Mawu buɔ nihi nɛ a je mahi tsuo a mi ɔ a sɔlemi tue. (La 145:18, 19) Mawu Munyu nɛ ji Baiblo ɔ woɔ wɔ he wami konɛ waa sɔle nɛ wa de Yehowa níhi tsuo nɛ haoɔ wɔ ɔ. (Filipibi 4:6, 7) Se kɛ̃ ɔ, sɔlemi komɛ ngɛ nɛ Mawu bui tue. Kaa nɔ hyɛmi nɔ́ ɔ, ke wa kase munyu ko kɛ wo wa yi mi nɛ wa tĩɔ jamɛ a munyu pɛ mi kpamisaa a, Mawu bua jɔɛ he.—Kane Mateo 6:7.

Jehanɛ se hu ɔ, Yehowa bui nihi nɛ a jeɔ blɔ tɔ̃ɔ e mlaahi a nɔ ɔ a sɔlemi tue. (Abɛ 28:9) Kaa nɔ hyɛmi nɔ́ ɔ, blema a, Mawu bui Israelbi nɛ a gbeɔ nɔ ɔ a sɔlemi tue. Enɛ ɔ tsɔɔ heii kaa ja wa pee ní komɛ loko Mawu maa bu wa sɔlemi tue.—Kane Yesaya 1:15.

Ke wa be hemi kɛ yemi ɔ, wa be nyɛe maa sɔle kɛ ha Mawu. (Yakobo 1:5, 6) E sa nɛ wa na nɔ mi mami kaa Mawu ngɛ, nɛ e susuɔ wa he. Wa ma nyɛ ma ha nɛ wa hemi kɛ yemi mi maa wa kɛ gu Baiblo ɔ nɛ wa maa kase ɔ nɔ, ejakaa hemi kɛ yemi nitsɛnitsɛ daa si ngɛ odase yemihi kɛ nɔ mi mami nɛ wa náa ngɛ Mawu Munyu ɔ mi ɔ nɔ.—Kane Hebribi 11:1, 6.

E sa nɛ waa ba wa he si nɛ waa je wa tsui mi kɛ sɔle. Ke Yesu nɛ ji Mawu Bi ɔ po maa sɔle ɔ, e baa e he si. (Luka 22:41, 42) Enɛ ɔ he ɔ, e sa nɛ waa bɔ mɔde nɛ waa le níhi nɛ Mawu ngɛ hlae ngɛ wa dɛ kɛ gu Baiblo ɔ nɛ wa maa kane ɔ nɔ mohu pe nɛ wa maa tsɔɔ lɛ nɔ́ nɛ e sa kaa e pee. Enɛ ɔ ma ha nɛ wa maa sɔle kɛ bi Mawu níhi nɛ e kɛ e suɔmi nya ní peemi kɔ.—Kane 1 Yohane 5:14.