Jaqenakajja yaqha markankirinakaru, yaqha kasta jaqenakaru, yaqha aru parlirinakaru, yaqha religionankirinakaru, chachanakaru, warminakaru, pobrenakaru jan ukajj walja qollqen jaqenakar yaqhachapjjewa. Yaqhep jaqenakasti, waynanakaru, jilïrinakaru, jukʼa yatjjatatanakaru, discapacitadonakaru, suma uñnaqtʼaninakaru jan ukajj jan suma uñnaqtʼaninakaruw yaqhachapjjaraki. Ukhamäkchisa, janis yaqhachirïpkaspa ukhamwa amuyasipjje.

¿Jumajj mayninakar yaqhachiri usunïsmati? Mayninakan yaqhachirïpjjatap facilakwa amuysna, ukampis jiwasajj yaqhachiri jaqëtas janiw amuyasksnati. Cheqansa taqeninwa mayninakar yaqhachañajj mä jukʼakis chuymasan utjistu. Sociología toqet yatjjatata David Williams chachajj akham siwa: “Maynejj mä kasta jaqenakat jan wal pienski ukhajja, jupanakampi jikisisajj jan amuyasisaw yaqhachani” sasa.

Yovitsa chachajj Europa cheqat sureste toqenwa jakasi, jupajj uka cheqankiri yaqha kasta jaqenakat akham sänwa: “Jupanakajj jan wali jaqenakäpjjewa sasaw piensayäta, ukampis janiw yaqhachirïtaj amuyaskayätti, ‘kuntï jupanakat nayajj amuykta ukajj cheqäskapuniwa’ sasaw amuyayäta” sasa.

Gobiernonakajja, jaqenakar jan yaqhachasiñapataki jan jiskʼachasiñapatakejj leyinakwa apsupjje. Ukhamäkchisa yaqhachañajj utjaskakiwa, ¿kunatsa jan chhaqtayañ puedipki? Uka leyinakajj jaqenakan luratanakapakwa juchañchi, janiw kuntï piensapki, kuntï chuymapan amuyapki ukanak juchañchkiti. Yaqhachañajj jaqen pʼeqepana, chuymapanwa qallti. Ukhamajj ¿yaqhachañ usur atipjsnati? ¿Uka usutak qollajj utjiti?