YATIYIRINAKAJJ munaski uka cheqanakanjja, waljaniw yanaptʼasipki, soltera kullakanakas yanaptʼapjjarakiwa. Yaqhepajj walja maranakaw yaqha markan servisipki. ¿Kunas yaqha markar sarañatakejj jupanakar yanaptʼpachäna? ¿Kunsa yaqha markankasajj yateqawayapjje? ¿Kuna bendicionanaksa katoqawayapjje? Uk yatiñatakejja, mä qawqhaniruw entrevistasiwayi. Jumatï solteräsksta ukat jukʼamp yatiyañ munsta ukhajja, uka kullakanakan arunakapajj yanaptʼätamwa. Ukampis taqeniruw sarnaqäwinakapajj yanaptʼistaspa.

¿Solteräkasina precursorat yaqha markar sarañatakejj wakichtʼatätati? Anita kullakat parltʼañäni, jichhajj 70 maranëjjewa. Qalltanjja, yaqha markar sarañ ajjsarayasïnwa. Anitajj Inglaterra markanwa jilsuwayi, ukanwa 18 maranïkäna ukhajj precursorat serviñ qalltawayi. Jupajj siwa: “Jehová Diosat yatichañajj wal gustitäna. Ukampis yaqha markan serviñ janiw amtkayätti. Janiw kunapachas yaqha aru yateqkayätti, ukhamajj ‘janiw yaqha aru yateqkiristti’ sasaw amuyirïta. Qhepatjja, Galaad Escuelar sarañatakiw invittʼapjjetäna, ukajj janipuniw cheqaw sañjamäkänti. ‘Akham invitación katoqañatakejj janiw kunäktsa’ sasaw sirïta. Ukampis qhepat akham amuytʼirïta: ‘Jehová Diosajj kuntï lurirjamäkta uk yatiwa, ukhamajj yantʼiristwa’ sasa. Ukhat jichhakamajj 50 maranakaw pasawayjje. Japón markanwa misionerat serviskta” sasa. Anitajj solteranakaru yaqha markan jupjam servipjjañapatakiw chʼamañchtʼi. Kullakanakar ukham lurir uñjasajj wal kusisi.

Walja kullakanakaw yaqha markar sarañ qalltan ajjsarayasipjjäna. Ukampis ¿kunsa lurapjjpachäna?

Maureen kullakajj akham siwa: “Jilsjjasinjja, mayninakar yanaptʼasin kusisit jakasiñwa munayäta” sasa. Jichhajj 60 maranëjjewa. Maureen kullakajja, 20 maranïkäna ukhaw precursorata Quebec (Canadá) markar sarjjäna, ukanwa walja yanaptʼajj munasïna. Kullakajj siwa: “Qhepatjja, Galaad Escuelar sarañatakiw invittʼapjjetu. Ukampis ‘amigonakajatsa, markajatsa jayaruw khitapjjetani’ sasaw ajjsarayasiyäta. Tatajas usutarakïnwa, mamajakiw jupar uñj-jjäna. Taqe ukanakatjja, niya sapa arumaw Jehová Diosar jachtʼasisa awisirïta. Awk taykajampis parltʼarakirïtwa, jupanakajj sarañatakiw chʼamañchtʼapjjetäna. Jilat kullakanakas kunja munasiñampis awk taykajar uñjapjjäna uksa amuyarakiyätwa. Jehová Diosan yanaptʼap uñjasajja,  Jupajj sum uñjaskitani sasin confiyañatakiw yanaptʼawayitu. ¡Cheqas escuelar sarañwa amtayäta!” sasa. 1979 marat qalltasinjja, Maureen kullakajj 30 maraw África occidental toqen misionerat serviwayi. Jichhajj mamitapar uñjasaw Canadá markana precursor especialat serviski. Kullakajj siwa: “Yaqha markan servisajja, Jehová Diosajj kunatï wakiski uk churapunitänwa” sasa.

Wendy kullakajj tawaqetäkasïnwa precursorat serviñ qalltäna, jichhajj 60 maranëjjewa. Kullakajj siwa: “Wali ajjsarirïyätwa, jan uñtʼatanakampi parlañajj chʼamakïnwa. Ukampis precursorat serviñajja, taqenimpi parlañatakiw yanaptʼawayitu. Jichhajj janiw ajjsarayasjjti. Precursoräñajja, Jehová Diosar jukʼamp confiyañatakiw yanaptʼitäna. Ukatwa yaqha markan serviñ amtayäta. Mä soltera kullakajja, misioneratwa Japón markan 30 jila mara serviskäna. Jupaw Japón markar kimsa phajjsitak invittʼitäna. Kullakampi yatiyir mistuñajja, yaqha markan serviñatakiw chʼamañchtʼitäna” sasa. 1980 maranakanwa Wendy kullakajj Vanuatu islar sarjjäna, ukasti Australia markat 1.770 kilómetro sarañankiwa, Inti jalsu toqena.

Wendy kullakajja, jichhajj Vanuatu islan yaqha arur jaqokipañataki utanwa serviski. Jupajj siwa: “Aka jaya cheqan gruponaka, tamanaka uttʼayasir uñjañajj wali kusiskañawa. Jehová Diosan markaparu aka islan mä jukʼa yanaptʼasin kunjamsa jikjjatasta uk sañatakejja, janiw arus utjkituti” sasa.

Kumiko kullakajja, precursoratwa Japón markan serviskäna, ukhamaruw compañerapajj Nepal markar sarañ amtäna. Kumiko kullakajj jichhajj 60 maraniwa. Jupajj siwa: “Compañerajajj sapa kutiw sarañäni sasin sitäna, ukampis janiw nayajj munkayätti. ‘Kunjamarak yaqha aru yateqästi, janiw yaqha markan yatinoqtkäti’ sasaw llakisiyäta. Yaqha markar sarañatakejj qollqew munasirakïna. Ukanakat wal lupʼiyäta. Ukampis mä jan waliruw purtʼasta, motompiw accidentasta, ukatsti hospitalaruw apapjjetäna. Ukanwa akham lupʼiyäta: ‘Akatjamatwa kunar purtʼasiñas utji, usuntasin janiw yaqha markan serviñ puedkiristi. ¿Janit mä maras yaqha markar serviri sarkirista? Mä amtar puriñatakejj Jehová Diosaruw yanaptʼa mayiyäta’” sasa. Hospitalat mistusajja, Kumiko kullakajj Nepal markajj kunjamasa uk uñjiriw saräna. Qhepatjja, compañera masipampiw ukar jakir sarjjapjjäna.

Kumiko kullakajj 10 mara jilaw Nepal markan serviski, jupajj siwa: “Llakinakajajj chhaqtjjänwa. Kawkhantï yatiyirinakajj munaski ukan yanaptʼasajja, wali kusisitätwa. Mä familiar Bibliat yatichir  sarta ukhajja, vecinonakat mä phesqa jan ukajj sojjtaniw istʼir jutapjjaraki. Wawanakas respetompiw mä tratado mayipjjetu. Jaqenakajj taqe chuymaw istʼapjje, uk uñjasajj wal kusista” sasa.

Parlaniwayktan uka kullakanakajj jan walinakanwa uñjasipjjarakïna. ¿Kunas jupanakar yanaptʼäna?

Canadá markankir Diane kullakajj 60 jila maraniwa, jupajj siwa: “Qalltanjja, familiajat jayan jakañajj chʼamakïnwa” sasa. Kullakajj 20 maraw Costa de Marfil markan misionerat servïna. Jupajj saskakiwa: “Yatiykayäta uka cheqankiri jaqenakar munasiñatakejja, Jehová Diosaruw yanaptʼa mayisiyäta. Galaad Escuelanjja mä yatichirejj Jack Redford jilatänwa. Jupajj sapjjetänwa: ‘Yaqha markan servisinjja, inas qalltan mayjtʼasisin llakisipjjchïta, yamas jaqenakar wali pisin jakasir uñjasajj inas jukʼampïchini. Ukampis janiw ukak uñjapjjañamäkiti. Jan ukasti jaqenakan ajanupa, nayrapa uñkatapjjam. Biblian cheqa yatichäwinakap istʼasajj kunjamsa jikjjatasipjje uk amuyapjjam’ sasa. Uka ewjjtʼarjam lurasajja, walja bendicionanakwa katoqawayta. Diosan Reinopat istʼasajja, kunjamsa jaqenakajj kusisipjjäna ukwa uñjawayta” sasa. ¿Kunas Diane kullakarojj yaqha markan yatinoqtañatakejj yanaptʼarakïna? Kullakajj siwa: “Bibliat yateqerinakajampejj sumwa apasiyäta, kunjamsa Jehová Diosar serviñ qalltapjjäna uk uñjasas wal kusisiyäta. Yatiykayäta uka cheqajja, utajäkaspas ukhamänwa. Ukanwa Jesusan arsutaparjamajj taykanaksa, awkinaksa, kullakanaksa, jilanaksa jikjjatawayta” sasa (Mar. 10:29, 30).

Anne kullakajj 40 jila maraniwa, jupajj Asia cheqanwa serviski. Ukankir mä markanjja, Diosan arunakap yatiyañajj jarkʼatawa. Kullakajj siwa: “Walja mara Diosar yaqha markanakan servisajja, walja kullakanakampiw jakawayta, taqenis mayj mayjapjjänwa. Ukatwa awisajj jan waltʼayasiñanakasa, chuyma ustʼayasiñanakas utjäna. Ukhamanakanjja, khitinakampitï jakapkayäta uka kullakanakaru ukhamarak costumbrenakap jukʼamp uñtʼañatakiw chʼamachasiyäta. Ukatsti jupanakar munasiñampi, amuyumpi uñjañatakiw chʼamachasiyäta. Ukajj janiw inamayäkänti, walja amiganak jikjjatawayta, ukaw Diosaru yaqha markan serviskakiñatakejj yanaptʼawayitu” sasa.

Alemaniankiri Ute kullakarojja, 1993 maranwa misionerat serviñapatakejj Madagascar markar khitapjjäna, jupajj 50 jila maraniwa. Kullakajj siwa:  “Qalltanjja, yaqha aru yateqañasa, juntʼu cheqan yatinoqtañas nayatak chʼamakïnwa, malaria usumpi jan usuntañatakisa, ameba ukhamarak purak laqʼonaka jan katuñatakis wal chʼamachasiyäta. Yaqha aru yateqañatakejja, uka markankir jilat kullakanakampi wawanakapampi ukhamarak Bibliat yateqerinakampiw yanaptʼawayapjjetu. Usutäkayäta ukhajja, misionerat servipkayäta uka kullakaw munasiñamp uñjitäna. Ukampis Jehová Diosaw jukʼamp yanaptʼawayitu, Juparojj taqe llakinakajwa oración toqejj yatiyirïta. Kuntï maykayäta ukarjam yanaptʼa katoqañatakejja, awisajj walja urunaka, ukhamarak phajjsinakaw pacienciampi suytʼirïta. Jehová Diosaw taqe llakinakaj jukʼat jukʼat askichäna” sasa. Ute kullakajj 23 maraw Madagascar markan serviski.

Yatiyirinakajj munaski uka cheqanakaru servir saririnakajj walja bendicionanakwa katoqapjje. Uka bendicionanakat mä qawqha uñjañäni.

Alemania markankiri Heidi kullakajj 70 jila maraniwa, misioneratwa jupajj 1968 marat Costa de Marfil markan serviski. Kullakajj siwa: “Bibliat yateqerinakajaru Diosan markapat jan jitheqtiri uñjasajj wal kusista. Yaqhepajj precursorata, jilïr irpirita ukhamaw Diosar servisipki. Jupanakat waljanisti, mamaparjama jan ukajj awichaparjamaw uñjapjjetu. Jilïr irpirinakat maynejja, esposapampisa, wawanakapampisa, familiapäkiristsa ukham uñjapjjetu. Jehová Diosajj mä yoqa, mä yojjchʼa, kimsa allchhimpi churawayitu” sasa (3 Juan 4).

Canadá markankiri Karen kullakajj 70 jila maraniwa, jupajj 20 jila maraw África occidental cheqan serviski. Kullakajj siwa: “Misionerat servisaw mayninakat llakisiñsa, munasiñampi, pacienciampi uñjañsa yateqawayta. Taqe markanakan jilat kullakanak utjatap uñjañajja, jukʼamp sum amuytʼañatakiw yanaptʼawayitu. Jichhajja, manqʼa phayañasa, qʼomachañasa taqe cheqan mayj mayjätap amuyta. Jilat kullakanakamp sum apasiñajj mä bendicionawa. Jichhajj janiw nayrjam jakasjjapjjti, Diosan markapansa yaqha luräwinakwa katoqapjjta. Ukhamäkchisa sum apasipjjta” sasa.

Inglaterra markankiri Margaret kullakajj niya 80 maraniwa, jupajj Laos markanwa misionerat serviwayi. Kullakajj siwa: “Yaqha markan servisajja, kunjamsa Jehová Diosajj taqe kasta jaqenakarojj markapar irpani ukwa uñjawayta, ukaw Jupar jukʼamp confiyañatak yanaptʼawayitu. Cheqas Diosaw markapar pʼeqtʼaski, amtanakapsa phoqasiyarakini” sasa.

Jehová Diosar yaqha markan servisajja, solteranakajj Diosan markapar wal yanaptʼawayapjje, ukham lurapjjatapat wal chʼamañchtʼtanjja (Jue. 11:40). Janiw ukakïkiti, jukʼamp kullakanakaw yaqha markanakar sarasipki (Sal. 68:11, NM). Aka yatichäwin uñjawayktan uka kullakanakat yateqasisajja, ¿yatiyirinakajj munaski uka cheqanakar sarañ munarakismati? Ukhamäni ukhajja, ‘Jehová Diosajj kunja munasirisa’ ukwa uñjäta (Sal. 34:8).