Nunga taulas be alus ni sungkun-sungkun ‘Ise do Debata i?’ Sian Bibel nunga taboto goarna Jahowa, jala parangena na umbalga, i ma holong. Nunga taboto angka aha do naung diulahon Ibana, jala aha do na laho bahenonna tu jolma. Godang muse na boi taboto taringot Debata. Alai aha ma laba ni i tu hita?

Didok do di Bibel, “Molo dilului ho [Jahowa], sai jumpang ho do Ibana.” (1 Kronika 28:9) Rimangi ma molo taparsiajari parange ni Debata, jala tatanda Ibana, dapotta ma sada hadiah na ummarga, i ma gabe “aleale ni Jahowa”! (Psalmen 25:14, Bibel siganup ari) Aha do laba ni i tu hamu?

Tongtong marlas ni roha. Didok do di Bibel, molo Jahowa i “Debata na marlas ni roha”. (1 Timoteus 1:11) Molo solhot hita tu Ibana jala tatiru Ibana, gabe las ma rohanta. Jala godang do laba ni i tu rohanta, pingkiranta, dohot pamatangta. (Psalmen 33:12) Parohon las ni roha do molo taihuthon poda ni Debata taringot pasidingkon ulaon na parohon jea, manjaga kesehatan, jala mardame tu na asing. Gabe taantusi ma na didok panurat psalmen, “Untungku do hasolhoton tu Debata.”​—Psalmen 73:28.

Diparrohahon Debata ma hita. Marjanji do Jahowa tu angka naposona, “Huiringiring pe ho dohot pamereng ni matangku.” (Psalmen 32:8) Lapatanna, diparrohahon Jahowa do angka naposona ganup marsada-sada. Jala sai lehononna do angka na dihaporluhon nasida. (Psalmen 139:1, 2) Dung marale-ale hamu tu Jahowa, dihilala hamu ma sai dongananna do hamu.

Dapotta ma pangkirimon. Asa tamba las ni rohanta saonari, dilehon Jahowa do muse pangkirimon di ari na naeng ro. (Jesaya 48:17, 18) Didok do di Bibel, “On do hangoluan na saleleng ni lelengna, ingkon tandaon ni nasida do Ho Debata na Sasada i, na sintong i dohot Jesus Kristus na sinurum.” (Johannes 17:3) Di tingki na susa saonari on, pangkirimon on do na boi mangurupi hita asa ‘togu jala marpos ni roha’.​—Heber 6:19.

Godang nai dope alasanna boasa mansai denggan molo mananda Debata jala marale-ale tu Ibana. Boi do disungkun hamu sahalak Sitindangi Ni Jahowa taringot i. Manang laho mangalului gumodang hatorangan, ida ma situs jw.org/bbc.