Ido, nang pe dang bukku ilmu pengetahuan Bibel, alai sittong do hatorangan na adong di Bibel taringot ilmu pengetahuan. Adong do piga-piga contoh na patuduhon sadalan do ilmu pengetahuan tu isi ni Bibel. Jala dang sarupa hatorangan taringot ilmu pengetahuan na disurat di Bibel tu pandapot ni godang halak tikki disuratton Bibel i.

•   Adong do asal mula ni alam semesta on. (1 Musa 1:1) Alai, godang do dongeng na mandok dang adong na manoppa alam semesta on. Didok dongeng i do sursar do mulana alam semesta on, alai ujungna gabe taratur sandiri ma i. Asing ni i, didok halak Babel najolo do alam semesta on ditubuhon akka dewa na sian dua samudra. Adong do muse dongeng na mandok alam semesta on kaluar sian sada tolor na balga.

•   Dang perasaan ni akka dewa na mangatur alam semesta on. Adong do hukum alam na mangatur alam semesta on ganup ari. (Job 38:33; Jeremia 33:25) Alai godang do akka dongeng di liat portibi on na mangajarhon, akka na masa tu jolma mangihutton perasaan ni akka dewa na muba-uba do dohot mangihutton pambahenan ni nasida na kejam.

•   Digattukkon do tano on di na soada. (Job 26:7) Alai najolo godang do halak na porsea datar do bentuk ni tano on. Jala didok nasida dituhuk raksasa manang binatang na balga do tano on songon horbo manang kura-kura.

•   Sian proses siklus air do terbentuk sunge dohot mata mual. Menguap ma aek sian samudra dohot sian laut, dung i turun ma i tu tano on gabe udan, salju, manang udan es. Laos i ma na gabe sunge dohot mata mual i. (Job 36:27, 28; Parjamita 1:7; Jesaya 55:10; Amos 9:6) Alai halak Junani najolo mandok, adong do samudra di toru ni tano on jala laos sian i do kaluar aek ni sunge. Dihaporseai nasida do on sahat tu abad 18.

•   Mullop jala lonong do akka dolok. Jala akka dolok na taida saonari on pe, nungnga adong hian di dasar ni samudra. (Psalmen 104:​6, 8) Alai adong do akka dongeng na mandok, langsung do akka dewa manoppa akka dolok songon bentukna saonari.

•   Ikkon ias do asa sehat. Di Patik na dilean Debata tu halak Israel adong do aturan na mandok, ikkon disussi nasida do pakkean ni nasida dung manjama bakke. Jala molo adong halak na sahitna boi bali tu na asing, ikkon dipapulik do ibana. Asing ni i, dang boi asal dibolokkon nasida kotoran ni nasida. (3 Musa 11:28; 13:​1-5; 5 Musa 23:13) Alai di tikki i, dicampur halak Mesir do kotoran ni jolma tu obat na lao didaisson molo adong lukka.

 Dang adong. Molo manat dipareso isi ni Bibel, sadalan do sudena i tu ilmu pengetahuan. On ma piga-piga contoh isi ni Bibel na didok halak dang sadalan tu ilmu pengetahuan:

 Na didok halak: Didok Bibel onom ari do lelengna Debata manoppa alam semesta on. Lapatanna onom hali 24 jam.

 Na sittong: Dang dipaboa di Bibel nandigan do pastina ditoppa Debata alam semesta on. (1 Musa 1:1) Asing ni i, dang dipaboa sadia leleng hata ari na didok di bukku 1 Musa bindu 1. Gariada didok Bibel, di bagasan sadari do ditoppa Debata langit dohot tano on.​—1 Musa 2:4.

 Na didok halak: Didok di Bibel nungnga jolo ditoppa Debata suan-suanan baru pe ditoppa mataniari. Hape porlu do adong mataniari asa boi adong proses fotosintesis.​—1 Musa 1:​11, 16.

 Na sittong: Nungnga adong mataniari sebelum ditoppa suan-suanan. Alana Bibel mandok, leleng andorang so ditoppa Debata manang aha di tano on, nungnga ditoppa Debata “langit”, termasuk do disi mataniari. (1 Musa 1:1) Masuk ma otik cahaya ni mataniari tu tano on di “ari” na parjolo. Dung lam tiur langit di “ari” na patoluhon, lam godang ma cahaya na masuk tu tano on. Gabe boi ma adong proses fotosintesis na dihaporluhon suan-suanan. (1 Musa 1:​3-5, 12, 13) Dukkon i pe baru lam takkas tarida mataniari sian tano on.​—1 Musa 1:​16.

 Na didok halak: Didok Bibel mataniari do na makkaliangi tano on.

 Na sittong: Parjamita 1:5 mandok, “Bissar ma mataniari jala bonom ma i. Dung i hatop ma ibana mulak tu ingananna lao bissar muse.” Alai na didok di ayat on, holan naeng patuduhon pardalanan ni mataniari na taida sian tano on. Gariada nang pe nga taboto tano on do na makkaliangi mataniari, alai jotjot dope tadok “mataniari bissar” dohot “mataniari bonom”.

 Na didok halak: Bibel mandok datar do bentuk ni tano on.

 Na sittong: Hata “ujung ni tano on” na disurat di Bibel, dang na lapatanna adong ujung ni tano on manang datar bentuk ni tano on. (Ulaon ni Apostel 1:8) Asing ni i, hata “opat suhi ni tano on” na disurat di Bibel lapatanna saluhut tano on do. Sarupa do lapatan ni i tu hata opat arah mata angin na jotjot didokkon halak.​—Pangungkapon 7:1.

 Na didok halak: Didok Bibel keliling ni sada lingkaran i ma diameter hali tolu. Hape na sasittongna diameter dihali pi (π), manang diameter dihali 3,1416.

 Na sittong: Disurat di 1 Raja-Raja 7:​23 dohot di 2 Kronika 4:2, diameter ni “Laut Tombaga” 10 asta do jala 30 asta do kelilingna. Olo do ra angka pembulatan ukuran na didok disi. Manang olo do ra diameter na didok disi diameter luarna do, hape keliling na didok disi keliling bagian dalamna.