Ageo 1:1-15
1 Kunapachatï Darío reyejj pä maranak apnaqaskäna, sojjtïr phajjsit mä uru saraqjjarakïna ukhajja, Sealtiel chachan Judá markan gobernadorapäki uka Zorobabel+ yoqapampi, Jehozadac chachan Josué jachʼa jilïr sacerdote yoqapampejja, Ageo*+ profeta taypiw Jehová Diosan aka arunakap katoqapjjäna:
2 “Ejercitonakan Jehová Diosapajj akham siwa: ‘Aka markajj akham siwa: “Jehová Diosan utap* lurañatakejja* janïraw tiempojj purinkiti”+ sasa’”.
3 Jehová Diosajja Ageo+ profeta taypejj mayampiw akham säna:
4 “Aka utatejj laqayäskchi ukhajja, ¿suma maderat lurat utanakan jakañ tiempoti?+
5 Ejercitonakan Jehová Diosapajj akham siwa: ‘Kuntï lurapkta ukat sum amuytʼasipjjam.
6 Jumanakajj waljwa satapjjtajja, ukampis jukʼakwa apthapipjjtajja.+ Jumanakajj manqʼapjjtawa, ukampis janiw sistʼasipktati. Jumanakajj vino umapjjtawa, ukampis janiw sistʼasipktati. Jumanakajj isi uchasipjjtawa, ukampis janiw juntʼthapisipktati. Yaqhatak trabajir jaqejja pʼiyanakan mä bolsaruw pagopjja imasi’ sasa”.
7 “Ejercitonakan Jehová Diosapajj akham siwa: ‘Kuntï lurapkta ukat sum amuytʼasipjjam’ sasa.
8 ”Jehová Diosajj akham siwa: ‘Qollur makatapjjam, maderanak apapjjam,+ nayan utaj lurapjjam,+ ukhamat uka utajj nayar kusisiyañapataki ukhamarak nayajj jachʼañchatäñajataki’+ sasa”.
9 “Ejercitonakan Jehová Diosapajj akham siwa: ‘Jumanakajj waljwa suyapjjayätajja, ukampis jukʼakwa katoqapjjtajja. Utanakamar apapjjayäta ukhajja, may phustʼasakiw nayajj ukanak chhaqtayayätjja.+ ¿Kunatsa nayajj uk lurayätjja? Kuna laykutejj taqe jumanakajj utanakam uñjañarukiw wal ocupasisipktajja, ukampis utajajj laqayäskiwa.+
10 Ukatwa alajjpachanakat sullajj jan purjjänti, janirakiw oraqes achjjänti.
11 Nayajj oraqenakamsa qollunakamsa wañtʼayaskakiyätwa, ukatwa granonakasa, vinosa, aceitesa, taqe kunanakatï oraqen achki ukanakasa pistʼjjäna. Jumanakasa uywanakamasa tʼaqesisipktawa, wali chʼama tukusin trabajipjjatamasa inamayakiwa’ sasa”.
12 Sealtiel+ chachan Zorobabel+ yoqapasa, Jehozadac+ chachan Josué jachʼa jilïr sacerdote yoqapasa, markankir jaqenakasa Jehová Diosapan arupwa istʼapjjäna, Ageo profetan arunakapsa istʼapjjarakïnwa, kuna laykutejj Ageo profetarojja jupanakan Jehová Diosapaw khitanïna. Ukatjja markankirinakajj Jehová Diosaruw ajjsarapjjäna.
13 Ukatjja Jehová Diosan Ageo yatiyiripajja Jehová Diosan khitataw markarojj aka arunak yatiyäna: “‘Nayaw jumanakampïskta’+ siw Jehová Diosajja”.
14 Jehová Diosajja Sealtiel chachan Judá markan gobernadorapäki+ uka Zorobabel yoqaparusa, Jehozadac chachan Josué+ jachʼa jilïr sacerdote yoqaparusa, markankir jaqenakarusa chʼamañchtʼänwa.+ Jupanakasti sarasaw ejercitonakan Jehová Diosapan utapan trabajiñ qalltapjjäna, mä arunjja Diosapan utapanwa trabajiñ qalltapjjäna.+
15 Ukajja Darío reyejj pä maranak apnaqaskäna, sojjtïr phajjsit 24 urunak saraqjjarakïna ukhaw pasäna.+
Notanaka
^ Uka sutejja, “mä fiestan nasiri” sañ muni.
^ Jan ukajja, “templop”.
^ Jan ukajja, “mayamp saytʼayañatakejja”.
