Hégda le pua yada a nkwel ni man wé nu a gwé nwii 7. A nkal le: “Hala a yé ngandak nwii len le Nyambe a bi hek hisi ni gwom gwobisôna bi yé mu, a bi hek ki hiañgaa, sôñ, ni tjôdôt.” Mañge a nyén nwee ndék, i mbus a mbat le: “A pua, njee a bi hek Nyambe?”

Isañ a ntimbhe le: “To mut a bi hek bé Nyambe.” “A niñ i boga ni boga.” Ha ngéda i, i ndimbhe i i bi kola mañge nu. Ndi kiki a bé nañ, a bi ke ni bisu i badba mbadga i. Hala a nlédél nye i nok lelaa mut a nla niñ ibabé le a héga. A mbadba le: Ibale ngiinda i gwé bibôdle, ‘Nyambe a nlôl hee?’

Lelaa Bibel i ntimbhe i mbadga i? Nlélém kiki isañ man a timbhe mbadga i man. Môsi a bi tila: “A Yéhôva, . . . ilole dikôa di mpam, we ngi uñgus to ’isi ni nkoñ ’isi. U yé Nyambe ibôdôl yaga boga ikepam boga.” (Tjémbi 90:1b, 2) Nlélém jam won mpôdôl Yésaya a bi kal: “Baa u yé ngi yi jo? Tole u yé ngi nok jo? Ngo Yéhôva a yé Nyambe nu boga, nu a hek masuk ma ’isi”! (Yésaya 40:28) Yak kaat Yuda i nkal le Nyambe a niñ “ibôdôl yaga i boga.”—Yuda 25.

Kiki Bibel i ñunda, ñôma Paul a bi kal le Nyambe a yé “Kiñe boga.” (1 Timôtéô 1:17) Hala a nkobla le, hala a yé ntandaa ngéda le Nyambe a niñ. A ga niñ ki i boga ni boga. (Masoola 1:8) Jon, niñ i boga ni boga i nkiha ni Nu ngui yosôna.

Inyuki hala a nlet i nok? Bés ni Yéhôva di gwé bé nlélém litehge inyule niñ yés i yé kidik. I mis ma Nyambe, hikôô hi nwii hi yé kiki hilo hiada inyule a niñ i boga ni boga. (2 Pétrô 3:8) Di yoñ hihéga: Baa tandi i i niñ i ngandak yosôna 50 ma dilo, i nla nok botñem yés i niñ i i nom 70 tole 80 nwii? Hala a nlet! Ndi, Bibel i ntoñol le di yé kiki bitandi ibale ba nhégha bés ni Nhek wés. Yak mahoñol mé ma nloo mahoñol més. (Yésaya 40:22; 55:8, 9) Jon, hala a nhélés bé bés le bôt ba binam ba nla bé tibil nok libak li Nyambe.

Tolakii hala a nlet i nok le Nyambe a niñ i boga ni boga, maliga ma. Ibale mut a bi hek Nyambe, ki wee i mut nu nyen a yé Nhek. Ndi, Bibel i nkal le, Yéhôva a “bi hek mam momasôna.” (Masoola 4:11) U héya hala, di nyi le ngim ngéda, ngiinda i bé bé. (Bibôdle 1:1, 2) I bi lôl ni hee? I bé sômbla le Nhek wé a ba i niñ. A bé niñ ilole bihégél bi bi gwé yi kiki mbôkgwéé wé ni biañgel bi nhéga. (Hiôb 38:4, 7; Kôlôsé 1:15) Maliga ma yé le a bé niñ i bisu bi ngéda nyetama. A bi héga bé; to yom i bé niñ bé i bisu bi ngéda inyu hek nye.

Niñ i bôt ba binam ni ngiinda yosôna bi nkwés bés nkaa le Nyambe a niñ i boga ni boga. I Nwet a bi hek ngiinda, ni Nu a bi téé mambén inyu éga yo, a bé niñ i boga ni boga. Ndik nyetama nyen a bé le a ti hiki hégél niñ.—Hiôb 33:4.