Naciones Unidas ukajja, taqenejj mä igualaki mayachtʼata jakasipjjañapatakiw jaqenakar chʼamañchapjje. Markanakajj sumankañan jakasipjjaspa, jaqenakan derechonakapajj respetasispa, aka oraqejj cuidasispa ukwa munapjjaraki. Maher Nasser chachajja, Crónica ONU sat revistan akham qellqäna: “Aka oraqesa umasa samanasa wali qʼañuchatawa, jan wali jaqenakasa, qollqe toqet jan mä igualakïñasa, chʼajjwañanakasa, yaqha markar escapirinakasa, terroristanakasa, contagioso usunakasa, yaqha ukhamanakas taqe cheqanwa utji, jukʼampirakiw jiljjattaski” sasa.

Yaqhepajja, aka oraqpachan mä gobierno uttʼayasispa ukwa munapjjäna. Jupanakat yaqhepajj akanakänwa: Italia markankir Dante chacha, jupajja filósofo, poeta ukat político ukhamänwa. Maynisti, Albert Einstein chachawa, jupajj física toqet yatjjatatänwa. Dante chachajja, ‘politicampi tʼaqanoqtayatäsajj janiw sumankañan jakasksnati’ sasaw säna. Jesusan arunakap aytasajj akham sarakïnwa: “Mä gobiernojj tʼaqjtasin jupanakpura saytʼasipjje ukhajja, tukusiwa” sasa (Lucas 11:17).

Pä jachʼa bombanakajj Segunda Guerra Mundialan phallayaskäna uka pasatatjja, Albert Einstein chachajj Asamblea General de las Naciones Unidas ukarojj mä carta qellqäna, ukajj periodiconakanwa uñstäna. Ukan akham sänwa: “Naciones Unidas ukajja, mäkiw aka oraqpachan mä gobierno utjañapatak chʼamachasiñapa ukhamat taqe markanakan sumankañ utjañapataki” sasa.

Ukampis ¿cheqapunit uka gobiernonkirinakajj taqe kuns sum apnaqapjjaspa? ¿Janit mayninakjamäpkaspa? Uka jisktʼanakajja, Inglaterra markankir lord Acton, sarnaqäwinakat qellqeri chachan arunakapwa amtayistu. Jupajja, “munañanïñajj (jan ukajj chʼamanïñajj) jan walinakwa utjayi, jukʼamp munañanïñajj jukʼamp jan walinakwa utjayi” sänwa.

Jaqenakatï sumankañan jakasiñ munapjjchejja, mayachtʼatäpjjañapawa. Ukampis ¿kunjamsa mayachtʼat jakasipjjaspa? ¿Jaqenakajj mayachtʼatäpjjaspawa sasin amuyañajj walikïskiti? Jaqenakajj mayachtʼatäpjjaspawa sasaw Bibliajj qhanañchi. ¿Kunjamsa ukajj phoqasini? Janiw politiconak toqe phoqaskaspati, antisas Diosan uttʼayata mä gobierno toqekiw phoqasini. Diosakiw jaqenakjjar apnaqañatak derechoni ukwa uka gobiernojj uñachtʼayarakini. Bibliarjamajja, uka gobiernojj ‘Diosan Reinopa’ sasin uñtʼatawa (Lucas 4:43).

Jesusajj padrenuestro oracionan ‘Reinomajj jutpan. Munañamajj aka oraqen luraspan’ siskäna ukhajja, uka gobiernotwa lupʼiskäna (Mateo 6:9, 10). Diosan Reinopajj janiw jan wali jaqenakan munañanakap phoqasiñapatak yanaptʼkaniti. Jan ukasti aka oraqen Diosan munañap phoqasiñapatakiw yanaptʼani.

Diosan Reinoparusti ‘alajjpachankir Reino’ sasaw uñtʼasiraki (Mateo 5:3). ¿Kunatsa ukham uñtʼasi? Uka Reinojj alajjpachatwa aka oraqjjar apnaqanini. ¿Ukajj kamsañsa muni? Uka Reinojja, apnaqañatakejj janiw qollq munkaniti. Ukhamajj uka Reinomp apnaqatäñajj wali kusiskañäniwa.

Diosan Reinopajj Jesusamp apnaqatawa. Diosaw jupar uttʼayawayi. Bibliajj Jesusat akham siwa:

• “Uka wawaw jichhajj apnaqarakini. [...] chʼamapasti taqe cheqankarakiniwa, suman sarnaqasiñasti janipuniw tukuskaniti” (Isaías 9:6, 7).

•   ‘Juparurakiw munañanïñasa, jachʼa kankañasa, reinosa churatarakïna, taqe markankirinaka, kunayman kasta parlani jaqenakarakiw juparojj servipjjäna’ (Daniel 7:14).

• “Diosasana ukhamarak Cristopan Reinopajja jaqenakjjaruw apnaqaski, jupajj wiñayan wiñayapatakiw reyjam apnaqarakini” (Apocalipsis 11:15).

Padrenuestro oracionan qellqatäki uka arunak Diosan Reinopaw phoqayani. Ukhaw Diosan munañapajj aka oraqen phoqasini. Niyakejjay jaqenakajj oraq cuidañ yateqapchinejja, oraqejj sumaptayatäniwa.

Diosan Reinopajj khitinakarutï apnaqkani ukanakarojj sum sarnaqapjjañapatakiw yatichani. Taqenis mä pachpa leyirjamaw sarnaqapjjani. Janiw nuwasiñanakajj utj-jjaniti antisas mayachtʼataw jakasipjjani. Isaías 11:9 textojj akham siwa: “Janiw khiti kuna ñanqha luriris utjkaniti, kunjämatejj umajj qʼal phoqhantejja ukhamarakiw Tatitun yatiñapajj taqe markpacharu phoqhantani” sasa.

Aka oraqen jakasirinakajj mayachtʼatäpjjaniwa, sumankañanwa jakasipjjarakini. Naciones Unidas organizacionajj janiw ukanak lurañ puedkiti. Salmo 37:11 qellqatajj akham siwa: “Jilarkir sumankañampiw kusisipjjarakini” sasa. Tiempompejja, lunthatanaka, oraq qʼañuchirinaka, manqʼat pistʼañanaka, guerranaka sasajj janiw parljjañäniti. ¿Kunapachas ukajj phoqasini? ¿Kunapachas Diosan Reinopajj aka oraqjjar apnaqjjani? ¿Kunjamsa uk lurani? ¿Kunjamsa uka Reinojj yanaptʼiristam? Akjjar jutki uka yatichäwinwa ukanakat parlaskañäni.