MI TSƆƆMI MUNYUHI
Mawu Biɛ ɔ
KƐ A tsɔɔ La 83:18 ɔ sisi ngɛ o Baiblo ɔ mi ha kɛɛ? Baiblo sisi tsɔɔmi nɛ ji New World Translation of the Holy Scriptures ɔ tsɔɔ kuku nɛ ɔ sisi ke: “Konɛ nihi nɛ a le kaa mo nɛ o biɛ ji Yehowa a, mo pɛ nɛ o Nɔ Kuɔ Pe Kulaa ngɛ zugba a nɔ tsuo.” Jã ji bɔ nɛ Baiblo kpa komɛ hu tsɔɔ ngmami nɛ ɔ sisi. Se Baiblo sisi tsɔɔmihi fuu je biɛ Yehowa a kɛ je ngmami nɛ ɔ mi, nɛ a ngɔ sablaihi kaa “Nyɔmtsɛ” aloo “Mawu” aloo “Neneene Tsɛ” kɛ to nane mi. Mɛni e sa nɛ a ngma ngɛ kuku nɛ ɔ mi? Sablai aloo biɛ Yehowa?
Mawu biɛ ngɛ Hebri ningma okadi mi
Ngmami nɛ ɔ ngɛ biɛ he munyu tue. Ngɛ sisije Hebri gbi nɛ a kɛ ngma Baiblo ɔ mi ɔ, a ngma biɛ nitsɛ nɛ je muno ngɛ La 83:18. A ngma lɛ kikɛ, יהוה (YHWH) ngɛ Hebri ningma okadi mi. A pɔɔ biɛ nɛ ɔ tsɛmi ngɛ Dangme mi ke “Yehowa.” Anɛ Baiblo ɔ kuku kake pɛ mi biɛ nɛ ɔ je kpo ngɛ lo? Dɛbi. E je kpo ngɛ sisije Hebri Ngmami ɔ mi maa pee si 7,000!
Kɛ ji bɔ nɛ Mawu biɛ ɔ he hia ha kɛɛ? Mo susu sɔlemi he nɔ hyɛmi nɔ́ nɛ Yesu Kristo tsɔɔ ɔ he nɛ o hyɛ. E je sisi ke: “Wa Tsɛ nɛ ngɛ hiɔwe; O biɛ ɔ he nɛ tsɔ.” (Mateo 6:9) Pee se ɔ, Yesu sɔle ha Mawu ke: ‘Tsaatsɛ, wo o biɛ ɔ hɛ mi nyami!’ Mawu ha heto kɛ je hiɔwe ke: ‘I wo hɛ mi nyami momo, se ma kpale pee ekohu.’ (Yohane 12:28) E ngɛ heii kaa Mawu biɛ ɔ he hia saminya. Mɛni he je mɔ nɛ Baiblo sisi tsɔɔli komɛ je biɛ nɛ ɔ kɛ je Baiblo ɔ mi nɛ a ngɔ sablaihi mohu kɛ to nane mi ɔ?
Eko ɔ, yi mi tomi titli enyɔ nɛ ɔmɛ a he je. Kekleekle ɔ, ni komɛ deɔ ke e sɛ kaa a ngɔ biɛ ɔ kɛ tsu ní, ejakaa nɔ ko li bɔ nɛ a tsɛɔ biɛ ɔ ha tutuutu mwɔnɛ ɔ. Ningma okadihi kaa a, e, ɛ, i, o, ɔ, kɛ u, be blema Hebri ní ngmami mi. Lɔ ɔ he ɔ, nɔ ko be mwɔnɛ ɔ nɛ ma nyɛ maa tsɔɔ bɔ nɛ nihi nɛ hi si benɛ a ngma Baiblo ɔ tsɛɛ YHWH ɔ ha. Se anɛ e sa kaa lɔ ɔ nɛ ha nɛ wa kó tsɛ Mawu biɛ ɔ lo? Ngɛ blema benɛ a ngma Baiblo ɔ, eko ɔ, a tsɛ biɛ Yesu ɔ ke Yeshua aloo Yehoshua, nɛ tsɔɔ kaa, nɔ ko be nyɛe maa tsɔɔ bɔ nɛ a tsɛ lɛ ha tutuutu. Se kɛ̃ ɔ, nihi nɛ ngɛ je ɔ mi tsuo ɔ tsɛɔ Yesu biɛ, nɛ a tsɛɔ lɛ bɔ nɛ nihi pɔɔ tsɛmi ngɛ a gbihi a mi. A de we ke a be biɛ ɔ tsɛe akɛnɛ a li bɔ nɛ nihi nɛ hi si ngɛ kaseli ɔmɛ a be ɔ mi ɔ tsɛ lɛ ha he je. Jã nɔuu kɛ̃ nɛ ke o hia blɔ kɛ ya ma kpa ko nɔ ɔ, o maa na kaa e slo bɔ nɛ a ma tsɛ o biɛ ngɛ a gbi ɔ mi ha. Enɛ ɔ he ɔ, wa be nyɛe ma de ke akɛnɛ wa li bɔ nɛ blematsɛmɛ tsɛ Mawu biɛ ɔ ha he je ɔ, wa be tsɛe.
Yi mi tomi enyɔne he je nɛ a je Mawu biɛ ɔ kɛ je Baiblo ɔ mi ɔ kɔɔ Yuda bi ɔmɛ a blema kusumi ko he. A ti nihi babauu he ye kaa e sɛ nɛ a tsua Mawu biɛ kɔkɔɔkɔ. E ngɛ heii kaa, hemi kɛ yemi nɛ ɔ daa si ngɛ Baiblo ɔ mi mlaa ko nɛ a nui sisi ɔ nɔ, nɛ ji: “Ko tsɛ [Yehowa], o Mawu ɔ biɛ yaka gu; ejakaa nɔ tsuaa nɔ nɛ peeɔ jã a, [Yehowa] kɛ e he be lɛ kee.”
Mlaa nɛ ɔ tsɔɔ kaa a ko hɛɛ Mawu biɛ ɔ mi yaka gu. Se ke a tsɛ biɛ ɔ ngɛ blɔ kpakpa nɔ hu nɛɛ, anɛ e dɛ lo? Tɔmi ko be he. Nihi nɛ ngma Hebri Baiblo ɔ nɛ a pɔɔ lɛ tsɛmi ke “Somi Momo” ɔ, ji anɔkualetsɛmɛ nɛ a yeɔ Mawu Mlaa nɛ e kɛ ha blema Israel bi ɔmɛ ɔ nɔ. Se kɛ̃ ɔ, a kɛ Mawu biɛ ɔ tsu ní si abɔ. Kaa nɔ hyɛmi nɔ́ ɔ, a kɛ Mawu biɛ ɔ wo lahi nɛ Mawu jali asafo laa boboobo ɔmɛ a mi. Yehowa Mawu fã e jali nɛ a tsɛ e biɛ ɔ, nɛ anɔkualetsɛmɛ pee jã. (Yoel 2:32, NW; Bɔfo Ɔmɛ A Ní Tsumi 2:21) Enɛ ɔ he ɔ, Kristofohi nɛ ngɛ mwɔnɛ ɔ tsɛɛ Mawu biɛ ɔ faa kɛ bu nɛ mi kuɔ kaa bɔ nɛ Yesu pee ɔ pɛpɛɛpɛ.
E ji tɔmi nɛ ngɛ hɛdɔ kaa Baiblo sisi tsɔɔli ɔmɛ je Mawu biɛ ɔ kɛ je Baiblo ɔ mi nɛ a ngɔ sablaihi mohu kɛ to nane mi. A ha Mawu ba pee kaa nɔ ko nɛ ngɛ tsitsaa nɛ wa be nyɛe maa su e he, be mi nɛ Baiblo ɔ deɔ adesahi ke a kɛ ‘Yehowa nɛ nu huɛ ɔ.’ (La 25:14) Mo susu o huɛ ko nɛ o kɛ lɛ bɔɔ wawɛɛ ɔ he nɛ o hyɛ. Ke o li e biɛ ɔ, kɛ nyɛ ma plɛ kɛ bɔ huɛ wawɛɛ kɛɛ? Jã nɔuu ke nihi li Mawu biɛ nɛ ji Yehowa a, kɛ a ma plɛ kɛ hɛ kɛ su e he kɛɛ? Jehanɛ hu, ke nihi tsɛ we Mawu biɛ ɔ, a be e biɛ ɔ sisi numi nɛ ngɛ nyakpɛ ɔ hu lee. Mɛni ji Mawu biɛ ɔ sisi?
Mawu nitsɛ tsɔɔ e sɔmɔlɔ anɔkualetsɛ Mose e biɛ ɔ sisi. Benɛ Mose bi Mawu ke e tsɔɔ lɛ e biɛ ɔ, Yehowa ha lɛ heto ke: “Ma Pee Ye He Nɔ́ Nɛ I Suɔ Nɛ Ma Pee.” (2 Mose 3:14, NW) Baiblo sisi tsɔɔmi nɛ ji Rotherham ɔ tsɔɔ ngmami nɛ ɔ sisi ke: “Ma plɛ ye he kɛ pee nɔ́ tsuaa nɔ́ nɛ i suɔ.” Lɔ ɔ he ɔ, Yehowa ma nyɛ ma plɛ e he nɔ́ tsuaa nɔ́ nɛ he maa hia konɛ e ha nɛ e yi mi tomihi nɛ ba mi, nɛ e ma nyɛ maa gu níhi nɛ e bɔ ɔ a nɔ kɛ tsu e yi mi tomi he ní.
Ngɔɔ lɛ kaa o ma nyɛ ma plɛ o he nɔ́ tsuaa nɔ́ nɛ o suɔ. Mɛni o ko pee ha o huɛmɛ? Ke a kpɛti nɔ ko be he wami ɔ, o ma nyɛ ma plɛ o he tsopa peelɔ nɛ he be nɛ́ o tsa lɛ. Ke a ti nɔ ko hu ye hiɔ ɔ, o ma nyɛ ma plɛ o he niatsɛ nɛ mi mi jɔ nɛ o ye bua lɛ. Se anɔkuale sane ji kaa, o be nyɛe nɛ o pee nɔ́ tsuaa nɔ́. Jã e ji ngɛ wɔ kulaa wa blɔ fa mi. Ke o ya nɔ nɛ o kase Baiblo ɔ, e maa pee mo nyakpɛ kaa o ma ba na bɔ nɛ Yehowa plɛɔ e he nɔ́ tsuaa nɔ́ nɛ he maa hia konɛ e ha e yi mi tomihi tsuo nɛ ba mi ha. Nɛ e bua jɔ he kaa e kɛ he wami nɛ e ngɛ ɔ maa ye bua nihi tsuo nɛ a suɔ lɛ. (2 Kronika 16:9) Nihi nɛ a li Yehowa biɛ ɔ li e su kpakpahi nɛ ɔmɛ.
Nɔ́ jemi ko be he kaa e sa nɛ biɛ Yehowa a nɛ hi Baiblo ɔ mi. Ke wa nu biɛ ɔ sisi nɛ wa tsɛɔ faa ngɛ wa jami mi ɔ, e maa wo wɔ he wami nɛ wa maa hɛ wɔ kɛ su wa hiɔwe Tsɛ Yehowa he. *
^ kk. 3 Ke o ngɛ Mawu biɛ ɔ, kɛ e sisi tsɔɔmi, kɛ nɔ́ he je nɛ e sa kaa a kɛ tsu ní ngɛ jami mi ɔ he munyu babauu hlae ɔ, moo hyɛ womi nɛ ji, The Divine Name That Will Endure Forever, nɛ Yehowa Odasefohi pee ɔ mi. Hyɛ womi wayo nɛ ji, Mawu Munyu ɔ Kasemi Womi, fã 1 ɔ hulɔ.
Eko ɔ, O Bua Maa Jɔ Enɛ ɔ Hu He
ESSENTIAL BIBLE TEACHINGS
Anɛ Mawu Ngɛ Biɛ Lo?
Wa tsɛɔ Mawu ke Ope, Bɔlɔ, Nyɔmtsɛ kɛ ekpahi. Se Mawu biɛ nitsɛnitsɛ je kpo pe si 7,000 ngɛ Baiblo ɔ mi.
