Si Mikhael na didok piga-piga agama gabe “Santo Mikhael”, i ma goar ni Jesus andorang so ro ibana tu tano on jala dukkon nakkok ibana tu surgo. a Hea do si Mikhael marbada dohot Sibolis dukkon mate si Musa. Hea do muse si Mikhael on mangurupi sada suru-suruan na pasahatton hata ni Debata tu si Daniel. (Daniel 10:13, 21; Judas 9) Lapatan ni goar Mikhael, i ma “Ise na Songon Debata?” Cocok do goar on tu si Mikhael ala dibela ibana do pamarettaon ni Debata jala dialo ibana do akka musuna.​—Daniel 12:1; Pangungkapon 12:7.

 Parrohahon ma aha do alasanna boasa boi tadok Jesus i si Mikhael, pamimpin ni suru-suruan.

•   Si Mikhael “pamimpin” ni suru-suruan i do na mangalehon paretta tu akka suru-suruan. (Judas 9) Gelar pamimpin ni suru-suruan on disurat dalam bentuk tunggal. On patuduhon, holan sada do suru-suruan na mamakke gelar i. Holan dua hali do gelar on dibahen di Bibel. Sada sian ayat i mandok, tikki turun tuan Jesus sian surgo mardongan suara na gogo do ibana jala songon suara ni pamimpin suru-suruan do suarana. (1 Tessalonik 4:16) Didok di ayat i, suara ni Jesus songon suara ni pamimpin ni suru-suruan. Cocok do i, alana ibana do si Mikhael pamimpin ni suru-suruan i. Didok do muse di Bibel, hea do si Mikhael marporang dohot suru-suruanna mangalo naga i, i ma Sibolis. (Pangungkapon 12:7) Balga do huaso ni si Mikhael di surgo, ai didok do ibana sada sian akka pamimpin na timbo pangkatna jala pamimpin na sangap. (Daniel 10:13, 21; 12:1) Jadi akka gelar i patuduhon, molo si Mikhael i ma pamimpin ni akka suru-suruan na di surgo. Songon i do na didok ni si David E. Aune sahalak pakar ni Bibel.

   Asing ni si Mikhael, adong do muse dipaboa di Bibel na marhuaso tu akka suru-suruan. Bibel mandok, ‘Na lao ro ma Tuan Jesus sian surgo rap dohot akka suru-suruanna na gogo i di bagasan api na marsigorgor.’ Laos di tikki i, hukumonna ma akka halak. (2 Tessalonik 1:7, 8; Mateus 16:2) Asing ni i, didok do muse tikki nakkok Jesus tu surgo, “dipatunduk ibana ma akka suru-suruan dohot akka parhuaso”. (1 Petrus 3:21, 22) Jadi molo Jesus nungnga dipillit Debata gabe pamimpin ni suru-suruan, dang mungkin be dipillit muse si Mikhael gabe pamimpin ni suru-suruan. Alana Jesus do tong si Mikhael i.

•   Na lao “ro ma” si Mikhael di tikki “masa hasusaan”. (Daniel 12:1) Di bukku Daniel hata asli na diterjemahon tu hata “ro”, jotjot do dipakke lao paboahon sahalak raja na lao ro mangulahon sada tugas na penting. (Daniel 11:2-4, 21) Jesus Kristus na digoari “Hata ni Debata”, ibana do na tarpillit gabe “Raja ni akka raja”. Disuru do ibana lao pamatehon sude musu ni Debata jala manjaga akka naposona. (Pangungkapon 19:11-​16) Na lao diulahon ibana ma i di tikki hasusaan bolon “na so hea dope masa sian mulai adong portibi on sahat tu saonari”.​—Mateus 24:21, 42.