TU AKKA NA POSO
10: Boi Dihaporseai
LAPATANNA
Molo boi do hamu dihaporseai boi ma hamu diandalhon natua-tuamuna, donganmuna dohot bosmuna. Halak na boi dihaporseai diihutton do aturan, ditepati janjina jala jujur.
BOASA PENTING ON
Biasana molo lam porsea halak tu hamu, lam pos ma rohana tu hamu tikki mangulahon manang aha pe hamu.
“Molo lomo rohamuna porsea natua-tuamuna tu hamu, buktihon ma molo hamu halak na dewasa jala martanggung jawab nang pe tikki dang rap dohot nasida. On ma cara na dumenggan.”—Si Sarahi.
NA DIDOK BIBEL: “Pareso hamu dirimuna.”—2 Korint 13:5.
NA BOI DIULAHON HAMU
Molo lomo rohamuna asa porsea halak tu hamu manang lomo rohamuna asa porsea muse nasida tu hamu, ulahon ma on.
Toktong ma jujur. Molo margabus hamu, gabe dang porsea be halak tu hamu. Alai molo jujur do hamu jala olo paboahon na di rohamuna tarlumobi diakkui hamu hasalaanmuna, gabe porsea ma halak tu hamu.
“Molo dang adong na sala na diulahon hamu, pasti mura do jujur. Alai molo adong na sala diulahon hamu, pasti maol do lao jujur. Molo adong kesalahan na dibahen hamu alai olo hamu mangakkui kesalahanmuna i, gabe lam porsea ma halak tu hamu.”—Si Caiman.
NA DIDOK BIBEL: “Lomo do rohanami asa jujur di saluhutna.”—Heber 13:18.
Boi diandalhon. Tikki dibahen survei di Amerika adong 78 persen pegawai personalia mandok, “sada sian tolu sifat na dilului perusahaan tikki mamillit pegawai”, i ma sifat boi diandalhon. Jadi molo sian saonari hamu boi diandalhon, hilalaonmuna ma annon manfaatna sahat tu na magodang hamu.
“Molo martanggung jawab do au jala huulahon tugashu dang pola ikkon jolo disuru, diparrohahon natua-tuakku do i. Molo lam jotjot hubahen songon i lam porsea ma nasida tu au.”—Si Sarah.
NA DIDOK BIBEL: “Pos do rohakku oloanmu pangidoakki. . . . Ai huboto do bahenonmu lobi sian na hupangido i.”—Pilemon 21.
Sabar ma. Molo lam magodang sasahalak boi do takkas diida halak. Alai molo lam dewasa cara marpikkir ni sasahalak dang boi pittor diida halak i.
“Asa porsea natua-tua dohot halak na asing tu hita, ikkon berupaya do hita jala porlu do tikki mangulahon i. Dang cukkup holan sahali i taulahon, alai ikkon marulak-ulak do.”—Si Brandon.
NA DIDOK BIBEL: “Patuduhon hamu ma . . . sabar.”—Kolosse 3:12.
