Jueces 20:1-48
-
Benjaminitanak contraw guerrajj utji (1-48)
20 Ukatjja Dan+ oraqet Beer-Seba cheqakama ukhamarak Galaad+ oraqetsa taqe israelit chachanakaw mistunipjjäna, jupanakajj mayachtʼasisaw mä wawak Mizpá+ markan Jehová Dios nayraqatan tantachtʼasipjjäna.
2 Ukatsti marka pʼeqtʼirinakasa Israelan taqe tribunakapasa Diosan tantachtʼasit markap nayraqatanwa lugaranakapan saytʼasipjjäna, taqenejj 400.000 espadanakamp armantat+ soldadonakänwa.*
3 Benjaminitanakajj israelit soldadonakan Mizpá markar makatapjjatapwa istʼapjjäna.
Israelit soldadonakasti akham sasaw sapjjäna: “Sapjjetaya, ¿kunjamatsa uka jan walejj pasi?”+ sasa.
4 Ukatwa jiwayapkäna uka warmin levita+ chachapajj akham säna: “Nayampi concubinajampejj Benjamín tribunkir Guibeá+ markar iktʼañatakiw puripjjta.
5 Ukatjja Guibeá markan jakirinakajj* naya contra saytʼasaw uka arumajj utar muyuntanipjjetu. Nayaruw jiwayañ munapjjetäna, ukampis naya lantejj concubinajaruw violapjjäna, jupasti jiwjjarakïnwa.+
6 Jupanakajj mä phenqʼaskañ jan wali luräwi Israelan lurapjjäna. Nayasti concubinajan jiwat cuerpop katusajja, partenakar kharinoqasaw Israelan sapa tribupar apayarakta.+
7 Jichhasti taqe israelitanaka, jumanakay kunas lurasispa uk sapjjarakim”+ sasa.
8 Ukatsti markpachaw mayachtʼasisajj mä wawak sartasipjjäna, akham sasa: “Jiwasanakat janiw maynis carpapar sarkaniti, ni utaparus kuttʼkaniti.
9 Akhamwa jichhajj Guibeá markar lurañäni: uka marka contra makatañatakejj sorteotkam+ chachanak ajlliñäni.
10 Israelan mä phenqʼaskañ lurapjjatapatjja, Israelan taqe tribunakapat sapa 100 chachanakat 10 ajlliñäni, sapa 1.000 chachanakatjja 100, sapa 10.000 chachanakatjja 1.000 ajllirakiñäni, uka chachanakaw manqʼañanak ejercitotak apthapipjjani, jupanakaw Benjamín tribunkir Guibeá markarojj kunatï wakiski uk lurapjjani” sasa.
11 Ukhamwa israelit soldadonakajj mayachtʼasisin mä wawak uka marka contra tantachtʼasipjjäna.
12 Ukatjja Israelan tribunakapajj chachanakwa Benjamín tribunkirinakan ukar khitapjjäna, taqenir akham sapjjañapataki: “¿Kunatsa jumanakat yaqhep chachanakajj uka jan wal lurapjje?
13 Jichhajj Guibeá+ markankir uka jan wali chachanak* katuyapjjeta, jupanakarojj jiwayapjjäwa, Israel taypinsa kunatï jan walïki ukajj chhaqtarakiniwa”+ sasa. Ukampis benjaminitanakajj janiw israelit jilanakapar istʼañ munapkänti.
14 Ukatwa benjaminitanakajj markanakapat Guibeá markan tantachtʼasipjjäna, israelitanak contra nuwasir sarañataki.
15 Uka urunsti benjaminitanakajj markanakapat 26.000 chachanakaruw espadanakamp armantat tantachtʼapjjäna. Guibeá markan jakirinakat 700 ajllit soldadonakaw tantachtʼasipjjarakïna.
16 Uka ejército taypinjja, 700 chʼeqachu* ajllit soldadonakaw utjäna. Jupanakat sapa maynejj jan pantjasaw mä ñikʼutarojj qalamp qʼorawtʼapjjerïna.
17 Israelan mayni tribunakapajj espadampi armantat+ 400.000 soldadonakwa tantachtʼapjjarakïna, jupanakat sapa mayniw guerran nuwasiñ sum yatipjjäna.
18 Jupanakasti sartasin Betel markaruw kunsa lurapjjani uk Diosar jisktʼasiñatak sarapjjäna.+ Israel markankirinakajj akham sasaw sapjjarakïna: “¿Khitis benjaminitanak contrajj nanakat nayra nuwasir sarani?” sasa. Jehová Diosajj akham sarakïnwa: “Judá tribuw jumanak nayra sarani” sasa.
19 Ukatjja israelitanakajj alwat sartasaw Guibeá marka contrajj campamentop saytʼayapjjäna.
20 Israelit soldadonakajj benjaminitanak contra nuwasiñatakiw mistupjjäna, Guibeá marka jakʼanwa jupanak contra nuwasiñatak formtʼasipjjäna.
21 Uka urojja benjaminitanakajj Guibeá markat mistusajj 22.000 israelitanakaruw jiwarayapjjäna.
22 Ukampis israelit ejercitojj janiw aynachtʼkänti,* ukatwa nayrïr urunjam wasitat uka pachpa cheqan nuwasiñatak formtʼasipjjäna.
23 Ukatjja israelitanakajj Betel markar makatasaw Jehová Dios nayraqatan jaypʼukam jachapjjäna, kunsa lurapjjani ukwa Jehová Diosar jisktʼasipjjarakïna, akham sasa: “¿Benjaminita jilanakaj contra wasitat nuwasir sarapjjañajajj wakisispati?”+ sasa. Jehová Diosasti sarakïnwa: “Jupanak contra makatapjjam” sasa.
24 Ukatwa israelitanakajj payïri urun benjaminitanakar wasitat jakʼachasipjjäna.
25 Benjaminitanakasti israelitanakan ukaruw Guibeá markat payïri urun mistupjjarakïna, ukhamatwa espadanakampi armantata 18.000 israelitanakar jiwarayapjjäna.+
26 Ukatsti israelit soldadonakajj taqeniw Betel markar makatapjjäna. Ukanwa jupanakajj jachapjjäna, Jehová Dios nayraqatan qontʼasipjjarakïna,+ uka urojj jaypʼukamaw ayunapjjäna,+ nakhantayat ofrendanaksa,+ sumankañ ofrendanaksa+ Jehová Dios nayraqatan loqtapjjäna.
27 Uka pasatatsti, niyakejjay uka urunakan cheqpach Diosan pactor mantat arcapajj Betel markankaskchïnjja, israelit soldadonakajj kunsa lurapjjani ukwa Jehová Diosar jisktʼasipjjäna.+
28 Uka urunakansti Eleazar chachan Finehás+ yoqapaw arca nayraqatan serviskäna, jupajj Aarón chachan allchhipänwa. Ukatjja israelitanakajj akham sasaw jisktʼapjjäna: “¿Benjaminita jilanakaj contra nuwasirejj wasitat sarapjjañajat wakisispa, jan ukajj ukharukich suytʼjjapjjäjja?”+ sasa. Jehová Diosajj sarakïnwa: “Makatapjjam, jupanakarojj qharüruw amparanakamar katuyapjjäma” sasa.
29 Ukatjja israelitanakajj Guibeá marka jakʼaruw mä akatjamat tukjañatak imantasipjjäna.+
30 Israelitanakajj wasitampiw kimsïri urun benjaminitanak contra nuwasiñatak makatapjjäna, jupanakajj kunjamtï nayrïr kutinsa payïri kutinsa lurapkänjja, ukhamarakwa Guibeá marka contra wakichtʼasipjjäna.+
31 Kunapachatï benjaminitanakajj israelit ejército contra mistunipjjäna ukhajja, israelitanakajj jupanakar markat jayarstʼayapjjänwa.+ Ukatjja kunjamtï nayrïr kutinakan lurapkänjja, ukhamarakwa benjaminitanakajj jupanak contra saytʼasisajj yaqhep chachanakar jachʼa thakinakan jiwarayapjjäna, ukhamaw 30 israelit soldadonakajj jachʼa thakinakan jiwarapjjäna,+ uka jachʼa thakinakat mayajj Betel markaruw makati, mayasti Guibeá markaruraki.
32 Ukatwa benjaminitanakajj akham sapjjäna: “Nayrjamarakiw jichhajj jiwasanak nayraqatan atipjat uñjasisipki”+ sasa. Ukampis israelitanakajj akham sapjjänwa: “Sarjjapjjañäni, markapat jupanakar jayarstʼayasajja jachʼa thakinakar sarañäni” sasa.
33 Ukatjja taqe israelit chachanakaw lugaranakapat sartasin Baal-Tamar cheqan nuwasiñatak formtʼasipjjäna. Mä akatjamat tukjañatak Guibeá marka jakʼan imantasitäpkäna uka israelitanakasti, lugaranakapat mistusaw atacapjjäna.
34 Ukhamatwa taqe israelitanakat 10.000 ajllit soldadonakajj Guibeá marka contra sarapjjäna, walpun nuwasipjjäna. Ukampis benjaminitanakajj niya atipjatäpjjañap janiw amuyasipkänti.
35 Jehová Diosajj israelitanak nayraqatanwa benjaminitanakar+ atipjäna. Uka urunsti israelitanakajj espadanakampi armantat+ 25.100 benjaminita chachanakaruw jiwarayapjjäna.
36 Israelitanakar sarjjer uñjasajja, benjaminitanakajj+ niyas atipjañampïpkaspa ukhamwa amuyasipjjäna. Ukampis israelit soldadonakajja, Guibeá+ markar tukjañatak imantasitäpkäna ukanakar confiyasaw sarjjapjjäna.
37 Mä akatjamat tukjañatak imantasitäpkäna ukanakajja, jankʼakiw Guibeá marka contrajj taqe chʼamamp saytʼasipjjäna. Ukatsti jupanakajj markpachar mantasaw taqenir espadampi jiwarayapjjarakïna.
38 Israelit soldadonakajj markar tukjañatak imantasitäpkäna uka chachanakampejj mä amtanïpjjänwa, jupanakajj mä señaljam uñachtʼayañatakejj markatwa jewqʼe mistuyapjjañapäna.
39 Kunapachatï israelitanakajj guerran nuwasiñat kuttʼjjapjjäna ukhajja, Benjamín tribunkir chachanakajj jupanak contra saytʼasisaw 30 israelit chachanakar jiwayapjjäna,+ jupanakajj sapjjarakïnwa: “Qhanäskiwa, jupanakajj nayrjamarakiw jiwasanak nayraqatan atipjayasisipki”+ sasa.
40 Ukampis markatjja mä chʼiyar jewqʼew mä señaljam mistuskäna. Kunapachatï benjaminita chachanakajj uk uñjañatak kutikipstapjjäna ukhajja, markpachat jewqʼe misturi ukhamarak alajjpachkam makatir uñjapjjäna.
41 Ukatjja israelit soldadonakajj kutikipstasaw benjaminitanak contra saytʼasipjjäna, benjaminit chachanakasti sinti jan walin uñjasipjjatapat wali sustjatäpjjänwa.
42 Ukatwa benjaminitanakajj israelitanakat escapasin wasara oraqenakar escapjjapjjäna, ukhamäkchïnsa israelit soldadonakajj jupanakar arktasipkakïnwa. Markanakat mistunir chachanakasti, benjaminitanakarojj jiwarayapjjarakïnwa.
43 Israelitanakasti benjaminitanakarojj muyuntapjjänwa, jan samartʼayasaw arktapjjäna. Guibeá marka uñkatasinwa inti jalsu toqen benjaminitanakar jiwarayapjjäna.
44 Ukhamwa guerran nuwasir chʼamani+ 18.000 benjaminit chachanakajj jiwarapjjäna.
45 Benjaminit chachanakajj kuttasaw wasarar escapapjjäna, Rimón sat jachʼa qarqaru.*+ Ukampis israelitanakajj 5.000 benjaminita chachanakaruw jachʼa thakinakan jiwarayapjjäna. Israelitanakajj Guidom cheqar puriñkam arktasipkakïnwa, ukansti 2.000 chachanakampiruw jiwarayapjjäna.
46 Uka urunjja benjaminitanakat jiwaririnakajj 25.000 chachanakänwa, jupanakajj espadanakamp armantata+ ukhamarak guerran nuwasir chʼamani chachanakänwa.
47 Ukampis 600 chachanakajj Rimón jachʼa qarqaruw* wasara toqer escapapjjäna, pusi phajjsinakaw Rimón jachʼa qarqan quedasipjjarakïna.
48 Israelit soldadonakajj benjaminitanak contra kuttʼanisaw markankirinakar espadampi jiwarayapjjäna, taqpach jiltʼirinakwa chachanakat qalltasin uywanakamppach jiwarayapjjäna. Kawkjtï sarapkäna uka thak sarkasajj taqpach markanak phichantapjjäna.
Notanaka
^ Jan ukajja, “kayuk (kayut) sarir soldadonakänwa”.
^ Ukajja, “jachʼa oraqenakani jaqenakajj” sasaw jaqokipasirakispa.
^ Jan ukajja, “uka jan kunatak servir chachanak”.
^ Variante: “chʼeqellu”.
^ Jan ukajja, “janiw ajjsarkänti”.
^ Variante: “jaqheru”.
^ Variante: “jaqheruw”.
