Nihi nɛ a kɛ kã fiɛɛɔ sane kpakpa nɛ kɔɔ Mawu Matsɛ Yemi ɔ he daa nyɔhiɔ ɔ pɛ wa kaneɔ kaa Yehowa Odasefohi. (Mateo 24:14) Nimli nɛ ɔmɛ ji nihi nɛ a baptisi mɛ kaa Yehowa Odasefohi kɛ nihi nɛ a baptisi we mɛ lolo se a he su nɛ a kɛ a he woɔ fiɛɛmi ní tsumi ɔ mi.

 Dɛbi. E he hia we kaa nɔ ko maa wo sika loo e ha yemi kɛ buami ko loko a maa bu lɛ kaa Odasefo no, aloo loko a kɛ ní tsumi ko maa wo e dɛ loo e ma ná he blɔ ko ngɛ asafo ɔ mi. (Ní Tsumi 8:18-20) Ngɛ anɔkuale mi ɔ, nihi haa yemi kɛ buami slɔɔtohi nɛ a tsɔɔ we he nɛ e je. Odasefo no fɛɛ Odasefo no ngɔɔ e be, e he wami, kɛ ní kpahi kɛ fĩɔ je kɛ wɛ ní tsumi ɔ se faa ngɛ e nyɛmi nya.​​—2 Korinto Bi 9:7.

 Daa nyɔhiɔ ɔ, Odasefohi ngɔɔ a fiɛɛmi ní tsumi ɔ he akɔtaa bumi kɛ haa a we asafo ɔ. A nyɛ we nɔ ko nɔ ngɛ enɛ ɔ peemi mi.

 Asafo ɔ blaa akɔtaa bumi nɛ ɔmɛ nɛ a kɛ maneɔ asafo ɔ ní tsumi kɔni ɔ. Asafo ɔ ní tsumi kɔni ɔ hu ngɔɔ daa nyɔhiɔ akɔtaa bumi ɔ kɛ maneɔ asafo ɔ ní tsumi yi ɔ.

 Ke e su sɔmɔmi jeha fɛɛ sɔmɔmi jeha nyagbe ɔ, a akɔtaa bumi ɔ haa nɛ wa naa hɛ mi yami nɛ ba ngɛ Odasefohi a yibɔ ɔ mi ngɛ jamɛ a jeha a mi ngɛ ma fɛɛ ma mi. A blaa yibɔ nɛ ɔmɛ tsuo nɛ a kɛ naa Odasefohi ngɛ je kɛ wɛ ɔ a yibɔ. A kɛ ma fɛɛ ma nɔ fiɛɛmi ní tsumi ɔ he amaniɛ bɔmi woɔ “Around the World” blɔ he nɛ ngɛ wa wɛbsaiti ɔ nɔ ɔ. Amaniɛ bɔmi nɛ ɔmɛ woɔ wɔ he wami kaa bɔ nɛ e ba ngɛ blema be ɔ mi ɔ.​​—Ní Tsumi 2:41; 4:4; 15:3.

 E ngɛ mi kaa pi odasefohi ji mɛ, se a ma nyɛ maa ba wa kpe ɔmɛ eko fɛɛ eko faa. A kpɛti nihi hiɛhiɛɛ yaa Kristo gbenɔ kaimi ɔ sisi. Lɔ ɔ ke wa je Odasefohi a yibɔ ɔ kɛ je nihi abɔ nɛ a ya ní peemi nɛ ɔ sisi ɔ mi ɔ, wa maa na nihi abɔ nɛ a kɛ Yehowa Odasefohi bɔɔ se pi Odasefohi ji mɛ ɔ a yibɔ. Ngɛ jeha 2023 mi ɔ, nihi nɛ a ya Kaimi ɔ a yibɔ ji 20,461,767.

 Waa kɛ nihi nɛ a bɛ wa kpe ɔmɛ eko ɔ a ti nihi fuu kaseɔ Baiblo ɔ. Wa he we sika. Ngɛ jeha 2023 ɔ mi ɔ, waa kɛ nihi maa pee 7,281,212 kase Baiblo ɔ daa nyɔhiɔ ngɛ jeha a mi. A kpɛti ni komɛ kɛ Odasefohi slɔɔtohi lɛ kase Baiblo ɔ ngɛ be kake mi.

 Behi fuu ɔ, ke maa to blɔ nya kaa a kane ma bi a yibɔ ɔ, nihi nɛ a kɛ ní tsumi ɔ wo a dɛ ɔ biɔ ma bi ɔmɛ jami nɛ a kɛ bɔɔ. Kaa nɔ hyɛmi nɔ́ ɔ, ní tsumi he nɛ hyɛɛ ma bi nɛ a maa kane mɛ blɔ nya tomi ɔ nɔ ngɛ United States ɔ tsɔɔ kaa a “hyɛɛ ke ji nɔ ɔ susuɔ kaa e kɛ jami ko ngɛ bɔe loo e fĩ jami ko se aloo e ji jami ko mi no,” e tsa nɔ ke yibɔ fɛɛ ko nɛ a maa tsɔɔ ɔ ji “nihi a susumi se pi kaa nɔ́ ko nɛ da nɛ tɔ̃tɔ̃mi ko be he.” Se wɔɔ lɛɛ nihi nɛ a tsuɔ fiɛɛmi ní tsumi ɔ nɛ a buɔ he akɔtaa pɛ nɛ wa kaneɔ mɛ kaa Yehowa Odasefohi, se pi nihi nɛ a naa a he kaa Yehowa Odasefohi ji mɛ.