NÍ KASEMI 21
Mɛnɔmɛ Lɛ A Ngɛ Sane Kpakpa a Fiɛɛe?
E be kɛe nɛ Yehowa maa gu e Matsɛ Yemi ɔ nɔ kɛ je wa nyagba amɛ tsuo kɛ je. Enɛ ɔ ji sane kpakpa nɛ́ e sa kaa nɔ fɛɛ nɔ nɛ e nu. Yesu suɔ kaa e se nyɛɛli ɔmɛ nɛ a de nɔ fɛɛ nɔ sɛ gbi nɛ ɔ! (Mateo 28:19, 20) Mɛni blɔ nɔ Yehowa Odasefohi guɔ kɛ tsuɔ Yesu fami nɛ ɔ he ní?
1. Kɛ Mateo 24:14 ɔ ngɛ mi bae ha kɛɛ mwɔnɛ ɔ?
Yesu gba kɛ fɔ si kaa, “Sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ ngɛ zugba a nɔ hehi tsuo nɛ nimli ngɛ ɔ.” (Mateo 24:14) Yehowa Odasefohi kɛ bua jɔmi ngɛ ní tsumi nɛ he hia wawɛɛ nɛ ɔ tsue. Wa ngɛ sane kpakpa nɛ ɔ fiɛɛe ngɛ je ɔ mi tsuo ngɛ gbihi nɛ hiɛ pe 1,000 mi! Ní tsumi ngua nɛ e se be nɛ ɔ biɔ mɔde bɔmi kɛ blɔ nya tomi kpakpa. Yehowa lɛ ngɛ wɔ ye buae nɛ wa nyɛ ngɛ ní tsumi nɛ ɔ tsue ɔ nɛ.
2. Mɛni mɔde nɛ wa ngɛ bɔe konɛ wa nyɛ nɛ waa fiɛɛ kɛ ha nihi?
Wa fiɛɛɔ ngɛ he fɛɛ he nɛ wa maa na nihi ngɛ. Wa fiɛɛɔ ngɛ “wehi a mi” kaa bɔ nɛ Kristofohi nɛ a hi si ngɛ Yesu kaseli ɔmɛ a be ɔ mi ɔ pee ɔ. (Ní Tsumi 5:42) Enɛ ɔ ji blɔ titli nɛ wa guɔ nɔ kɛ fiɛɛɔ ha nimli ayɔhi abɔ daa jeha. Akɛnɛ pi be fɛɛ be nɛ nihi hiɔ we mi he je ɔ, wa fiɛɛɔ ngɛ ma nɔ hulɔ. Be fɛɛ be ɔ, wa hlaa blɔhi a nɔ nɛ wa maa gu kɛ tu Yehowa kɛ e yi mi tomi ɔmɛ a he munyu kɛ tsɔɔ ni kpahi.
3. Mɛnɔmɛ a blɔ nya ní tsumi ji kaa a fiɛɛ sane kpakpa a?
E ji anɔkuale Kristofohi tsuo a blɔ nya ní tsumi kaa a maa fiɛɛ sane kpakpa a kɛ ha ni kpahi. Waa kɛ wa blɔ nya ní tsumi nɛ ɔ fiɛ we kulaa. Wa bɔɔ mɔde wawɛɛ kaa wa maa fiɛɛ ejakaa wa le kaa e ma he ni kpahi a yi wami. (Kane 1 Timoteo 4:16.) A wui wɔ hiɔ ngɛ ní tsumi nɛ ɔ he, ejakaa Baiblo ɔ de ke: “Nyɛ ná lɛ yaka gu, nyɛɛ ngɔ kɛ ha yaka gu.” (Mateo 10:7, 8) Pi nɔ fɛɛ nɔ nɛ e buɔ wa sɛ gbi ɔ tue. Se wa yaa nɔ nɛ wa fiɛɛɔ ejakaa fiɛɛmi ní tsumi ɔ piɛɛ wa Mawu jami he, nɛ e haa nɛ Yehowa bua jɔɔ.
MOO KASE BABAUU
Moo kase mɔde nɛ Yehowa Odasefohi ngɛ bɔe konɛ a nyɛ nɛ a fiɛɛ ngɛ je ɔ mi tsuo, kɛ bɔ nɛ Yehowa ngɛ mɛ ye buae ha a he ní fuu.
A ngɛ fiɛɛe ngɛ je kɛ wɛ: (A) Costa Rica, (B) United States, (D) Benin, (E) Thailand, (Ɛ) Yap, (F) Sweden
4. Wa bɔɔ mɔde wawɛɛ konɛ wa nyɛ nɛ waa fiɛɛ kɛ ha nihi tsuo
Yehowa Odasefohi bɔɔ mɔde wawɛɛ konɛ a nyɛ nɛ a fiɛɛ sane kpakpa a kɛ ha nihi tsuo ngɛ he fɛɛ he. Mo je VIDEO ɔ, nɛ nyɛ susu sane bimi nɛ ɔ he.
-
Mɛni lɛ o bua jɔ he ngɛ mɔde nɛ Yehowa Odasefohi ngɛ bɔe kɛ ngɛ fiɛɛe ɔ he?
Nyɛɛ kane Mateo 22:39 kɛ Roma Bi 10:13-15, nɛ nyɛ susu sane bimihi nɛ nyɛɛ se nɛ ɔmɛ a he:
-
Ngɛ mɛni blɔ nɔ nɛ wa fiɛɛmi ní tsumi ɔ tsɔɔ kaa wa suɔ ni kpahi?
-
Kɛ Yehowa naa nihi nɛ a fiɛɛɔ sane kpakpa a ha kɛɛ?—Hyɛ kuku 15.
5. Wa piɛɛ Mawu he kɛ ngɛ ní tsue
Níhi a si kpamihi fuu tsɔɔ kaa Yehowa ngɛ wa fiɛɛmi ní tsumi ɔ kudɔe. Kaa nɔ hyɛmi nɔ́ ɔ, benɛ nyɛminyumu ko nɛ a tsɛɛ lɛ ke Paul nɛ e ngɛ New Zealand ɔ ngɛ fiɛɛe ngɛ wehi a mi piani ko ɔ, e ya na yo ko ngɛ e we mi. Jamɛ a ligbi ɔ mɔtu ɔ, yo ɔ sɔle kɛ ha Mawu, nɛ e wo Mawu biɛ nɛ ji Yehowa a ta ngɛ e sɔlemi ɔ mi nɛ e de lɛ ke e ha nɛ nɔ ko nɛ ba slaa lɛ. Paul de ke, “Ngmlɛfia etɛ se ɔ, i ya su e sinya a nya.”
Nyɛɛ kane 1 Korinto Bi 3:9 ɔ, nɛ nyɛ susu sane bimi nɛ ɔ he:
-
Ngɛ mɛni blɔ nɔ nɛ níhi a si kpami kaa nɔ́ nɛ ya nɔ ngɛ New Zealand ɔ tsɔɔ kaa Yehowa ngɛ fiɛɛmi ní tsumi ɔ kudɔe?
Nyɛɛ kane Ní Tsumi 1:8 ɔ, nɛ nyɛ susu sane bimi nɛ ɔ he:
-
Mɛni he je nɛ wa hia Yehowa yemi kɛ buami konɛ wa nyɛ nɛ wa tsu fiɛɛmi ní tsumi ɔ?
Anɛ o le lo?
A tsɔseɔ wɔ daa otsi ngɛ wa kpe ɔmɛ a sisi konɛ e ye bua wɔ nɛ wa nyɛ nɛ waa fiɛɛ. Ke o ya kpe nɛ ɔ eko hyɛ ɔ, kɛ o na tsɔsemi nɛ ɔ ha kɛɛ?
6. Wa buɔ fami nɛ Mawu kɛ ha kaa waa fiɛɛ sane kpakpa a tue
Ngɛ kaseli ɔmɛ a be ɔ mi ɔ, si temi kɛ woli bɔ mɔde kaa a ma ha nɛ Yesu se nyɛɛli ɔmɛ nɛ a kpa fiɛɛmi. Se Kristofohi nɛ a hi si ngɛ kaseli ɔmɛ a be ɔ mi ɔ fã he blɔ nɛ a ngɛ nɛ a kɛ maa fiɛɛ ɔ he kɛ gu ‘sane kpakpa a nɛ a ngɔ kɛ ma si ngɛ mlaa nya a’ nɔ. (Filipi Bi 1:7) Yehowa Odasefohi hu peeɔ jã mwɔnɛ ɔ. a
Nyɛɛ kane Ní Tsumi 5:27-42 ɔ, nɛ nyɛ susu sane bimi nɛ ɔ he:
NƆ KO MA BI KE: “Mɛni he je nɛ Yehowa Odasefohi fiɛɛɔ ngɛ nihi a wehi a mi ɔ?”
-
Kɛ o ma ha heto ha kɛɛ?
NYA MWƆMI
Yesu fã e se nyɛɛli ɔmɛ kaa a fiɛɛ sane kpakpa a kɛ ha nihi ngɛ je ɔ mi tsuo. Yehowa ngɛ e sɔmɔli ye buae konɛ a nyɛ nɛ a tsu ní tsumi nɛ ɔ.
Mi Nylɔmi
-
Mɛnɔmɛ lɛ a ngɛ sane kpakpa a fiɛɛe ngɛ je kɛ wɛ?
-
Mɛni blɔ nɔ nɛ fiɛɛmi nɛ wa fiɛɛɔ ɔ tsɔɔ kaa wa suɔ nimli?
-
Anɛ o susu kaa fiɛɛmi ní tsumi ɔ ma nyɛ ma ha nɛ wa bua nɛ jɔ lo? Mɛni he je?
NÍ KPAHI NƐ MAA YE BUA MO
Moo hyɛ blɔ nɔ nɛ Yehowa Odasefohi guɔ kɛ fiɛɛɔ kɛ haa nihi ngɛ ma nguahi a mi.
Ma Nɔ Odase Yemi Klɛdɛɛ Ngɛ Ma Nguahi A Mi Nɛ Ya Nɔ Ngɛ Paris (5:11)
Mɛni nɛ Yehowa Odasefohi pee kɛ ye bua nihi nɛ a ba sa we ɔ?
Moo hyɛ bɔ nɛ nɔ ko tsɔɔ kaa fiɛɛmi ní tsumi ɔ nɛ e kɛ e be tsuo ngɛ tsue ɔ haa nɛ e bua jɔɔ ha.
Moo kase sane komɛ nɛ a ma nya si ngɛ kojomi hehi nɛ lɔ ɔ ha nɛ wa nyɛ ngɛ fiɛɛe ɔ he ní.
“Matsɛ Yemi Fiɛɛli Ngɔ A Sane Kɛ Ya Kojomi He” (Mawu Matsɛ Yemi ɔ Ngɛ Nɔ Yee!, yi 13)
a Mawu ji nɔ nɛ fã wɔ kaa waa fiɛɛ. Enɛ ɔ he je ɔ, Yehowa Odasefohi hyɛ we blɔ kaa adesahi nɛ a hɛɛ blɔ nya a nɛ́ a ngmɛ mɛ blɔ kaa a fiɛɛ loko a maa fiɛɛ sane kpakpa a.
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
