Di provinsi Tabasco di Meksiko, godang do halak na bunu diri. Alani i, taon 2017 dibahen Saksi Jahowa ma kampanye mambagihon Sedarlah! April 2014. Judul majalah i, i ma “Buat Apa Hidup?​—Tiga Alasan untuk Terus Hidup”. Godang do halak na las rohana tu kampanye on.

Adong sahalak ina, na depresi anakna na marumur 22 taon. Nungnga hea piga-piga hali anakna i naeng bunu diri. Dang diboto inang i be mangurupi anakna i. Alai ro ma sahalak Saksi goarna si Faustino, dilehon ibana ma majalah Sedarlah! i. Didok inang i ma, “Pas do on tu anakku bah.” Marsogotna i, ro ma si Faustino manjuppangi anakna i. Diulas nasida ma poda sian Bibel na adong di majalah i. Dung piga-piga hali dikunjungi, gabe dang pala depresi be anakna i. Didok si Faustino, “Tarida do nungnga las be rohana saonari.” Asing ni i, dipaboa anakna i do muse na diparsiajari ibana tu anggina, alana tong do depresi anggina i.

Adong sahalak Saksi na tading di Huimanguillo, goarna si Karla. Dipakke ibana do majalah on lao mangurupi dongan sakalasna. Didok si Karla, “Adong dongan sakalashu, umurna 14 taon. Sai murhing do bohina. Mangkata-hatai ma hami. Dung i dipaboa ibana ma, na sursar do keluargana saonari. Tikki makkata-hatai hami, hubereng adong luka di tangan kirina.” Hape saleleng on, na jotjot do donganna i maneat tangan dohot patna. Alana jut rohana mangida dirina sandiri, jala hira na so mararga do ngoluna. Dilehon si Karla ma majalah Sedarlah! i. Dung dijaha donganna i, didok ma tu si Karla, “Hira na memang tu au do majalah on dibahen.” Saonari dang murhing be bohina, jala didok ibana lam martujuan do ngoluna.

Di kota Villahermosa adong sahalak bawa na mandele. Dang adong be karejona, jala ditadikkon istrina ma ibana dohot akka gellengna. Sai martangiang do ibana, alai tong dope mandele. Di sada tikki, naeng bunu diri ma ibana. Alai ro ma dua halak Saksi tu jabuna. Goar ni nasida, si Martin dohot si Miguel. Dilehon nasida ma tu bawa i majalah Sedarlah! i. Tikki dijaha bawa i judul ni majalah i, dihilala ibana, i do alus ni tangiangna. Dung i, dijahahon si Martin dohot si Miguel ma ayat sian Bibel, asa tarapul rohana. Dung piga-piga ari, ro ma muse nasida. Diida nasida dang pola mandele be bawa i. Saonari, dua hali saminggu ma bawa i marsiajar Bibel.

Tikki kampanye i pe, lao do akka Saksi tu piga-piga penjara di Tabasco. Dipaboa akka Saksi ma poda sian Bibel, lao mangurupi na dipenjara i asa lam martujuan ngolu ni nasida. Dipatudu nasida ma akka video, dibahen ma jamita sian Bibel, jala diulas nasida ma majalah Sedarlah! i. Las do roha ni halak na di penjara i dohot panjagana ala ro Saksi. Umpamana, adong do sahalak na dipenjarahon disi mandok, “Nungnga tolu hali au naeng bunu diri. Sai didok halak do, na disarihon Debata do au. Hape dang adong bukti sian Bibel dipatudu nasida. Alai saonari gabe pos do rohakku, ala nungnga dipatorangmuna be sian Bibel.”

Godang do na lomo rohana tu kampanye on. Umpamana, adong sahalak pejabat na mamuji Saksi Jahowa, alana ulaon on mangurupi akka halak. Jala adong do sada koran na paboahon taringot kampanye on. Dibahen ma judulna disi, “Nasida Mangurupi Akka Halak asa Unang Bunu Diri”.