1. ¿Chem yeafeiñmu taiñ cümeque dungu femal cam huesaque dungu femal?

 CHUMTEN tripantu yeniefuliyiñ rume taiñ fautizahun, com iñchiñ mülei taiñ cüme yenieal taiñ mongen chumngechi ñi ayüqueel ta Jehová. Taiñ femal, mülefui taiñ cüme ngüneal taiñ raquiduam. ¿Chemu? Taiñ raquiduam yeafeiñmu taiñ cümeque dungu femal cam huesaque dungu femal. Re huesaque dungu mu raquiduamcüleliyiñ, huesaque dungu feipiaiñ ca femaiñ (Efes. 4:17-19). Huelu re raquiduamcüleliyiñ cümeque dungu mu, nütramcayaiñ cümeque dungu ca femaiñ, chumngechi ñi ayüqueel ta Jehová (Gál. 5:16).

2. ¿Chem ngüneduamaiñ tüfachi troquiñ mu?

² Quiñeque mu conturumeafeiñmu huesaque raquiduam taiñ lonco mu, fei com famentulayafuiñ chi. Huelu ngünehuafuiñ taiñ inanoafiel feitachi huesaque raquiduam. Petu taiñ fautizaunon, mülefui taiñ elcünual chem huesaque dungu rume ñi ayüquenoel ta Jehová. Tüfa quelluaiñmu taiñ elcünual taiñ cuifi huesa mongen. Huelu re elcünulayafiyiñ müten taiñ cuifi huesa mongen. Ca mülei taiñ nietual “tati hue mongen”, femngechi ayühulafiyiñ ta Jehová (Col. 3:10). Tüfachi troquiñ mu peaiñ tüfachi ramtun: ¿Chumquei ti che nietulu “tati hue mongen”? ¿Chumafuiñ taiñ nietual ca elcünunoafiel feitachi hue mongen?

3. ¿Chumquei ti che nietulu “tati hue mongen”? (Gálatas 5:22, 23).

³ Tati che nietulu tati hue mongen inayentuquefi chumngechi ñi raquiduamquen ca ñi femquen ta Jehová.  Femngechi che eluuquei ñi ngünenieaeteu reque Jehová ñi nehuen, femngechi cümeque raquiduam nierpui ca cümeque dungu ta femürpui (papeltunge Gálatas 5:22, 23). ¿Chumquei feitachi che? Piuqueyequefi ta Jehová ca piuqueyequefi tati pu peñi ca pu lamngen (Mat. 22:36-39). Huesaque dungu mu rupalu rume ayüucülequei (Sant. 1:2-4). Eluuquei ñi cüme yeucüleal caquelu che engün (Mat. 5:9). Illcutuchequelai ca fürenechequei (Col. 3:13). Inaquefi cümeque dungu tañi mongen mu (Luc. 6:35). Tañi femquen mu pengeli tañi maneluucülen Jehová mu (Sant. 2:18). Illcutueteu mu pu che, huesa piquelafi. Cafei ngüchaltucungelu ñi femal huesaque dungu, ngüneuquei (1 Cor. 9:25, 27; Tito 3:2).

4. Taiñ inayentuafiel ñi chumngen ta Jehová, ¿chumngelu mülei taiñ inayafiel ñi feipin Gálatas 5:22, 23 ca caquelu troquiñ Biblia mu?

⁴ Mülei taiñ inayal ti cümeque dungu ñi feipin Gálatas 5:22, 23 ca caquelu troquiñ Biblia mu, femngechi taiñ inayentuafiel ta Jehová. * Com feitachi cümeque dungu quiñeucüleingün. ¿Chumngelu feipiafuiñ? Por ejemplo, piuqueyefilmi tami chafche, ca nielafimi paciencia ca quelluafimi. Cafei rüf cüme piuquengelmi, ngünehuaimi ca ñom piuquengeaimi. 

5. ¿Chemu cümei taiñ raquiduamal Jesús reque? (1 Corintios 2:16).

⁵ (Papeltunge 1 Corintios 2:16). Taiñ inayentuafiel ta Jehová mülei taiñ raquiduamal chumngechi ñi raquiduamquen ta Jesús. ¿Chumngelu? Jesús pengelquei com ti cümeque dungu ñi ayüqueel ta Jehová. Feimu, ñi chumngen ta Jesús quimafuiñ tañi chumngen ta Jehová (Heb. 1:3). Doi eluucüleliyiñ taiñ raquiduamal chumngechi ñi raquiduamquen ta Jesús, cümeque dungu femaiñ ca cüme chengeaiñ Jesús reque (Filip. 2:5).

6. Raquiduamliyiñ taiñ pepi inayentunoafel Jesús, ¿chem cüla dungu acordayaiñ?

⁶ ¿Cüme inapeafuiñ mai Jesús tañi femün? Huelulcauquenolu am Jesús, iñchiñ feipiafuiñ: “Chumngechi ñi femquen ta Jesús, iñche turpu femnoalu troquiuquefun” piafuiñ. Femngechi raquiduam nieliyiñ, acordayafiyiñ cüla dungu.  Quiñe, iñchiñ deumangeiñ taiñ inayentuafiel ta Jehová ca Jesús, fei eluhuafuiñ taiñ inayentuafiel engu culpanchengeliyiñ rume (Gén. 1:26). Epu, nieiñ Chau Jehová ñi nehuen. Fei ta quelluaiñmu taiñ femürpual fentren dungu. Nienofuliyiñ Chau Jehová ñi nehuen, femürpulayafuiñ. Ca cüla, Jehová quimniei quiñeque mu huesalcayafuiñ, fei cüme inayentulayafuiñ. Turpu feipilayaiñmu taiñ huelulcaunoal. Jehová elcünui huaranca tripantu taiñ culpafe chengehuenoal (Apoc. 20:1-3). Huelu Jehová feipieiñmu quiñe dungu: com nehuen mu taiñ inayentuafiel ca taiñ maneluucüleal taiñ quelluaeteu.

7. ¿Chem inaduamaiñ feula?

⁷ ¿Chumngechi inayentuafuiñ ta Jesús? Feula peaiñ Jesús chumngechi pengeli tañi piuqueyechequen, ñi eluucülen tañi cüme yeucüleal caquelu che engün, ñi duamtuquefiel pu che ñi cüme feleal ca ñi cüme piuquengen. Ca peaiñ quiñeque ramtun taiñ ngüneduamuhual, femngechi taiñ inayentuafiel ta Jehová.

8. Jesús, ¿chumngechi pengeli tañi piuqueyefiel ta Jehová ca ñi piuqueyefiel com pu che?

⁸ Jesús fente ñi piuqueyefiel mu ta Jehová, femi com tañi feipieteu (Juan 14:31; 15:13). Mülepalu Mapu mu, Jesús pengeli tañi piuqueyechefengen. Caiñetufeteu rume tati pu che, huelu Jesús com che cutranpiuqueyefi. Jesús ca enseñalfi tati pu che Chau Dios ñi ngünenietual ta Mapu, femngechi pengeli tañi piuqueyefiel engün (Luc. 4:43, 44). Fente tañi piuqueyefiel ta Jehová ca taiñ piuqueyenieteu iñchiñ, Jesús cutrancaulu rume, hultucui tañi mongen com iñchiñ mu. Tañi femün mu ta Jesús, iñchiñ afnoachi mongen nieafuiñ.

9. ¿Chumngechi pengelafuiñ taiñ piuqueyechen Jesús reque?

⁹ Iñchiñ fente taiñ piuqueyefiel mu Jehová fautizauqueiñ. Cafei, chumngechi taiñ piuqueyefiel tati pu che pengelqueiñ taiñ piuqueyefiel ta Jehová, Jesús reque. Ngüneduamnge chem pin Biblia: “Quiñe che piuqueyenole ñi peñi tañi penieel, fei ¿chumngechi am piuqueyeafui ta Ngünechen, fei ñi pequenoel rume?” (1 Juan 4:20). Ramtuhuaiñ: “¿Rüf piuqueyequefiñ tañi chafche? Huesa femelimu rume quiñe che, ¿piuqueyenquechi dunguquefiñ? ¿Piuqueyefiel mu ti che amuldungulelquefiñ ca enseñalquefiñ? ¿Amuldungulelquefiñ tati pu che falintunoeteu rume cam caiñetuelimu rume? ¿Doi elcünuafun tiempo tañi amuldungual?” (Efes. 5:15, 16).

10. Jesús, ¿chumi ñi cüme yeucüleal caquelu che engün, ca femngechi ñi femal ta caquelu?

¹⁰ Jesús cüme yeuquefui caquelu che engün, ca femngechi quellufi ñi femal engün. Huesa pingen mu rume, Jesús huiñolquetulafi tañi huesa femeteu. Huelu fei müten femlai. Ca eluhui ñi cümelcautual caquelu che engün, ca quellufi ta caquelu ca ñi femngechi femal. Jesús quimeltufi engün mülefui tañi cümelcautual pu peñi ca pu lamngen engün, femngechi Jehová cüme llohuafeyu (Mat. 5:9, 23, 24). Jesús mollquechi feipifi tañi pu apostol ñi notucamequeunoal engün inei ta hunencülen quisu engün mu (Luc. 9:46-48; 22:24-27).

11. ¿Chumaiñ taiñ cüme yeucüleal caquelu che iñchiñ, ca femngechi ñi femal ta caquelu?

¹¹ Cuñiutucuulayaiñ müten taiñ yafcaunoal caquelu che iñchiñ, ca mülei taiñ cümelcautual caquelu che iñchiñ. Ca quelluafiyiñ ta caquelu ñi femal engün (Filip. 4:2, 3; Sant. 3:17, 18). Ramtuhuafuiñ:  “¿Rüf eluuquen tañi cümelcautual caquelu che iñchiñ, cüdautufuli rume? Quiñe peñi cam quiñe lamngen huesa duamelelimu, ¿illcutuniequepefiñ mai? Huesa femelimu quiñe che, ¿üngümcülen tañi perdonayaen piaeteu cam iñche nütramcayafiñ tayu cümelcautual? Yafcaule epu che, ¿quelluquefiñ tañi cümelcautual engu?”.

12. Jesús, ¿chumngechi pengeli ñi duamtufiel pu che ñi cüme feleal?

¹² Jesús ayüfui ñi cüme feleal ta che (Mat. 11:28-30). Jesús, ¿chumngechi pengeli tañi duamtuchequen ñi cüme feleal? Piuqueyenquechi dunguquefi ta caquelu ca eluucülei ñi quellucheal. Quiñe rupa, quiñe domo Fenicia tuhun-ngelu feipieyu ñi tremolmayafiel ñi domo püñeñ. Jesús tremolfemüñmalafi, huelu inaduamfilu ti domo ñi rüf feyentulen piuqueyenquechi tremolmafi ñi püñeñ (Mat. 15:22-28). Jesús, ¿ca chumngechi pengeli ñi duamtufiel pu che ñi cüme feleal? Piuqueyenquechi ngülamtufi pu che tañi piuqueyeniefiel. Quiñe rupa Jesús feipifi tañi pu discipulo quisu tañi langümngeal. Feimu Pedro feipieyu “femngechi dungu mu rupalayaimi”. Fei Jesús, caquelu discipulo ñi adquiñ mu, feipifi ta Pedro ñi femngechi huesa raquiduamcülenoal (Mar. 8:32, 33). Jesús feipilafi tañi yehuelcayafiel ta Pedro, huelu mai ayüfui ñi enseñayafiel ta Pedro ca caquelu pu discipulo ñi quisutu duamuunoal engün. Yehuepelafui ta Pedro tañi feipieteu mu ta Jesús, huelu müna quellueyu.

13. ¿Chumngechi pengelafuiñ taiñ duamtufiel pu che ñi cüme feleal?

¹³ Quiñeque mu ngülamtuafuiñ taiñ piuqueyenieelchi che. Feimu femliyiñ, pengelaiñ taiñ rüf duamtuniefiel ti che ñi cüme feleal. Ngülamtucheliyiñ, Biblia mu tripape taiñ ngülam, chumngechi ñi femün ta Jesús. Piuqueyenquechi dunguafiyiñ. Ngülamtucheliyiñ, cüme raquiduamayafiyiñ engün. Raquiduamaiñ: “Piuqueyefile Jehová ca piuqueyeeliyiñmu iñchiñ, cüme llohuai ti ngülam” piaiñ. Ramtuhuafuiñ: “Pefili tañi piuqueyenieelchi che ñi huesaque dungu femmequen, ¿eluucülepen mai tañi ngülamtuafiel? Ngülamtufiel mu quiñe che, ¿lladcünquechi dunguquefiñ cam piuqueyenquechi? ¿Chemu ngülamtuquefiñ quiñeque che? ¿Tañi illcutuniefiel mu cam ayüquen tañi quelluafiel?”.

14. Jesús, ¿chumngechi pengeli ñi cüme chengen?

¹⁴ Jesús quimi chem dungu ñi cümen ca femquefui. Jesús fente ñi piuqueyefiel mu tañi Chau femquefui cümeque dungu, tañi afmatuaeteu pu che no huelu mai rüf piuque mu. Quiñe cüme piuquengechi che chumquei rume tañi quelluafiel ca cümelcayafiel caquelu che. Iñchiñ Jesús reque, re quimlayafiyiñ müten chem dungu ñi cümen, rüf piuque mu femaiñ. Huelu quiñe che, ¿rüf fempeafui mai cümeque dungu re tañi afmatuaeteu müten tati pu che? Femafui. Cuifi mu quiñeque che quellufiel mu pu pofre, ayüquefui caquelu che tañi penieaeteu chumngechi ñi quelluchequen engün. Cümeque dungu femfulu rume engün, Jehová mu falilafui tañi femqueel engün (Mat. 6:1-4).

15. ¿Chumngechi pengelafuiñ taiñ rüf cüme chengen?

¹⁵ Rüf cüme chengeafuiñ cüme piuque mu femliyiñ cümeque dungu, taiñ afmatunoaeteu pu che. Ramtuhuafuiñ: “Quimfiñ mu ñi cümen quiñe dungu,  ¿femquepefiñ mai? ¿Chem nengümelqueneu tañi femal cümeque dungu?”.

16. ¿Chem mülei taiñ femal fill antü ca chumngelu?

¹⁶ Deu fautizahun mu iñchiñ feipilayaiñ: “Duamniehuelan tañi doi cüme chengeal” pilayaiñ. Fill antü mülei taiñ doi cüme inayentuafiel Jehová ñi chumngechi chengen. ¿Chumngelu? Jehová cansatuquelai, fentecünuquelai ñi cüdahual, ca femngechi femquelai tañi nehuen (Gén. 1:2). Doi cüdaucüleliyiñ taiñ inayentuafiel ñi chumngechi chengen ta Jehová, doi quelluaiñmu Jehová tañi nehuen. Santiago feipi taiñ feyentun Chau Dios mu lalequei reque femnoliyiñ cümeque dungu (Sant. 2:26). Feimu rume falin-ngefui taiñ cüdaucüleal.

17. Quiñeque mu cüme inanofiliyiñ Jehová ñi chumngen, ¿chumafuiñ?

¹⁷ Fentren tripantu yenieliyiñ rume taiñ cristianongen quiñeque mu huelulcauqueiñ, fei inaquelafiyiñ Jehová tañi chumngen. Huelu huelulcauliyiñ rume, amuleaiñ taiñ inayentuafiel ñi chumngen ta Jehová. Raquiduamnge tüfachi adentun mu. Huichafle tami ayün tacun, ¿ütrüfentufemafuimi? Femlayafuimi llemai. Ñüdüfpelayafimi. Ca cuñiutucuhuaimi tami huicürelhuenoafiel tami tacun. Ca femngechi quiñeque mu nienoliyiñ paciencia ca piuqueyenquechi nütramcanofiliyiñ quiñe che, huesa duamlayaiñ. Feipiafiyiñ taiñ perdonayaeteu, fei cümelcautuaiñ. Ca cuñiutucuhuaiñ taiñ femngechi dungu mu rupahuenoal.

18. ¿Chem dungu mülei taiñ raquiduamtucual?

¹⁸ Rume mañumcüleiñ Jesús mu. Doi cüme inafiliyiñ ñi raquiduam ta Jesús, doi cüme inayentuafiyiñ ñi femün. Ca doi cüme inayentufiliyiñ ñi femün ta Jesús, doi cüme inayentuafiyiñ ñi chumngen ta Jehová. Tüfachi troquiñ mu ngüneduampeiñ Chau Dios ñi nehuen quelluqueiñmu taiñ piuqueyechefengeal, taiñ cüme yeucüleal caquelu che iñchiñ, taiñ duamtuafiel pu che ñi cüme feleal ca taiñ cüme chengeal. Huelu Chau Dios ñi nehuen quelluafeiñmu taiñ ca cümeque dungu femal. Feimu cümeafui taiñ raquiduamal ca papeltual chumngechi doi cüme inayentuafuiñ ñi chumngen ta Jehová. Taiñ femal tüfa, quintuafuiñ fillque articulo mülelu tati Guía de estudio para los testigos de Jehová. Fei peafuiñ cheu ñi feipin “El vivir cristiano”, fei quintuafuiñ cheu ñi feipin “Fruto del espíritu”. Raquiduamtucuaiñ: fentecünunoliyiñ taiñ doi cüme inayentuafiel Jehová ñi chumngen, quisu quelluaiñmu tati.