Kɛ Jami Nɛ O Ngɛ Mi ɔ Peeɔ E Ní Ngɛ Ta He Ha Kɛɛ?
Alberto tsu ní kaa ta bulɔ maa pee jeha nyɔngma. E de ke: “Wa osɔfo ɔ jɔɔ wɔ nɛ e deɔ ke, ‘Mawu kɛ nyɛ ngɛ.’ Se nɔ́ nɛ i susuɔ ji, ‘I yaa nɛ ma ya gbe nɔmlɔ, nɛ Baiblo ɔ hu de ke, “koo gbe nɔmlɔ.”’”
Ray tsu ní kaa mele mi ta bulɔ ngɛ Je Mi Ta II ɔ mi. Ligbi ko ɔ, e bi a we osɔfo ɔ nɛ ngɛ mele ɔ mi ɔ ke: “O baa nɛ o ba sɔleɔ kɛ haa ta buli ɔmɛ ngɛ mele nɛ ɔ mi kaa a ya ye kunimi ngɛ ta mi. Anɛ nihi nɛ waa kɛ mɛ ma ya hwu ta a hu pee we jã nɔuu kɛ̃ lo?” Osɔfo ɔ ha lɛ heto kaa Nyɔmtsɛ ɔ tsuɔ ní ngɛ nyakpɛ blɔhi a nɔ.
Ke o bua jɔɛ heto nɛ ɔ he ɔ, lɛɛ pi mo pɛ nɛ o nuɔ he jã.
MƐNI JI NƆ́ NƐ BAIBLO Ɔ TSƆƆ?
Yesu tsɔɔ kaa Mawu kita ngua amɛ a kpɛti kake ji kaa moo “suɔ o nyɛmi nɔmlɔ kaa bɔnɛ o suɔ mo nitsɛ o he” ɔ. (Marko 12:31) Anɛ Yesu tsɔɔ kaa waa hyɛ he nɛ nɔ ko ngɛ, aloo ma nɛ e je mi loko wa je suɔmi kpo kɛ ha lɛ lo? Dɛbi. E de e kaseli ɔmɛ ke: “Ke nyɛ suɔ nyɛ sibi ɔ, kɛkɛ nɔ tsuaa nɔ maa le kaa ye kaseli ji nyɛ.” (Yohane 13:34, 35) Suɔmi nɛ a ma je kpo kɛ tsɔɔ a sibi ɔ mi maa wa wawɛɛ, nɛ lɔɔ ma ha nɛ nihi maa le kaa Yesu kaseli ji mɛ. A kɛ a wami maa fɔ si kɛ ha a sibi mohu pe nɛ a ma kpata a sibi a hɛ mi.
Kristofoli nɛ a hi si ngɛ kaseli ɔmɛ a be ɔ mi ɔ ngɔ Yesu munyu ɔ kɛ tsu ní. Womi nɛ ji, The Encyclopedia of Religion ɔ de ke: “Tertullian kɛ Origen kɛ blema sɔlemi sisi toli kpa komɛ ma nɔ mi kaa Kristofoli be he blɔ nɛ a gbeɔ nɔmlɔ, nɛ sisi tomi mlaa nɛ ɔ ha nɛ a kɛ a he wui Roma ta buli a nítsumi mi ɔ mi.”
KƐ YEHOWA ODASEFOLI PEEƆ A NÍ NGƐ TA HWUMI HE HA KƐƐ?
Yehowa Odasefoli ngɛ ma tsuaa ma nɔ, enɛ ɔ heje ɔ, ke e ba kaa ma enyɔ ngɛ ta hwue ɔ, Yehowa Odasefoli le kaa a nyɛmimɛ ngɛ ma enyɔ ɔmɛ eko tsuaa eko mi. Enɛ ɔ he ɔ, a bɔɔ mɔde wawɛɛ nɛ a haa nɛ suɔmi nɛ kadiɔ mɛ kaa Kristo kaseli ɔ yaa nɔ hiɔ a kpɛti.
Anɛ jami nya dali tsɔɔ nihi konɛ a je anɔkuale Kristofoli a suɔmi ɔ kpo lo?
Kaa nɔ hyɛmi nɔ́ ɔ, Yehowa Odasefoli kɛ a he wui ta nɛ Hutubi kɛ Tutsibi hwu ngɛ Rwanda ngɛ jeha 1994 ɔ mi. Odasefoli nɛ a ji Hutubi ɔ le kaa ke a ngɔ a nyɛmimɛ Odasefoli nɛ a ji Tutsibi ɔ kɛ laa a, Hutu ta buli ɔmɛ ma nyɛ maa gbe mɛ mohu lɛɛ, se a pee jã. Ligbi ko benɛ a nu Odasefoli enyɔ komɛ nɛ a ji Hutubi nɛ a ngɔ a nyɛmimɛ Odasefoli nɛ a ji Tutsibi ɔ kɛ laa a, Hutu ta buli nɛ a tsɛɛ mɛ Interahamwe de Odasefoli enyɔ ɔmɛ ke, “Nyɛ sa gbenɔ, ejakaa nyɛ ye bua Tutsibi ɔmɛ nɛ a tu fo.” Aywilɛho sane ji kaa a gbe Odasefoli enyɔ ɔmɛ nɛ a ji Hutubi ɔ.—Yohane 15:13.
Kɛ o susu kɛɛ: Anɛ nɔ́ nɛ Yehowa Odasefoli peeɔ ɔ kɛ nɔ́ nɛ Yesu de ngɛ suɔmi nɛ haa nɛ nɔ kɛ e he sãa afɔle ɔ he ɔ kɔ lo?
