Ngim bôt i gwé ngôñ ni ngandak ngéda inyu ôt biniigana mu maboñok map mabe. Me bé nya ntén mut i. Me bi gwééne i tison i Barcelone me néñél ki mu, Barcelone a bé tison ikeñi i yônhe iba i loñ Panya. Lihaa jem li bé niñ i libôga ba bé sébél le Somorrostro li li bé i ngwañ tuye. Somorrostro a bé yiba inyu manola ni nyuñga hibañga.

Me bé man nu mañ ikété lihaa li bon bôô. Kikii di bé yep ngandak, pua a bi ep me i sal i homa ba ntuk tennis, le me sal nyoo kiki mbada bol. Me bééna jôm li nwii, me salak jôm li ngeñ hiki kel. Jon me bi la bé ke i suklu kiki boñge ba nwii nwem. Ngéda me bi pamna 14 nwii, me bôdôl sal i sabe ba nuñle bikei me salak ni mashin.

I nwii 1975, ba bi sébél me i bôlô sônda, ba bé nyégsa bôt bobasôna i gwel nson u i Panya. Me bééna ngôñ i boñ jam li bé lémél me, jon me bi neebe i jôp i ntôñ bisônda u Panya u u bé i Melilla. Nkoñ u, u bé isi énél i Panya i Afrika Ñombok. Ha ngéda i nyen me bi sôôbe ikété hibañga ni lihiua.

I mbus me bi tjôô ntôñ u bisônda, me témb i Barcelone me bot ntôñ mintonba. Di bé nip hiki yom di bé tehe, di nuñlak gwo inyu somb hibañga. Me bi kahal ôt hibañga hikeñi ba nsébél le LSD ni hini le amphétamine, me sôôbe yaga i niñ i malal ma nyega, lihiua ni mintuk mi moni. I béba niñ ini i bi hielel me mut njôô. Me bé hiômna ngwende, nkuleñ ni kwade, me bé kon bé to woñi i gwélél gwo hiki ngéda me bé tehe hala nseñ.

Kel yada, me ni ntôñ wem u mintonba di bi nip litôa, bisônda bi bi noñ bés. I bé wengoñle sinima. I mbus jam kiki bo 30 ma kilôméta, bisônda bi kahal leñ bés ngaa. Sôk i nsôk, i nwet a bé luk litôa jés a bi tômôl jo, bés bobasôna di ke ngwéé. I ngéda pua a bi yi yom me bi boñ, a pémés me ndap.

Me bi tégbaha nwii mitan i mbégdé, me nañlak i mabebe ma mandap ma bôt, i matôa ma bôt yak i kodoo soñ. Ngim ngéda i bi pam le me niñ yak ikété hôk. Niñ yem i bééna ha bé mahee kayéle me bééna ha bé ngôñ i niñ. Me mbigda le ngeñ me bé me ôt hibañga me bé babaa nyuu yem memede. Me ngi gwé bidôndôô bi letee ni len.

Ngéda me bééna 28 nwii, m’ma yem a bi lo i yoñ me le me témb i ndap. Me bi neebe me bôn ki nye le m’a héñha, ndi i bi béda me ngim ngéda inyu yônôs mbônga wem.

Mbôgi Yéhôva iba i bi kode likôga jés i mbus kosi yada. Me legee bo, ndi pua yem a kônd me le me hoo yip likôga. Kiki me bé gwés bé mut a nti me oda, me kit le me emble bo. Ba yigle me bikaat biaa, me neebe gwo ni maséé. Me bat bo hee ndap yap base i yéne, ndék dilo i mbus me ke i ndap Ane.

Yom bisu me bi yimbe i bé le hiki mut a bé a héba loñge. Me bé maselna ni bo inyule mambot me bé me héba, ma bé bé malam, me bééna mimbôñgô mi tjôñ ni ngandak mayéé. Memede me bi nôgda le me bé bé me kôli i jôp ndap Ane, jon me bi yén i mbégdé. Kinje hélha jam i tehe Juan nu a bé ntonba kiki me a héba loñge kôdi ikété ndap Ane! Me bi sôk nok le a bi yila Mbôgi Yéhôva hala a yé nwii wada. I tehe nye i bi ti me makénd i jôp i ndap Ane ni i bôdôl ke makoda. Ha nyen me bi bôdôl boñ mahéñha.

Me bi neebe yigil Bibel, me hoo ki nok le ibale me nsômbôl lémél Nyambe, i bé béda le me nwas bisañ ni niñ i nyega malal, ndi hala a bé tomb bé. Me bi nigil ki le inyu lémél Yéhôva Nyambe, me bé lama “heñla, ni yilha mahoñol mem yondo.” (Rôma 12:2) Konangoo yé i bi lôôha tihba me. To hala kiki me bi boñ béba ngandak, me bé nôgda le a yé i ti me pôla i héñha libak jem. Mam me bé nigil inyu Yéhôva Nyambe ma bi tihba me kayéle me neebe le Nhek a yé, ni ki le a ntôñ toi me.​​—1 Pétrô 5:6, 7.

I yi hala i bi tinde me i boñ mahéñha. Kiki hihéga, mu yigil yem Bibel, ngéda me bi pam i pes i bé pôdôl siga me kal ni memede le: ‘Ibale Yéhôva Djob a gwé ngôñ le me tééda memede mapubi ikété manjel momasôna, wee me nlama waa ôt siga’! (2 Korintô 7:1) Kunda yada me leñ yo likund!

Ndi me bé nlama ki waa nuñul ni ôt hibañga. Hala a bi yoñ me ngandak ngéda ni biliya bi ngui. Me bé yi le m’a la bé pamba ibale me ngi hiômôk ni minnlômbi nwem mi mawanda. Libak jap i pañ yem li bé bé le li hôla me i hol i pes mbuu. Mu kii ngéda i bé tagbe me bi kahal bôdôl Nyambe ñem yak mawanda mem ma mondo ma likoda. I gwéha ni nduña ba bi unda me, me bé ngi nôgda hala i niñ yem. I mbus ngandak sôñ, me bi sôk nwas hibañga, me “haba ki mut yondo,” hala a bi hôla me i bana maada malam ni Djob. (Efésô 4:​24) I sôñ Hikañ 1985, me bi sôblana, me yila Mbôgi Yéhôva.

Bibel i bi lémés niñ yem. I bi hôla me i nwas mam ma nyega ma bé ôbôs me nyuu, ma hééga ki me lipém jem. I pot maliga, iloo 30 ma mawanda mem ma behee ma bi wo SIDA tole makon mape ma nlôl i hibañga ba bak boñge ba wanda. Me nti Yéhôva mayéga inyule matiñ ma Bibel ma bi sôñ me le me boma bañ minlélém mi mandutu.

Me bé hiômna ha bé mangwende ni minkuleñ me bé hiômna ngéda me bé mañge wanda, gwom bi behee bi. Maselna ni hala, me bé hégda bé le kel yada m’a begee Bibel inyu hôla bôt bape. Nano me ni nwaa nwem di nsal kiki basañal ba ngéda yosôna.

Bagwal bem ba bi yila bé Mbôgi Yéhôva, ndi ba bé maséé i tehe kiki Bibel i bi hôla me i héñha. I maliga, Pua yem a bi sôñ Mbôgi Yéhôva i bisu bi basolôñ bé ba bôlô. A bi sôk tehe le hémle yem i mondo i bi hôla me i boñ mahéñha malam i niñ yem. M’ma yem a bé béna kal le me bé lama nigil Bibel behee. Memede me yimbe le maliga ma!

Niñ yem i behee i ñéba me le nseñ u ta bé i noode bana maséé ni njel hibañga tole ni mam mabe mape. Nano me gwé bañga maséé i ngéda me niiga bôt Bibel​—l binigana bi gwon bi bi sôñ niñ yem.