Ikété bibôlô gwobisôna ngim bôt i i bé bé biprisi mu litén li Lôk Lévi i bé sal, yada i bé bôlô sônda i témpel. Ñane témpel nyen a bé éga bisônda bi. Man Lôk Yuda wada, ntila bikaat le Philo a nkal le: “Bon ba Lôk Lévi bahogi ba bé tat manwemel ma témpel i, bape ba tadak kété témpel i bisu bi homa mpubhaga inyu boñ le mut nye ki nye nu a gwé mahoñol mabe a jôp bañ. Bape ba bé kiiña ni témpel yosô, hi mut i yé ngéda kiki ba ntéé nye, ba bé boñ hala juu ni njamuha.”

Ntôñ bakéés bakeñi u bé le u gwélél bo. Ikété Lôk Yuda yosôna, ndik botama bon Lôk Rôma i bi ti kunde i sal kiki bisônda.

Nyimam wada nu ba nsébél le Joachim Jeremias a nkal le: “I jam Yésu a bi kal i bôt ba bi lo gwel nye, le, hiki kel, me bé yén i témpel inyu niiga, ndi ni bi gwel bé me (Matéô 26:55), li nôga loñge ibale bisônda bi, gwon bi bi lo i gwel nye.” Nyimam nu a nkônde le: “I bôt ba bi bôk ba ep i gwel Yésu ba bé bisônda bi tém- pel.” (Yôhanes 7:32, 45, 46) Mbus ngéda, bisônda bi gwon ba bi om i gwel banigil ba Yésu inyu kena bo bisu bi ntôñ bakéés bakeñi. I nene le yak bo ba bé mu nsoñgi bôt ba ba bi buñga ñôma Paul i témpel.​—Minson mi baôma 4:1-3; 5:17-27; 21:27-30.