Bɔwʋlɩ mɩ wɔ 1948 wɔ suwa ɛgyɩkɩ̃ɩ̃ be nu wɔ Nigeria manlɩ ngyiakɛ ɔfʋã nu. Wɔ ɔzɔ mmɩlɩ nɩ, mɩ Ankɩlɩ Moustapha nɩɩ mɩ anlima ebani Wahabi bonlumanlɩ kɛɛ Gyehova Dasɩvʋlɔmaa. Minyianlɩ alʋbɔ ahɔnla nɩ, mɩ papa wuli. Nɩ eyi ɩyɛ ɛyɛkɛ mɩ baaba. Wahabi hanlɩ hileli mɩ kɛɛ sɛ awudunwonlɩyɛ yɩ ba a, sa yɛnwʋ yɛ papa dɔkʋ̃. Eyi hyɛlɩ mɩ ɛzɩzɩzɩbɛ ma mʋwɔlɩ yɩ tʋ kɛɛ musumaa Bayɩbʋlʋ yɩ. Munlumanlɩ wɔ 1963. Aɣinzi yi, mi mmenlima mmenyia asã sʋ̃ numanlɩ.

Wɔ 1965 nɩ, mʋhɔ mʋwʋwalɩ mɩ anlima Wilson yɩ pɛ wɔ Lagos na mɩ nɩɩ ɔhʋanɩbukolɛmaa mɔɔ bɔwɔ Igbobi asafʋ yɩ nu nɩ wɔlɩ paa. Anyɩnlɩlelɛ nɩɩ ɛhyɩmɛ mɔɔ bɛfa bɛyɛ be egyima nɩ hyɛlɩ mɩ ɛzɩzɩbɛ, na wɔ January 1968 nɩ, mɩzamɩ sʋ̃ mɩya mɩyɛlɩ ɔhʋanɩbukolɛvʋlɔ.

Eliyema Albert Olugbebi, mɔɔ ɩyɛ egyima wɔ Bɛtɩlɩ nɩ yiyialɩ mmɩlantɩyɛ nɩɩ nɣɛdɛkɛ yɩ, na ɩhã ihileli yɛ kɛɛ behyinyia ɔhuanɩbukolɛmaa aditili wɔ Nigeria manlɩ tisʋlɔ ɔfʋã nu. Mɩlanwʋ la mɩkakɛ kezimɔ Eliyemma Olugbebi valɩ anyɩnlɩlelɛ dɩndɛlɩ nɩ. Ɩhanlɩ kɛɛ: “Bɛdɩ mmɩlantɩyɛ nɩɩ nɣɛdɛkɛ na sa bɔkʋla bɛfa bɛ mmɩlɩ nɩɩ bɛ anwʋzɩzɩbɛ bɛyɛ sʋ̃maa bɛma Gyehova. Egyima sʋ̃maa wɔ kɛnɩ ma bɛ!” Nɩ mɩpɛ kɛɛ musumazuma nkɔmɩhyɛnii Ayɩzaya na  mʋkɔ dɩka bela mɔɔ Gyehova kɔzʋ̃ma mɩ nɩ, meti mɩhyɩhyɛlɩ fɔɔmɩ yɩ be.—Ayɩ. 6:8.

Wɔ May 1968 nɩ, bɛmanlɩ mʋhɔ mɩyɛlɩ ɔhʋanɩbukolɛvʋlɔ titili wɔ Kano mɔɔ ɩwɔ Nigeria manlɩ tisʋlɔ ɔfʋã nu nɩ. Ɔzɔ mmɩlɩ yɩ, nɩ Nigeria nɩɩ Biafra kʋnɛ yɩ ɩkɔlɩɩ zʋ (1967-1970). Eyi manlɩ mmennii sʋ̃maa nwʋnlɩ amanɩyɛ na bohuhunli bo nu sʋ̃maa sʋ̃. Aɣinzi yi, kʋnɛ yɩ dɛlɛlɩ hɔlɩ Nigeria avindelɩyɛ ɔfʋã nu. Eliyema be mɔɔ nɩ ɩdɩ kɛɛ ɩlɛ adwɩnɩba hanlɩ hileli mɩ kɛɛ áma mʋkɔ. Naasʋ̃ mɩhã mihileli yi kɛɛ: “Mɩla wʋ asɩ kɛɛ ɔdwɩnɩ mʋ nwʋ. Naasʋ̃ sɛ Gyehova pɛ kɛɛ mʋkɔ mʋsʋ̃mɩ wɔ kɛnɩ a, mizi kɛɛ ɔhʋanɩ bela zʋ sa ɩbɔ mʋ nwʋ banɩ.”

Kezimɔ kʋnɛ yɩ manlɩ nninyeni yɛlɩ wɔ Kano twonwa yi nu nɩ, nɩ ɩyɛ alɔbɔ baaba. Nɩ kʋnɛ yɩ zɩkɛ twonwa kezile eyi nu pasaa. Sɛ nɩ yeluwaa dasɩlɛlilɛ nu a, ɩyɛ a nɩ yɛnwʋ mmenii mɔɔ bodudua bɛ nɩ bɛ avunli wɔ twonwa nu. Nɩ asafʋ sʋ̃maa wɔ Kano, naasʋ̃ mmeliyema nɩ bo nu sʋ̃maa beɣiandinli. Bɛzabɛ mɔɔ bɛhalɩ nɩ, nɩ bɛádwu 15 po, na nɩ bo kunlu du na bɛ padi sʋ̃ golɔ. Mmɩlɩ mɔ ɔhʋanɩbukolɛmaa aditili ahyiã yɩ yɛhɔ yedwuli kɛnɩ nɩ, mmeliyema yɩ bɛ anyɩ leli baaba. Ɛzɩzɩbɛhyɛlɛ mɔɔ yɛva yɛmanlɩ bɛ nɩ, ɩmanlɩ bɛ anyɩ leli. Yɛwʋwalɩ bɛ ma bɔwɔlɩ bɛ dɩyɛzumanlɛ nɩɩ dasɩlɛlilɛ tʋ dɔkʋ̃, na bɛvalɩ bɛ dasɩlɛlilɛ nwʋ ngʋndawulɛ bɔhɔlɩ Bɛtɩlɩ na bɛhɛlalɩ awuuku sʋ̃.

Mmɩlɩ mɔ yɛhɔlɩ nɩ, yɛwɔlɩ yɩ tʋ kɛɛ yesumaa Hausa. Iluwakɛɛ nɩ yɛkãã odwokɔba nɩ wɔ bɛ ndɛnɩ nu nɩ ti, ɩmanlɩ bediyeli yɛ baaba. Naasʋ̃ ɔzʋ̃mɩnlɛ mɔɔ nɩ ile dima wɔ kɛnɩ nɩ, nɩ bɛ anyɩ iáleli ye egyima nɩ nwʋ, meti nɩ ɩsɛ kɛɛ yekila yɛ nwʋ bʋwɔ paa. Eɣile ɔkʋ̃ be, benyia be valɩ dadʋwa dʋwalɩ mɩ nɩɩ eliyema mɔɔ mɩ nɩɩ yɩ luwa dasɩlɛlilɛ nu nɩ. Ye ti yɛlɩ bʋwɔ kɛɛ yɛnwʋlɩ yɩ ndɛ na yeɣiandinli! Ɩávalɩ nwʋmɔ kɛɛ nɩ yɛ nnwʋanlɩ la asianɩ nu nɩ, Gyehova manlɩ yenyianlɩ banɩwɔlɛ na ɛlawulowɔlɛmaa yɩ sʋ̃ bɔ dʋdʋ hɔlɩ anyunumi. (Ndw. 4:8) Nnɛ, ɛlawulowɔlɛmaa mɔɔ bɔ dʋdʋ bʋ 500 yɛ bɔsʋ̃mɩɩ wɔ asafʋ 11 nu wɔ Kano a.

Aɣinzi yi wɔ August 1968 nɩ, mmɩlɩ mɔ yɛzʋ̃mɩ wɔ Kano kɛyɛ aziyianɩ ɛgyɩkɩ̃ɩ̃ mɛda nɩ, bɛmanlɩ mɩ nɩɩ ɔhʋanɩbukolɛmaa adititili anwɩ̃ yɛhɔ yɛzʋ̃mɩnlɩ wɔ  Republic of Niger bo twonwa kezile Niamey nu. Ɩákyɛ bela yɛ yɛnwʋnlɩ kɛɛ Niger kɩnla amanlɩ mɔɔ ɛkɛnɩ yɛ ɛhyɩmɛ paa wɔ azɩlɛ yɩ zʋ nɩ nwʋ a. Sɛ ɛkɛnɩ ɛhyɩmɛ yɩ la ahanlɩ a, nɩ ɩsɛ kɛɛ yesuma French mɔɔ ɩdɩ bɛ ndɛnɩ nɩ sʋ̃. Ɩávalɩ nwʋmɔ ndwokɔzɩzɩbɛ eyimmɔ munwala nɩ, yɛvalɩ yɛ nwʋ yedianlɩ Gyehova zʋ na yɛ nɩɩ ɛlawulowɔlɛmaa ɛgyɩkɩ̃ɩ̃ mɔɔ nɩ bɔwɔ kɛnɩ nɩ wɔlɩ yɩ tʋ kɛɛ yɛyɛɛ dasɩlɛlilɛ egyima yɩ. Ɩákyɛ, ɩkɛyɛ kɛɛ abiyela mɔɔ ɩwɔ Niamey mɔɔ ɩkʋla ɩkɩnga nɩ yɩ sa hanlɩ buuku mɔɔ nɩ yɛfa yɛyɛ Bayɩbʋlʋ dɩyɛzumanlɛ mɔɔ bɔfʋlɔ yɩ The Truth That Leads to Eternal Life nɩ be. Nɩ ɩyɛ po a, mmenii ba yɛ kɛnɩ kɛɛ bɛbale buuku yi be!

Ɩákyɛ, yɛɣa yɛnwʋlɩ kɛɛ aɣanɩ mbanimbani yɩ, bɛ anyɩ iáleli Gyehova Dasɩvʋlɔmaa bɔ nwʋ. Wɔ July 1969 nɩ, yɛyɛlɩ yɛ mansini ayiyialɩyɛ mɔɔ ili bɔmʋnlɩ wɔ manlɩ yi nu na mmenii kɛyɛ 20 yɛ bɛɣalɩ ebiye a. Nɩ yekilaa ɔhʋanɩ kɛɛ ɛlawulowɔlɛmaa anwɩ̃ konluma. Naasʋ̃ wɔ ayiyialɩyɛ yɩ eɣile mɔɔ ili bɔmʋnlɩ nɩ, abolisimaa ɣalɩ kɛnɩ na bɛmanlɩ yeyiakili egyimalilɛ yɩ. Bɛvalɩ yɛzayɛ ɔhʋanɩbukolɛmaa aditili yi nɩɩ masini zʋ ehilalɛvʋlɔ yɩ bɔhɔlɩ police station. Mmɩlɩ mɔ beɣiziaɣizialɩ ndwokɔ yɛ bowieli nɩ, bɛhyɛlɩ yɛ kɛɛ awulo kyɩ̃ a yɛvá yɛnwʋ yɛɣa yehile bɛ. Mmɩlɩ mɔ yɛnwʋnlɩ ɔhawʋ mɔɔ nɩ ɩbʋbɔɔ ɩba nɩ, yɛyɛlɩ nhyɩhyɛlɩyɛ yɛmanlɩ onlumanlɛ ndɛnɩ yɩ wɔ abiye yɩ awudo na yeluwalɩ anyɩnlɩdɩlɛ ɔhʋanɩ zʋ yenlumanlɩ ɛlawulowɔlɛmaa yɩ wɔ azudɩnlɩ be nu.

Alapɛnɩ ɛgyɩkɩ̃ɩ̃ be mɛda nɩ, aɣanɩ yɩ hyɛlɩ mɩ nɩɩ ɔhʋanɩbukolɛmaa adidili anlu nɩ mɔɔ bɛha nɩ kɛɛ yɛzʋ̃ Niger yedú. Bɛmanlɩ yɛ aɣile anwɩ̃ pɛ kɛɛ yɛvá yedu wɔ manlɩ yi nu. Nɩ ɩsɛ kɛɛ yɛfa amɩyɛzayɛ ye ozukua yetuwa odulɛ eyi nwʋ kakɛ. Yediyeli bɛ, meti yɛzʋ̃ kɛnɩ yɛhɔlɩ Nigeria Bɛtɩlɩ na ɛkɛnɩ yɛ bɛmanlɩ egyimalilɛ fʋlɔ yɛ a.

Bɛmanlɩ egyimalilɛ mɩ kɛɛ mʋhɔ́ mʋzʋ̃mɩ wɔ Nigeria suwa be mɔɔ bɔfʋlɔ yɩ Orisunbare, ɛkɛnɩ yɛ mɩ nɩɩ ɛlawulowɔlɛmaa okuwu ɛgyɩkɩ̃ɩ̃ be mɔɔ bɛda ɛkɛnɩ nɩ wɔlɩ numɔ yɛlɩ dasɩlɛlilɛ egyima mɔɔ itu mpʋnɩ a, na mɩ anyɩ leli baaba. Naasʋ̃ aziyianɩ ahyiã mɛda nɩ, Bɛtɩlɩ hanlɩ hileli mɩ kɛɛ miziá mʋhɔ Niger. Ahyɛasɩ yɩ, ɩyɛlɩ mɩ asibɔnwʋ na mu kunlu duli sʋ̃, naasʋ̃ nɩ mʋ nwʋ ɩpɩlɩɩ mɩ kɛɛ mikezia mʋkɔnwʋ mmeliyema mɔɔ bɔwɔ Niger nɩ!

Mizia mʋhɔlɩ Niamey. Eɣile mɔɔ mudwuli kɛnɩ yɩ awulokyɩ̃ nɩ, miyiyialɩ kualɛlilɛnii be mɔɔ ɩzʋ̃ Nigeria. Ɩnwʋnlɩ kɛɛ mɩdɩ Gyehova Dasɩvʋlɔ na ɩwɔlɩ yɩ tʋ iɣizialɩ Bayɩbʋlʋ nu ndwokɔ sʋ̃maa mɩ. Mɩ nɩɩ yɩ zumanlɩ dɩyɛ, na mmɩlɩ mɔ iyiakili sigalɛtɩnʋnlɛ nɩɩ nzanyianlɛ nɩ, inlumanlɩ. Mɛyɩ mɛda nɩ, mmɩlɩ mɔ mɩ nɩɩ mmeliyema mɔɔ bɔwɔ Niger yɩ ɔfʋã azʋlɔtʋ wɔlɩ numɔ yɛlɩ dasɩlɛlilɛ egyima yɩ na mʋnwʋnlɩ kezimɔ ngyɩkɩ̃ɩ̃ ngyɩkɩ̃ɩ̃ mmenii ɣa leli nɔhʋanlɛ yɩ nɩ a, ɩma mɩ anyɩ de baaba. Mʋhɔlɩ kɛnɩ fʋlɔ nɩ, nɩ Dasɩvʋlɔmaa mɔɔ bɔwɔ kɛnɩ nɩ dɩ 31. Naasʋ̃ mmɩlɩ mɔ mʋzʋ̃ kɛnɩ mɩyɩɩ mʋnwʋ nɩ, nɩ bɛɣa bɛyɛ 69.

Wɔ 1977 yɩ awielɩyɛ kɛnɩ nɩ, mizia mʋhɔlɩ Nigeria mʋhɔ mileli ɛdɩdɩlɛ. Wɔ dapɛnɩ asã sukuulu yɩ awielɩyɛ nɩ, egyimayɛlɛdɩka kɔmitii nu nii mɔɔ bɔfʋlɔ yɩ Malcolm Vigo manlɩ mɩɣɩnganlɩ kɛlɛta be mɔɔ ɩzʋ̃  Sierra Leone Bɛtɩlɩ. Nɩ bɛpɛɛ eliyema sigyianii mɔɔ ɩdɩ ɔhʋanɩbukolɛvʋlɔ mɔɔ ɩwɔ anwʋzɩzɩbɛ, na ɩkʋla ɩkã Bʋlɔfʋlɔ nɩɩ French ma ɩkɔhɔ kɔzʋ̃mɩ kɛɛ mansini zʋ ehilalɛvʋlɔ wɔ Guinea. Eliyema Vigo hanlɩ hileli mɩ kɛɛ, bɛva egyimalilɛ yɩ nwʋ ɛdɩdɩlɛ bɛma mɩ daada. Naasʋ̃ ɩhanlɩ izili zʋlɔ wudo kɛɛ, ɩ́dɩ egyimalilɛ mɔɔ ɩla azɩ. Iduli mʋ fʋlɔ kɛɛ, “Dwɩnɩ́ nwʋmɔ bʋwɔ ansaana wʋale wʋadiã nu.” Ɛkɛnɩ la mɩhã mihileli yi kɛɛ, “Sɛ Gyehova pɛ kɛɛ ɩsʋ̃ma mɩ a, mɛyɩ nɩ sa mʋkɔ.”

Mʋvʋlɩ pleeni mʋhɔlɩ Sierra Leone na mʋhɔ miyiyialɩ mmeliyema yɩ wɔ Bɛtɩlɩ kɛnɩ. Egyimayɛlɛdɩka Kɔmitii nu maa bo nu ɔkʋ̃ hanlɩ hileli mɩ kɛɛ, “Yézi sʋ̃maa falɩ Bulombunlililɛ egyima mɔɔ bɛyɛ yɩ wɔ Guinea nɩ nwʋ.” Ɩwɔ numɔ kɛɛ nɩ bɛva bowula mmeliyema mɔɔ bɔwɔ Sierra Leone Bɛtɩlɩ nɩ bɛ sa kɛɛ behilá dasɩlɛlilɛ egyima mɔɔ bɛyɛɛ wɔ Guinea nɩ zʋ, naasʋ̃ nɩ bɛáhʋla bɛ nɩɩ ɛlawulowɔlɛmaa nɩ di nkitanwʋ iluwakɛɛ nɩ manlɩwulɛndwokɔ yɛ basaa wɔ Guinea. Na nɩ mmeliyema yɩ bɔwɔ mmɔdɩnɩ mbɔmɩ sʋ̃maa kɛɛ bɛkɛma Bɛtɩlɩ yi agyianugyinalɛvʋlɔ be kɔhɔ manlɩ yi nu naasʋ̃ ɩáyɛ bʋwɔ. Meti bɛhã behileli mɩ kɛɛ mʋhɔ́ Guinea twonwa kezile Conakry nu, mʋhɔ́ mile ɔnwʋmɔ ɔhʋanɩ wɔ aɣanɩ yɩ kɛnɩ kɛɛ mɩbawʋwa Guinea.

Mmɩlɩ mɔ mudwuli Conakry nɩ, mʋhɔlɩ Nigeria aɣanɩ yi agyianugyinalɛvʋlɔ mɔɔ ɩwɔ Guinea manlɩ yi nu yɩ kɛnɩ. Mɩhã mihileli yi kɛɛ mɩpɛ kɛɛ mɩba mɩkã odwokɔba yɩ wɔ Guinea. Ɩhyɛlɩ mɩ ɛzɩzɩbɛ kɛɛ, máma mɩba mʋbʋwa kɛnɩ iluwakɛɛ sa bɔkʋla bɛkyɩ mɩ anzɛnyɩɩ bepila mɩ. Ɩhã ihileli mɩ kɛɛ “Siá kɔ Nigeria na kɛhã odwokɔba yɩ wɔ kɛ,” na mɩzamɩ sʋ̃ mɩhã mihileli yi kɛɛ, “Mizi mɩ kɛnɣa kɛɛ mʋkɔwʋwa ɛkɩ.” Meti ɩhɛlɛlɩ kɛlɛta ɩhɔ ɩmanlɩ Guinea aɣanɩ mbanimbani yi ɔkʋ̃ kɛɛ ɩwʋwá mɩ, na yɩzayɩ sʋ̃ ɩzʋ̃ yɩ ahʋnlɩnɩ nu ɩwʋwalɩ mɩ.

Mɛyɩ mɛda pɛɛ nɩ, mizia mʋhɔlɩ Sierra Leone Bɛtɩlɩ na mʋhɔ mɩhanlɩ mɔɔ izili nɩ nwʋ odwokɔ mihileli bɛ. Mmɩlɩ mɔ mmeliyema yɩ dɩlɩ kezimɔ Gyehova yilalɩ mʋ ɔhʋanɩdulɛ yɩ zʋ nɩ, bɛvalɩ anyɩnlɩlelɛ bɛdɩnyɩa dɩnyɩanlɩ numɔ. Nɩ aɣanɩ yɩ ile mɩ idiã numɔ kɛɛ mʋwʋwá Guinea!

Ɔzʋmɩ 1978 kɔbʋmɩ 1989 nɩ, mʋzʋ̃mɩnlɩ kɛɛ mansini zʋ ehilalɛvʋlɔ wɔ Guinea, Sierra Leone, na mʋzʋ̃mɩnlɩ kɛɛ mansini zʋ ehilalɛvʋlɔ yi agyianugyinalɛvʋlɔ wɔ Liberia sʋ̃. Bɔmʋnlɩ nɩ, nɩ mʋ nwʋ ta pa mɩ paa. Nɩ ɩyɛ po a dɩka mɔɔ mʋ nwʋ kɛba mɩ nɩ, nɩ ɩdɩ yɩ nwʋ wɔ twonwa nu kʋlaa. Naasʋ̃ nɩ mmeliyema yɩ yɛ mɔɔ bɔkɔhʋla bela bɛ nɩɩ mɩ kɔ asʋpiti.

Eɣile ɔkʋ̃ be, obunlu mɔɔ numɔ yɛ sɩ hyɩlɩ mɩ na azuwoni sʋ̃ ɣalɩ mu kunlu. Aɣinzi yi mɔɔ mʋ nwʋ dɔlɩ mɩ nɩ, yɛ mɩɣa mɩdɩlɩ kɛɛ ntʋlɔnkʋdɩ mɩla asʋpiti munwala, nɩ mmeliyema yɩ bɔdwɩnɩndwɩnɩɩ dɩka mɔɔ bekeziye mɩ nwʋ! Ɩávalɩ nwʋmɔ kɛɛ mʋ nnwʋanlɩ ɣa lalɩ asianɩ nu mbɔmɩ sʋ̃maa nɩ, miányia adwɩnɩ kɛɛ mɩlɛ mi egyimalilɛ yɩ mitiãã azɩ kyɩ̃. Mʋhɔlɩ zʋlɔ minyianlɩ anwʋlazʋ kɛɛ banɩwɔlɛ baaba mɔɔ ɩwɔ kɛnɩ daabaa nɩ zʋ̃ Nyamɩnlɩ mɔɔ ɩkʋla itunwo awuvʋlɔ nɩ yɩ kɛnɩ.

Wɔ 1988 nu nɩ, miyiyialɩ Dorcas. Nɩ ɩdɩ eliyema baalɛ ɔhʋanɩbukolɛvʋlɔ mɔɔ ɩdɔ Gyehova na ɩkã yɩ nwʋ azɩ. Yegyialɩ na ɩɣa ɩhɩnanlɩ mʋ nwʋ wɔ mansini egyima yi nu. Nɩ Dorcas ɩyɛ egyima ɛzɩzɩbɛ ɩbʋwa mɩ wɔ ye egyimalilɛ yi nu baaba na ɩzʋ̃ yɩ ahʋnlɩnɩ  nu ɩfa nninyeni ɩbɔ afɔlɩ. Nɩ sɛ yɛzʋ̃ asafʋ ɔkʋ̃ nu yɛkɔɔ fʋlɔ nu a, ɩ nɩɩ mɩ bɔ numɔ tiyia ɔhʋanɩ kɛyɛ kilomita 25 (mayɛlɩ 15), yɛkɔɔ yɩ munwala sʋ̃ nɩ yɛzʋwa yɛ baagɩ. Sɛ nɩ yɛkɔzʋ̃mɩɩ asafʋ be mɔɔ ɩwɔ aɣinzi a, nɩ kaalɩ bela mɔɔ yekenyia nɩ yɛfʋ. Nɩ ɔhʋanɩ yɩ be zʋ dudu na ebiye sʋ̃ dɩ ndɛdɛlɛ ɔhʋanɩ, meti kaalɩ yɩ yɛ yɩ ngyɩkɩ̃ɩ̃ ngyɩkɩ̃ɩ̃ ɩ nɩɩ yɛ kɔ dɩka mɔɔ yɛkɔɔ nɩ.

Dorcas wɔ akɛnɣazɩzɩbɛ paa. Kɛ ndianwʋ nɩ, nɩ itwu mmɩlɩ be a yetua nzulo mɔɔ ɛlɛngɛnɩ gua numɔ. Mmɩlɩ be mɔ nɩ ɩsɛ kɛɛ yɛfa aɣile anlu yetu ɔhʋanɩ nɩ, nɩ bɩlɩgɩ mɔɔ yekoluwa zʋ nɩ yɩ abaalɛ ɩzɩkɛ, meti nɩ ɩsɛ kɛɛ yɛfa ɛlɛnɩ yetua nzulo yi. Yedwuli mɔɔ Dorcas ɩzʋ̃ ɛlɛnɩ yɩ nu itwuu azɩ nɩ, ɩdɔlɩ nzulo mɔɔ numɔ dɔ yɩ nu. Nɩ ye munwatĩĩ yézi wɛ, na nzulo yi sʋ̃ yɛ ɛlɛngɛnɩ gua numɔ yɩ a. Anyɩnlɩlelɛ odwokɔ yɛ lɛ kɛɛ, mmɩlantɩyɛ be hɔ yɩlɩ yɩ wɔ nzulo yi nu. Iluwa mɔɔ izili nɩ ti, nɩ yɛáhʋla yɛda ohunluma. Naasʋ̃ yɛhɔlɩ zʋlɔ yɛyɛlɩ mansini egyima yɩ.

Wɔ 1992 yɩ tʋwɔlɛ nɩ, Dorcas ɣɩnzɛlɩ, nɩ yɛáhila yɩ ɔhʋanɩ kʋlaa. Meti nɩ ɩsɛ kɛɛ yesi pɔkɔ kɛɛ yɛkɛva yɛ mmɩlɩ munwala ɔzʋ̃mɩnlɛ egyima yɩ yekediã kɛ anzɛnyɩɩ yɛkɔdʋwa zʋlɔ. Yɛhanlɩ kɛɛ, “Gyehova hyɛ dɩyɛ yɛ!” Meti yɛdɩnlɩ yɛ ɣa baalɛ yɩ dima Jahgift. Alʋbɔ anlã mɛda nɩ, yɛwʋlɩ yɩ anlima benyia Eric. Ye nnwuakula anwɩ̃ yɩ munwala bɛdɩ akyɛdɩ mɔɔ bɔzʋ̃ Gyehova kɛ. Jahgift valɩ mmɩlɩ ɛgyɩkɩ̃ɩ̃ zʋ̃mɩnlɩ wɔ dɩka mɔɔ bekile yɛ awuuku tʋ wɔ Conakry, na Eric sʋ̃ ɩsʋ̃mɩɩ kɛɛ asafʋ nu sʋ̃mɩvʋlɔ.

Ɩwɔ numɔ kɛɛ Dorcas yiakili ɔhʋanɩbukolɛ titili egyima yɩ dɩyɛ, naasʋ̃ ɩhɔlɩ zʋlɔ ɩyɛlɩ ɔhʋanɩbukolɛvʋlɔ wɔ mmɩlɩ po mɔ nɩ ɩtɩdɩɩ ye nnwuakula yɩ nɩ. Wɔ Gyehova yɩ mmʋwalɩyɛ zʋ nɩ, mʋhʋla mʋhɔlɩ zʋlɔ mɩyɛlɩ mmɩlɩ munwala ɔzʋ̃mɩnlɛ egyima yɩ. Ye nnwuakula yɩ nyinli nɩ, Dorcas zialɩ ɣa yɛlɩ ɔhʋanɩbukolɛvʋlɔ titili. Kakɩ yɩ, ye munwala yɛsʋ̃mɩ kɛɛ odwokɔbadɛlɛlɛmaa wɔ Conakry.

Dɩka bela mɔɔ Gyehova kɔzʋ̃ma mɩ nɩ, mʋkɔ. Na mɩ nɩɩ mɩ yɩ munwala yɛnwʋ yɩ mbɔmɩ sʋ̃maa kɛɛ ɩbɔ yɛ nwʋ banɩ na iyila yɛ. Gyehova mɔɔ yɛvalɩ yɛ nwʋ yedianlɩ yɩ zʋ, na yɛáfa yɛ nwʋ yetiã nnwʋnlamɩ ɔfʋã nu nninyeni zʋ nɩ, ɩáma yeyiyia ndwokɔzɩzɩbɛ na adwɩnɩndwɩnɩ sʋ̃ ɩáhyɛ yɛ zʋ. Ozumalɛnwʋlɛ mɔɔ mɩ nɩɩ Dorcas yenyia yɩ wɔ yɛ ɔzʋ̃mɩnlɛ egyima yɩ nu nɩ, ɩma yɛnwʋ kɛɛ banɩwɔlɛ baaba nɩ ɩzʋ̃ “yɛ nnwʋanlɩlelɛ Nyamɩnlɩ” Gyehova kɛ. (1 Mm. 16:35) Mʋwɔ anwʋlazʋ kɛɛ bɛzabɛ mɔɔ bɛfa bɔ nwʋ betiã Gyehova zʋ munwala nɩ, “ɩkɛyɩkyɩ bɛ wɔ nnwʋanlɩ baagɩ nu kɛva keziye yɩ pɛ.”—1 Sa. 25:29.