Rôzi nye: “Me bé ndik ikété nduña le mam m’a ke ndigi ni bisu i bep.” Mimbe minlôñ mi Bibel mi bi hôla nye? Wada le Matéô 6:34 nu a nkal le: “Jon ni tôñ bañ inyu yani, inyule yani y’a bana yé nduña. Ndutu kel yada i nkola yokel i.” Hanano, Rôzi a nkal le bini bibañga bi Yésu bi bi hôla nye le a tôñ ha bañ inyu mam ma nke pam yani. A nkônde le: “Me bééna ndugi mandutu, i bé béda bé le me kônde mape, nduña inyu mam ma yé ngi lo, tole bebek inyu ma ma ga lo bé to.”

Yasmin a bé nôgda le nduña i bé yuu nye. “Me bé me tégbaha ngim dilo ikété sonde, me eek ndigi; ngim mau, yak hilo hi bé hi héñél me. Me bé nôgda kiki bo le nduña i yé hôñgôô me ikété, me bak yômi.” Umbe nlôñ u bi hôla nye? A nsima 1 Pétrô 5:7 nu a nkal le: “Yugyana ki [Nyambe] nduña nan yosôna inyule a ntôñ ni bé.” Yasmin a nkal le: “Kiki ngéda i bé kenek, hala nyen me bé téñbe ndik i soohe Yéhôva, ni nye a bé timbhe masoohe mem. Hala nyen, me bi nôgda wee soso mbegee a nyodi me bituu. Ñ, ngim mangéda, nduña yem i yé i témb i bet, ndi nano me nyi lelaa me boñ.”

Ngond muda yada le Izabella a nkal le: “Me me ntehe le lem i timbis mam ni mbus i yé me ikété matjél, inyule pua yem nyemede a bé nlélém. Me yé me timbis mam ma yé mahee ni mbus​—inyu boñ le me kôhna ngéda i béñge télé ni kééha moo. Ndi i lem ini, i yé ibe, inyule u nôgda le u pégi iloo héga, i mbôñha ki we béba bôlô.” Litiñ li 2 Timôtéô 2:15 li bi hôla nye, jon li nkal le: “Nyamnda yaga i téé wemede bisu bi Nyambe kiki mut a gwé mbôgi lam, kiki ngwelnson nu a gwé bé jam li wonyu.” Izabella nye: “Me nsômbôl bé me le, Yéhôva a wo nyuu ni bôlô me nsal, ndik inyule me gwé lem i timbis mam ni mbus.” A bi héñha ngandak.

Yak Kelsi a nkal le: “To ibale me bééna ngim bôlô i timbis i ntéak ngéda, me bé me bem linut li nsôk, inyu boñ yo. Hala a bé nyéiha me, me nimhak hilo, me tôñôk ki. Hala a bé bé loñge inyu yem.” Kelsi a bi léba mahôla ikété Bingéngén 13:16, nu a nkal le: “Hi mut yihe a mboñ ni yi, ndi jôñ mut i mbambal bijôñ gwé i mis ma bôt.” A ntoñol le lisoñda unu nlôñ kaat li bi niiga nye le: “Pék i mbat le u yônôs nson woñ ibabé tiñha, ni le u tjek mam ilole ngéda i nkola. Nano, me gwé kaat inyu tjek mam, me ntééda yo i ño wem nañi, i nhôla me i kôôba bibôlô me nlama boñ, i hôlga ki me i ba muda oda, ni le me boñ ha bañ gwom i linut li nsôk.”

Kirsten a ñañal le: “Nlô wem a bi tjôô me, a yék me ni bon batitigi ba-na.” Umbe nlôñ Kaat u bi hôla nye? Bingéngén 17:17 nu a nkal le: “Liwanda li ngwés ngéda yosôna; manyañ a ngwééne ikété ndutu.” Kirsten a bi tiige bagwélél ba Yéhôva bape bebee. Kii a bi sôk léba? “Mawanda mem ma bi nit me ikété ngandak manjel! Bape ba bé yék bijek ni mbônji i nwemel wem. Letee ni ngélé aa, ngandak bôt​—ntjegek kiki man ntôñ bisonda​—i bi hôla me ni bon bem i nyodi i nlômbi ndap inyu ke i ndap mondo. Wada wap a bi hôla me i léba bôlô. Mawanda mem ma bé bebee ni me, ngéda yosôna.”

Delfin, nu di mpôdôl i bibôdle, yak nye a bi jôs libak mu kiki a bé boyop. A mbigda i ngéda a bi nimis gwom gwobisôna, a nkal le: “Me bé nôgda wee niñ i yé kiki sabe, me me bé i tan, bôt bape ba bak ikété, me béñgege bo. Me bé nôgda le me yé metama.” Nlôñ Bitilna wada u u bi hôla nye, u yé Tjémbi 68:7, nu a nkal le: “Nyambe a nyis bôt ba bôyi botama ikété bôt. (tole, ndap; MN)” A ntoñol le: “Me bé yi le u nlôñ unu u mpôdôl bé ndap liyeene jomede hana dilo tjés. Ndi me bi nok le, Nyambe a nti bés ndap i pes mbuu, homa bañga nwee i yéne, i het u nla kôs bañga maada malam ni kal bôt bape i yom u nôgda i ñem, bôt ba ba ngwés Yéhôva. Me bi nok le, me bé bé le me ba bebee ni bôt bape balebo me bôk bé me kôôge Yéhôva bebee. Jon Tjémbi 37:4 a bi hôla me, a nkal le: ‘Yéhôva a bane we lingoñoo, a’ ti we mam ma nkon we ngôñ.’”

A nsôk kal le: “Me bi yimbe le, me bééna ngôñ i téñbe ni Yéhôva, bañga litéñbege. A yé liwanda li mbôk ni li nsôk. Jon, me bi tjek mam me bé le me boñ ni bôt bape, hala nyen me bi bana maada malam ni bôt ba ba ngwés mam ma mbuu. Me bi nigil i tehe loñge yak bôt bape, ni i bôñôl bo mam wengoñle bilem bilam gwotama gwon ba gwé.”

Ibabé pééna, mawanda ma ma ngwélél Nyambe, ma gwé libak li ngi yon. Mbôgi Yéhôva, yak bo, ba njôs ngim mandutu, nlélém kiki bôt bobasôna. Ndi biniigana bi Bibel bi ntinde bo i hôla bape, inoñnaga ni ngap yap. Njel pék i le, di yéñ i nya mawanda i. Ndi baa, matiñ ma Bibel ma nla ki hôla bés ikété mandutu di ta bé le di yémbél nano, kiki hihéga, ngwa kon ni njôghe?