SIULASON NI MAJALAH ON | ANGKA ISE NA MARINGANAN DI SURGO
Sungkunsungkun taringot Ise na Maringanan di Surgo
Hea do hamu mamingkirhon taringot surgo dohot ise na maringanan disi? Molo hea, ndang holan hamu na hea songon i. Saleleng marribu taon, godang do halak na manungkun taringot i. Adong na porsea molo surgo i diingani angka ompunta na sangap. Adong muse na mandok, surgo i inganan na dame, na diingani surusuruan dohot angka halak na burju naung mate. Adong muse na mandok, surgo inganan ni angka dewa.
Godang do halak na marsalisi taringot surgo, ala didok nasida ndang adong na hea tuat sian i laho paboahon hatorangan tu hita. Alai, sala do pangantusion sisongon i. Andorang so ro tu tano on, Jesus Kristus marharoroan sian banua ginjang, na tadok surgo. Didok ibana tu angka pemimpin ni agama di abad na parjolo, ”Ndada tuat Ahu sian banua ginjang mambahen roharohangku; na pinangido ni roha ni na marsuru Ahu, i do.” Tangkas do dipaboa Jesus tu angka apostelna, ”Torop do inganan di bagas ni Damang.”—Johannes 6:38; 14:2.
Ama ni Jesus, i ma Debata na margoar Jahowa, jala ”bagas” ni Jahowa adong di surgo. (Psalmen 83:19) Alani i, holan Debata Jahowa dohot Jesus Kristus do na boi tangkas patorangkon taringot surgo. Nasida mangalehon hatorangan taringot surgo marhite parnidaan na dipatudu tu angka halak na marsihohot.
Artikel na mangihut mangulas hatorangan sian Bibel na patorangkon parnidaan na diida pigapiga baoa. Huhut tarimangi parnidaan on, ingot ma surgo ndang sada inganan na boi taida manang taingani. Alani i, Debata patorangkon taringot surgo marhite cara na mura antusan. Parnidaan on mangurupi hamu mangantusi ise na mangingani ’torop inganan’ di surgo.
