Godang do halak na sukkun-sukkun rohana taringot aha do tujuan ni ngolutta on. Contohna, Boasa ma adong hita? Aha do tujuanta mangolu? Didok do di Bibel, molo tujuanta mangolu i ma, asa marale-ale dohot Debata. Taulas ma piga-piga alasanna na dipaboa di Bibel.

•   Debata do na manoppa hita. Didok Bibel, “[Debata] do na manoppa hita, jala Ibana do nappuna hita.”​—Psalmen 100:3; Pangungkapon 4:11.

•   Adong do tujuan ni Debata manoppa saluhut toppaanna, termasuk ma hita.​—Jesaya 45:18.

•   Mulai sian ditoppa jolma, nungnga diboto jolma i na ikkon ‘marale-ale nasida tu Debata’. Alani i ma, sai naeng talului do aha tujuan ni ngolutta. (Mateus 5:3) Jala lomo do roha ni Debata, asa boi hita marale-ale tu Ibana.​—Psalmen 145:16.

•   Molo tatanda Debata, boi ma hita marale-ale tu Ibana. Piga-piga halak mandok, dang mungkin boi jolma marale-ale tu Debata. Alai Bibel mandok, “Pajonok hamu ma tu Debata, dung i pajonokonna ma tu hamu.”​—Jakobus 4:8; 2:23.

•   Asa boi hita gabe ale-ale ni Debata, ikkon taoloi do lomo ni rohana. Dipaboa do di Parjamita 12:13 aha lomo ni rohana. Didok di ayat i, “Habiari ma Debata na sittong jala oloi ma parettana. Ai on do na ikkon ulahonon ni sude jolma.”

•   Di ari na naeng ro do boi saut sude lomo ni roha ni Debata. Di tikki i, dang adong be hasusaan jala lehononna ma tu ale-alena dohot tu na manomba Ibana hangoluan na saleleng ni lelengna.​—Psalmen 37:10, 11.