1. ¿Kunatsa Jehová Diosar yuspärañasa?

JEHOVÁ DIOSAJJA, “taqe kunatejj askïki ukhamarak cheqäki” ukanak utjayiriwa, ukhamasti ukanakatwa yuspärañasa (Sant. 1:17). Munasir Awatirjamajja, jañchi toqetsa ajay toqetsa sumwa uñjistu (Sal. 23:1-3). Jupaw “imantasiñasajja, chʼamañchirisasa”, uksti llakinakan uñjasktan ukhaw qhan uñjtanjja (Sal. 46:1). Ukatwa salmonak qellqerjam akham sañ munaraktanjja: ‘Jehová Diosar yuspärapjjam, Jupasti suma Diosawa. Munasiñapasa jan tukuskiriwa’ sasa (Sal. 106:1, NM).

2, 3. 1) ¿Kunatsa Diosan bendicionanakap wali askit uñjañasa? 2) ¿Kuna jisktʼanakarus aka yatichäwin qhanañchaskañäni?

² Yuspärasirïtanti janicha uk amuytʼañajj ¿kunatsa wakisispa? Aka qhepa urunakanjja, jaqenakajj jan yuspärasirïpjjewa, ukajj Bibliarjamaw phoqasiski (2 Tim. 3:2). Waljanejja, Diosan bendicionanakap janiw askit uñjapkiti. Akapachajja, jichhak uñstki uka yänak alasiñatakiw chʼamañchi, ukatwa millón  millón jaqenakajj yänakapampi kusisit jakasiñat sipansa, jukʼamp yänak thaqhapjje. Jiwasajj uka amuyumpiw apayassna. Israelitanakjamarakiw jan yuspärasirir tuksna, Diosamp sum apasitassa bendicionanakapsa janiw askit uñj-jjsnati (Sal. 106:7, 11-13).

³ Jan waltʼäwinakan uñjasktan ukhajja, kunanakas pasaspa uk amuytʼarakiñäni. Ukhamanakan uñjasisajja, llakinakamp aynachtʼataw jikjjatassna, Diosan bendicionanakapatsa armtʼasiraksnawa (Sal. 116:3). ¿Kunjamatsa yuspärasir chuymanïsna? Jan walinakan uñjaskasajj ¿kunas jan aynachtʼañatakejj yanaptʼistani? Ukanak jichhajj yatjjatañäni.

4. ¿Kunjamatsa yuspärasir chuymanïskaksna?

⁴ Yuspärasir chuymanïñatakejja, taqe kuntï Jehová Diosajj churawaykistu ukanakatwa lupʼiñasa. Ukatsti, kunjamsa khuyaptʼayasistu, qawqha munasiñampis uñjistu ukanakatwa lupʼiñasaraki. Kunapachatï salmonak qellqerejj ukham lupʼkäna ukhajja, Jehová Diosan luratanakapat walpun muspharäna (Salmo 40:5; 107:43 liytʼañataki).

5. ¿Kunjamsa apóstol Pablot yuspärasirïñ yateqsna?

⁵ Apóstol Pablon sarnaqäwipajja, yuspärasirïñatakiw yanaptʼistu. Jupajj Diosan bendicionanakapatwa lupʼirïna, sapa kutirakiw Jehová Diosar taqe chuyma yuspärirïna. Pablojja, Jesusan arkirinakaparuw ‘jan wali arunakamp jiskʼachirïna, uñisisaw arknaqarakirïna’. Ukhamächïna ukasa, Jehová Diosasa, Jesusas jupat khuyaptʼayasipjjänwa ukat jaqenakar suma yatiyäwinak yatiyañapatakiw ajllipjjarakïna, ukatwa Pablojj Jehová Diosar wal yuspäräna (1 Timoteo 1:12-14 liytʼañataki). Ukhamarusa, Pablojj jilat kullakanakarojj wal munasïna, jupanakan Jehová Diosar taqe chuyma servipjjatapatsa sum sarnaqapjjatapatsa walja kutiw Jehová Diosar yuspäräna (Fili. 1:3-5, 7; 1 Tes. 1:2, 3). Yantʼanakan uñjaskäna ukhajja, jilat kullakanakaw yanaptʼapjjerïna, taqe ukanakatsa jankʼakiw Jehová Diosar yuspärirïna (Hech. 28:15; 2 Cor. 7:5-7). Ukatwa Pablojj cristianonakar akham sasin säna: “Taqe amuytʼa chuymampi, [Jehová] Tatitur qʼochuñäki ukanaksa qʼochupjjarakim, Diosar yuspagarasa” sasa (Col. 3:15-17).

6. Jehová Diosarojja, ¿kuna bendicionanakapatsa yuspärta?

⁶ ¿Kunjamatsa apóstol Pabljam yuspärasirïsna? Taqe kuntï Jehová Diosajj jiwas layku lurawayki ukanakat jupjamaw lupʼiñasa (Sal. 116:12). “¿Kuna bendicionanaksa katoqawayta?” sasin jisktʼapjjestaspa ukhajja, ¿kamssnasa? Jehová Diosamp sum apasitasasa, Jesusan jiwas layku jiwatapasa, ¿bendicionaw sissnati? Jan waltʼäwinakan uñjaskayätan ukhajj mä jilatasa jan ukajj mä kullakasa yanaptʼawayistu ukajja, ¿Diosan bendicionapaw saraksnati? Chachasasa warmisasa wawanakasasa, ¿bendicionaw sissnati? Jiwasatï Jehová Diosan bendicionanakapat lupʼiñataki tiempo apstʼasiñäni ukhajja, walja toqenakatwa Diosarojj sapüru yuspärañäni (Salmo 92:1, 2 liytʼañataki).

7. 1) ¿Kunatsa oración mayiskasajj Diosar yuspärañasa? 2) ¿Kunjamsa Jehová Diosar yuspärasajj jikjjatasiñäni?

⁷ Kunapachatï Jehová Diosan bendicionanakapat lupʼktan ukhajja, taqe chuymaw  Jehová Diosar yuspärañ muntanjja (Sal. 95:2; 100:4, 5). Diosar oración mayisisajja, yaqhepajj yänakak mayipjje. Ukampis jiwasajja, taqe kunanakatejj utjkistu ukanakat yuspärasaw Jehová Diosar kusisiytanjja. Biblianjja, kunjamsa Diosan servirinakapajj oración mayisipjjerïna uka qellqatanakaw utji. Sañäni, Ana warmisa Ezequías chachasa, Diosar mayisisajj wal yuspärapjjerïna (1 Sam. 2:1-10; Isa. 38:9-20). Ukhamasti jupanakat yateqasisin taqe kuntï Jehová Diosajj churkistu ukanakat yuspärapjjañäni (1 Tes. 5:17, 18). Ukhamtï lurañänejja, kusisitaw jikjjatasiñäni, Jehová Diosarus wal munasiñäni, jukʼampwa Jupar jakʼachasirakiñäni (Sant. 4:8).

8. ¿Kunjamatsa jan yuspärasir chuymanir pursna?

⁸ Kunanaktï Jehová Diosajj churkistu ukanak jan askit uñj-jjsna ukhajja, janiw Diosar yuspärjjsnati. ¿Kunatsa? Taqeniw nayrïr awk taykasat jucha katoqawaytanjja. Adanampi Evampejj mä paraisonwa jakasipjjäna, ukansti taqe kunaw jupanakatak utjäna, wiñayatakiw jakapjjarakispäna (Gén. 1:28). Ukampis janiw uk valorapkänti, jan ukasti jukʼampwa munasipkakïna. Ukhamätap laykojja, ¿kunarus purtʼasipjjäna? Taqpach bendicionanakwa aptʼasipjjäna (Gén. 3:6, 7, 17-19). Jichhürunakanjja, jan yuspärasir jaqenak taypinwa jaktanjja. Jupanakamp apayassna ukhajja, janiw Diosan amigopätassa, markapankatassa askit uñj-jjsnati (1 Juan 2:15-17). Uka sipitar jan jaltʼañatakejja, kunanaktï Jehová Diosajj jiwas layku lurawayki ukanakatwa lupʼiñasa ukatsti Juparuw oracionan yuspärañasaraki (Salmo 27:4 liytʼañataki).

9. Jan waltʼäwinakan uñjaskasajja, ¿kunatsa Diosan bendicionanakapat lupʼiñasa?

⁹ Yuspärasir chuymanïñajja, jan walinakar saykatañatakiw yanaptʼistani. Inas chachasasa jan ukajj warmisasa yaqhampi sarnaqjjchispa, usuntañasa utjarakispawa, familiasatsa inas maynejj jiwarakchispa, jan ukajj Oraqen jan waltʼäwinakapaw utjarakispa, ukanakaw aynachtʼayistaspa. Ukampis ukhamanakan uñjasisajja, Diosan bendicionanakapat lupʼiñaw chuymachtʼistani chʼamañchtʼarakistani. Jichhajj mä qawqha experiencianak uñjapjjañäni.

10. Jehová Diosan bendicionanakapat sapür lupʼiñajja, ¿kunjamsa Irene kullakar yanaptʼawayi?

 ¹⁰ Irene * kullakajj Estados Unidos markanwa precursor regularjam serviski. Esposopasti irpir chuymanjamaw servïna, ukampis juparu kimsa wawanakapampir jaytjasinwa yaqha warmimpi sarjjatayna. Kullakarojja, ¿kunas Diosat jan jitheqtañatakejj yanaptʼäna? Jupajj akham siwa: “Jehová Diosajj nayat llakisiwa yanaptʼarakituwa ukatwa wal yuspärta. Bendicionanakapat sapüru lupʼisajj wali kusisitapuniw jikjjatasta. Jehová Diosajj suma Awkiwa, janiw kunapachas jaytkitaniti” sasa. Irene kullakajj jan walinakansa uñjasiwaykchejja, kusisit chuymanïñaw aguantañatakisa mayninakar chʼamañchtʼañatakis yanaptʼi.

11. ¿Kunas Kyung-sook kullakarojj usumpi jan aynachtʼañatakejj yanaptʼawayi?

¹¹ Asia toqenkir Kyung-sook sat kullakajja, 20 jila maraw esposopampejj precursorjam serviwayi. Mä urojja, doctoranakaw kullakarojj pulmonar cáncer usunïtap yatiyapjjäna, ‘kimsa jan ukajj sojjta phajjsinakakiw jakjjäta’ sapjjarakïnwa. Kullakampi esposopampejj jan waltʼäwinakansa uñjasipjjerïkchïnjja, kʼumarapuniw jakasipjjerïna. Kullakajj akham siwa: “Usunïtaj yatisisajja qʼala aynachtʼatapuniw jikjjatasiyäta. Taqe kuns aptʼasiwaykirista ukhamwa amuyasiyäta, walrak ajjsarayasiyäta” sasa. ¿Kunas kullakarojj nayrar sartaskakiñatakejj yanaptʼawayi? Jupajj saskakiwa: “Sapa arumajja, janïr ikintkasaw uta terrasar mistusajj Diosar mayista. Ukanjja, kunanakatï urun kusisiyawaykitu ukanakatwa phesqa toqet Diosar yuspärta. Ukham lurañaw chuymachtʼitu, Jehová Diosar jukʼamp yuspärañatakis yanaptʼarakitu” sasa. ¿Kunjamsa ukham mayisiñajj yanaptʼawayi? Kullakajj siwa: “Kunapachatï jan waltʼäwinakan uñjasktan ukhajja, Jehová Diosaw yanaptʼaskistu. Ukampis jakäwisanjja, jan waltʼäwinakat sipansa, bendicionanakaw jukʼampejja” sasa.

12. Jason jilatarojja, ¿kunas esposapan jiwatapat llakimpi jan aynachtʼañatakejj yanaptʼawayi?

¹² Jason jilatajj África Betelanwa serviski, 30 jila maraw Diosarojj sapürunjam serviskaraki. Jupajj akham siwa: “Esposajan jiwatapat paqallqo maraw pasawayjje. Ukampis kunjamsa cáncer usumpi tʼaqhesiwayi ukanak amtañaw aynachtʼayitäna” sasa. ¿Kunas jan aynachtʼañatakejj yanaptʼi? Jilatajj saskakiwa: “Kunjamsa esposajampejj kusisita sum jakasipjjayäta ukwa mä urojj amtasta. Ukanakat Jehová Diosar yuspärayäta ukhajja, sumakiw jikjjatasiyäta. Ukürut aksarojja, kunja sumas esposajampejj jakasiwayapjjta ukanakat sapa kutiw Jehová Diosar yuspärta. Ukham lurañasti jan aynachtʼañatakiw yanaptʼawayitu. Esposajan jiwatapat llaktʼasiskaktwa, ukampis chacha warmjamajj kunja kusisitas jakasiwayapjjta ukanakatwa Jehová Diosar wal yuspärta” sasa.

13. ¿Kunas Sheryl kullakarojj aguantañatak yanaptʼawayi?

¹³ Filipinas markanjja, 2013 maran Haiyan sat supertifón jachʼa thayaw lamar qotat um llumstayäna. Ukhajja, Sheryl kullakajj 13 maranïnwa, jupasti sänwa: “Utajsa familiajsa ukanwa aptʼasiwayta” sasa. Awkipasa, taykapasa, kimsa sullkanakapasa ukanwa jiwawayapjje. Ukhaman uñjasisajja, ¿kunas Sheryl kullakarojj aguantañatakejj yanaptʼawayi? Yuspärasir chuymanïña ukat Diosan bendicionanakapat jan armtʼasiñaw yanaptʼi. Kullakajj akham  siwa: “Kunjamsa Diosan markapajj yanaptʼawayapjjetu, chʼamañchtʼawayapjjetu taqe ukanakwa uñjawayta. Ukat taqe cheqanwa jilat kullakanakajj nayatak Diosat mayipjjäna uksa yatirakiyätwa [...]. Jehová Diosan yanaptʼatapat walpun yuspärta. Jupasti kunanaktï munktan ukjja churapunistuwa” sasa. Cheqas ukhamawa, Diosan bendicionanakapat amtañajja, jan aynachtʼañatakiw yanaptʼistu, jan walinakar saykatañatakis yanaptʼarakistuwa (Efe. 5:20; Filipenses 4:6, 7 liytʼañataki).

14. ¿Kuna kusiskañ suytʼäwinïtansa? (8 janankir dibujo uñjjattʼam.)

¹⁴ Nayra tiempotpachwa Jehová Diosajj markapar bendicïna, ukaw markapankirinakarojj wal kusisiyi. Amuytʼañataki, israelitanakajj Wila lamar qotan faraonampita ejercitopampit qhespiyatäpkäna ukhajja, wali kusisitaw jikjjatasipjjäna ukat wal yuspärasaw Diosar qʼochupjjarakïna (Éxo. 15:1-21). Jichhürunakanjja, Jehová Diosajj servirinakapar mä suma suytʼäwi churistu, niyaw llakinaksa tʼaqhesiñanaksa chhaqtayjjani (Sal. 37:9-11; Isa. 25:8; 33:24). Kunapachatï Jehová Diosajj uñisirinakapar qʼal tukjkani ukat mä suma machaq oraqe churkistani ukhajja, ¡walpun Juparojj yuspärañäni! (Apo. 20:1-3; 21:3, 4.)

15. ¿Kunsa 2015 maran lurañasa?

¹⁵ 2015 maranjja, Jehová Diosat walja bendicionanak katoqañwa suytanjja. Inas jan waltʼäwinakan uñjasirakchiñäni, ukampis Jehová Diosajj janipuniw jaytanukkistaniti (Deu. 31:8; Sal. 9:9, 10). Jan jitheqtas serviskakiñatakejj Jupaw yanaptʼaskistani. Ukhamasti Habacuc profetat yateqasipjjañäni, jupasti akham sänwa: “Janisay higo qoqanakajj panqarkpan, janisay uva alinakas, olivonakas achkpan; yapunakas janisay achunak churkpan; ovej tamanakas qʼalasay tukusiskpan, janisay uywanakajj uyunakan utjkjjpan, ukampisa kusisiñamp phoqtʼatakïskäwa, Dios Tatitojjay nayan qhespiyirejjächejja uka layku” sasa (Hab. 3:17, 18). Ukhamasti, Jehová Diosar yuspärasa bendicionanakapat lupʼisipkakiñäni. Ukat 2015 maratak Bibliat apstʼasiwayki uka qellqatarjam sarnaqapjjañäni, ukansti akham siwa: ‘Jehová Diosar yuspärapjjam, Jupasti suma Diosawa’ sasa (Sal. 106:1, NM).