ ke nɔ ko pee nɔ́ ko ɔ, wa ma nyɛ maa le nɔ́ heje nɛ e pee jã ngɛ, enɛ ɔ he ɔ, e yi kaa wa ma susu kaa nɔ ɔ hɛɛ juɛmi yaya.

Nyɛ ha nɛ wa susu yi mi tomi enyɔ a heje nɛ ni komɛ susuɔ kaa Mawu yi mi wa a he—adebɔ mi oslaahi nɛ baa mwɔnɛ ɔ, kɛ níhi nɛ ngɛ Baiblo ɔ mi nɛ tsɔɔ bɔnɛ Mawu gbla nihi a tue ha. Anɛ níhi a mi hlami tsɔɔ kaa Mawu yi mi wa niinɛ lo?