ጥናት 12
ወዳጃዊ ስሜትና አሳቢነት ማሳየት
ይህን ማድረግ የምትችለው እንዴት ነው?
-
ስለ አድማጮችህ አስብ። አድማጮችህ ምን ዓይነት ችግሮች እንደሚያጋጥሟቸው ከግምት ማስገባትህ ከልብ እንድታስብላቸው ያደርግሃል። ካሉባቸው ችግሮች ጋር በተያያዘ ምን እንደሚሰማቸው ለመገመት ሞክር።
-
የምትጠቀምባቸውን ቃላት በጥንቃቄ ምረጥ። አድማጮችህን በሚያጽናና፣ በሚያበረታታ እንዲሁም መንፈሳቸውን በሚያድስ መንገድ ለመናገር ጥረት አድርግ። አድማጮችህን ቅር የሚያሰኝ ነገር ላለመናገር ተጠንቀቅ፤ የይሖዋ ምሥክር ያልሆኑ ሰዎችንም ሆነ የሚያምኑባቸውን ነገሮች ከመንቀፍም መቆጠብ ይኖርብሃል።
-
አሳቢነት አሳያቸው። ደግነት የሚንጸባረቅበት የድምፅ ቃና እንዲሁም ተስማሚ የሆኑ አካላዊ መግለጫዎች ለአድማጮችህ ከልብ እንደምታስብላቸው ያሳያሉ። ፊትህ ላይ የሚንጸባረቀው ስሜት፣ የሚያስተላልፈው መልእክት እንዳለ አስታውስ፤ ፈገግታ አይለይህ።