Dang parsidohot nasida tu Punguan Zionis. Saksi Jahowa i ma halak Kristen na haporseaonna marojahan tu Bibel. Nang pe adong agama na mandok nungnga disurirangkon di Bibel taringot haroro ni halak Jahudi tu Palestina, dang sapandapot Sitindang Ni Jahowa disi. Dang porsea nasida naung disurirangkon Bibel hian taringot i. Jala dang hea disurat di Bibel adong pamarettaon manang houm manang bangso na umtimbo martimbakkon na asing. Majalah Saksi Jahowa i ma Joujou Paboahon takkas mandok, “Dang adong ayat di Bibel na patuduhon sittong ulaon politik ni Zionis.”

 Encyclopædia Britannica patorakkon punguan Zionis i ma “gerakan nasionalis Jahudi na lao mambahen jala mangurupi pamarettaon ni Jahudi di Palestina”. Marojahan tu agama dohot tu politik do punguan on. Alani i, dang hea Saksi Jahowa mangurupi punguan Zionis jala marsitutu do nasida asa toktong netral.

 Organisasi agama do Saksi Jahowa jala dang parsidohot tu ulaon politik na dia pe, tu punguan Zionis pe dang. Nungnga takkas taboto saleleng on na netral Saksi Jahowa di politik. Di piga-piga negara, disiksa do Saksi Jahowa ala so olo dohot tu ulaon politik. Pos do rohanami, holan Harajaon ni Debata do na tolap mambahen hadameon di tano on salelengna. Dang adong pamarettaon ni jolma na tolap mangulahon i.

 Sada sian ajaran ni Saksi Jahowa, i ma unduk tu uhum na binahen ni pamaretta manang didia pe nasida tading. Dang olo nasida mangalo pamaretta manang parsidohot marporang.