¿Diosajj jan sinttʼasirïpachati? sasin jisktʼasipjje ukarojj ¡kamisarak ukham sapjjanisti!, sasin inas amuysta. Ukampis waljaniw ukham jisktʼasipjje, jan ukasti Diosajj janiw sinttʼasirïkiti sapjjarakiwa.

Oraqen jan waltʼäwinakat qhespirinakajj akham jisktʼasipjje: “¿Kunatsa Diosajj akanak utjayaskakpacha? ¿Janit jiwasanakat llakiskpacha? ¿Jan sinttʼasirïpachati?” sasa.

Yaqha toqetsti inas Biblian utjki uka sarnaqäwinakat liytʼasin ukham amuyapjjarakchi, sañäni: Noé chachan urunakapan Diosajj Uma Juicio apayanïna. Ukatwa akham jisktʼasipjjaspa: ¿Kunatarak mä munasir Diosajj walja jaqenakar jiwarayaspasti, jan sinttʼasir Diosäpachati? sasa.

¿Ukham jisktʼasirïtati? Ukat Diosajj janiw sinttʼasirïkiti sasin sapki, ukar qhanañchañajj ¿jumatak chʼamati? Uka jisktʼanakar qhanañchañatakejj akanakatwa nayraqat yatjjatañasäspa.

Animalanakat sipansa, kunas walïki ukat jan walïkaraki uk sum amuytanjja. Kunattejj ‘Diosar uñtasit’ luratätanwa (Génesis 1:27). ¿Uka arunakajj kamsañs muni? Jupajj kunjam Diosasa, kunjam sarnaqañasasa ukanak uñachtʼaysnawa ukat kunatï walïki jan walïki uk amuytʼasiñwa Diosajj churarakistu, ukwa uka arunakajj sañ muni. Ukhamajj niyakejjay jan waltʼäwinakarojj uñistanjja, ¿janit Diosajj jukʼamp uñiskarakpacha?

Ukhamawa, ukatwa Diosajj jupa pachpat parlkasajj akham sasin qhanañchi: “Amtatanakajjasa, lurawinakajjasa, jumanakan amtatanakamatsa, luräwinakamat sipansa wali altorakiwa” sasa (Isaías 55:9). Ukhamajj janis sinttʼasirïkaspa ukham Diosat amuysna ukhajja, uka arunakajj kʼarïkaspas ukhamäspawa, ukat jiwasakis Diosat sipansa jukʼamp jachʼäksna ukhamarakïspawa. Ukhamasti, janïr kun amtkasin sum amuykiptʼañaw wakisispa. Ukat ‘Diosajj jan sinttʼasiriw’ sasin amuyañat sipansa, ¿kunatsa jan sinttʼasis jaqenakar castigpachäna? Uk jisktʼasiñasäspawa. Ukhamajj jan sinttʼasirïña siski uka arojj kamsañs muni uk yatjjatañäni.

Maynirutï jan sinttʼasiri sasin sissna ukhajja, kunatï chuymapansa amuyupansa utjki uk juchañchasksnajja. Khititï jan sinttʼasirïki ukajj mayninakan jan walinakan jikjjatasitapat kusisiwa, janiw khuyaptʼayaskiti. Amuytʼañataki, mä awkitï wawapar chuym ustʼayañatakik cheqañchaspa ukhajja, janiw walïkaspati. Ukampis wawapar yatichañataki, jan walinakat jarkʼaqañatak cheqañchaspajja, walikïskiwa. Ukhamajj kunatï chuymasan utjki ukjja, janiw taqenejj sum amuyapkapunispati, ukatwa luratanakasajj jan wali amtampi luratäkaspas ukham amuyapjjaspa.

Ukhamajj ¿Kunatsa yaqhepanakajj Diosajj janis sinttʼasirïkaspa ukham amuyapjjpacha? Uk pä toqet sum amuytʼañäni: Oraqen jan waltʼäwinakapata ukat Biblian jikjjataski uka Diosan apayanit castigonakata. Taqe ukanak yatjjatasaw Diosajj sinttʼasirïpachati janich uk sum amuyañäni.