Fluwa nɲɔn su nga Pɔlu klɛli Korɛntifuɛ mun’n 4:1-18
4 I sɔ’n ti’n, kɛ mɔ Ɲanmiɛn sili e aunnvɔɛ m’ɔ fali junman sɔ’n wlali e sa nun’n ti’n, e sa sin bubuman e.
2 E wlali ɲannzuɛn sa mɔ be yo be nvialiɛ nun’n be ase. Yɛ e nantiman gblɛ nun, kpɛkun e kpɛman Ɲanmiɛn ndɛ’n i wun.+ Sanngɛ e kan ndɛ nanwlɛ’n i weinwein naan é klé sran’m be kwlaa be ajalɛ kpa Ɲanmiɛn ɲrun.+
3 Sɛ jasin fɛ nga e bo’n te o bui bo’n, nn be nga be su mlin’n be ɲrun yɛ ɔ te o bui bo-ɔ.
4 Afin mɛn* nga i ɲanmiɛn’n+ sili sran sɔ mɔ be lafiman Ɲanmiɛn su’n be ɲin,+ naan b’a kwlá wunman Klisi m’ɔ yi wafa nga Ɲanmiɛn ti’n i nglo’n+ i jasin fɛ m’ɔ ti kɛ kannin sa’n i kpajalɛ’n.+
5 Afin kɛ é bó jasin’n, e kanman e bɔbɔ e ndɛ. Sanngɛ e kan Zezi Klisi i ndɛ e se kɛ ɔ ti e Min. Yɛ e kan kɛ Zezi ti’n, e ti amun kanga.
6 Afin Ɲanmiɛn bɔbɔ seli kɛ: “Maan kannin’n kpaja aosin’n nun.”+ Kpɛkun ɔ yoli maan kannin’n kpajali e awlɛn’n nun,+ naan Klisi i ɲrun’n ti’n be kwla si Ɲanmiɛn ndɛ m’ɔ yo ɲɛnmɛn’n.
7 Kannzɛ e ti kɛ sɛ mɔ fa yɛ be fa wuli’n sa’n,+ sanngɛ like kpa o e nun.+ Ɔ maan ɔ ti weiin kɛ wunmiɛn ng’ɔ o e nun m’ɔ tra klɔ sran liɛ’n, ɔ fin Ɲanmiɛn, ɔ finman e bɔbɔ.+
8 Be mian e kplɔlɔlɔ, sanngɛ nán kɛ e kwlá kanman e wun-ɔn. E akunndan’n sanngan, sanngɛ e kwla fite nun.*+
9 Be kle e ɲrɛnnɛn, sanngɛ Ɲanmiɛn yiman e ase.+ Be tɛ e ase, sanngɛ e wuman.+
10 Cɛn kwlaa e wun ɲrɛnnɛn, yɛ e nguan’n wo wie nuan kɛ Zezi liɛ’n sa.+ Ɔ maan sran’m be wun kɛ sa nga be tɔli Zezi su’n, be tɔ e su wie.
11 Afin e mɔ e o nguan nun’n, Zezi ti’n e nguan’n wo wie nuan+ titi, kɛ ɔ ko yo naan e wunnɛn m’ɔ ti wie’n i liɛ’n w’a wun ɲrɛnnɛn kunngba nga Zezi wunnin i’n ti.
12 Ɔ maan e liɛ’n, e nguan’n wo wie nuan titi, sanngɛ i sɔ’n yó maan amún ɲán nguan.
13 Ndɛ nga be klɛli’n yɛ: “N lafili Ɲanmiɛn su, i ti yɛ n ijɔli-ɔ.”+ E kusu e kle kɛ e lafi Ɲanmiɛn su sɔ’n wie, i ti yɛ e ijɔ-ɔ.
14 Afin e si kɛ Ɲanmiɛn m’ɔ cɛnnin Zezi’n, ɔ́ cɛ́n e kɛ ng’ɔ fa cɛnnin Zezi’n sa, kpɛkun ɔ́ fá e nin amun kɔ́ i wun lɔ.+
15 Amun ti yɛ e yo ninnge kwlaa sɔ mun-ɔn, kɛ ɔ ko yo naan Ɲanmiɛn i aklunye’n w’a yo dan w’a ɔ i ɲrun’n ti. Afin kɛ sran kpanngban be la Ɲanmiɛn ase’n, i sɔ’n yo maan Ɲanmiɛn ɲan ɲrun.+
16 I sɔ’n ti’n, e sa sin bubuman e. Kannzɛ bɔbɔ e wunnɛn’n saci’n, sanngɛ kɛ aliɛ cɛ́n m’ɔ́ sán’n, nn wafa nga e ti e klun lɔ’n, ɔ́ yó uflɛ.
17 Afin kannzɛ ɲrɛnnɛn nga e wun i andɛ’n ɔ su cɛman yɛ ɔ ti kaan sa’n, sanngɛ ɔ́ yó maan aɲrunɲan nga é ɲɛ́n i’n, ɔ́ yó dan* kɔ́ i ɲrun titi, yɛ ɔ su wieman le.+
18 I sɔ’n ti’n, e faman e ɲin e sieman ninnge nga e wun be’n be su, sanngɛ e fa e ɲin e sie ninnge nga e wunman be’n+ be su. Afin ninnge nga e wun be’n be cɛman. Sanngɛ ninnge nga e wunman be’n bé ká lɛ tititi.
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Be kwla se ekun kɛ “e liɛ w’a wieman mlɔnmlɔn.”
^ Glk., “nɔnnin.”
