LIKE SUANLƐ 56
Maan a nin asɔnun’n nunfuɛ mun be nuan sɛ
Kɛ e nin e niaan mun e o likawlɛ’n, e wun yo e kɛ Famiɛn Davidi liɛ’n sa. Ɔ seli kɛ: “Kɛ aniaan’m be tran likawlɛ mɔ be bo ti kun’n, i sɔ’n ti kpa dan, yɛ ɔ yo ɲɛnmɛn!” (Jue Mun 133:1) Nán ngbɛn ti yɛ e bo ti kun-ɔn. E tinuntinun yɛ e mian e ɲin naan e bo w’a kwla yo kun sɔ-ɔ.
1. ?Ngue yɛ sran’m be sie i nzɔliɛ Ɲanmiɛn i sufuɛ’m be lika-ɔ?
Sɛ a tran e aɲia’m be nun kun bo nvle uflɛ nun’n, atrɛkpa’n a su timan aniɛn nga be kan’n. Sanngɛ ɔ wun kpája wɔ. ?Ngue ti-ɔ? Afin fluwa kunngba mun yɛ e fa suan Biblu’n nun like mɛn wunmuan’n nun-ɔn. Asa’n e klo e wiengu. Kan kwlaa nga e tran’n, e kwlakwla ‘e bo Zoova i dunman, yɛ e bo yo kun e su i.’—Sofonin 3:9, ndɛ ng’ɔ o ja ngua lɔ’n.
2. ?Ngue yɛ a kwla yo naan anuansɛ w’a tran asɔnun’n nun-ɔn?
Biblu’n se kɛ: “Nán an klo amun wiengu amun nuan bui su.” (1 Piɛli 1:22) ?Wafa sɛ yɛ a kwla nanti ndɛ sɔ’n su-ɔ? Nán fa ɔ ɲin sie i fɔ m’ɔ o aniaan’m be nun’n su. Fa ɔ ɲin sie i be nzuɛn kpa’n su. Nán tra be nga a nin be ti kun’n be ngunmin be janvuɛ. Sanngɛ fa ɔ wun mantan be nga amun ninnge yolɛ wafa’n timan kun’n, naan w’a si be kpa. Asa’n, sɛ a ti sran m’ɔ kpli di i wiengu’m be jɔlɛ’n, mian ɔ ɲin naan yaci i sɔ yolɛ.—Kanngan 1 Piɛli 2:17 nun. a
3. ?Sɛ ndɛ tɔ a nin aniaan wie amun afiɛn’n ngue yɛ á yó-ɔ?
Kannzɛ e bo ti kun’n sanngɛ fɔ o e nun. Ɔ maan ɔ ju wie’n e tiatia e wiengu ja su. I sɔ’n ti’n, Biblu’n se e kɛ ‘e yaci sa nga be yoli e’n e cɛ.’ Ɔ kan gua su kɛ: “Wafa kunngba nga Zoova yacili sa nga amun yoli i’n cɛli amun klun ufue’n su’n, amun kusu amun yo sɔ wie.” (Kanngan Kolɔsufuɛ Mun 3:13 nun.) E fɔn Zoova wun kpɛ sunman. Sanngɛ ɔ yaci e wun sa’n cɛ e titi. Ɔ maan Zoova kunndɛ kɛ e yaci e niaan mun be wun sa’n e cɛ be wie. Sɛ a sie i nzɔliɛ kɛ ɔ wun ndɛ o ɔ niaan wie klun’n, ko wun i wun naan amun siesie amun afiɛn.—Kanngan Matie 5:23, 24 nun. b
SI NDƐ’N NUN KPA EKUN
É wá kán like nga a kwla yo naan anuansɛ nin bo kun yolɛ w’a tran asɔnun’n nun’n i ndɛ.
?Ngue yɛ á yó naan a nin ɔ wiengu mun amun afiɛn w’a mantan-ɔn?
4. Nán kpli di sran jɔlɛ
E kunndɛ kɛ é kló e niaan’m be kwlaa, sanngɛ ɔ ju wie’n, kɛ ɔ ko yo naan e nin aniaan wie mɔ e ninnge yolɛ wafa’n timan kun’n e nuan sɛ’n ɔ kwla yo kekle. ?Ngue yɛ ɔ kwla uka e-ɔ? An kanngan Sa Nga Be Yoli’n 10:34, 35 nun, i sin’n an koko kosan yɛ’m be su yalɛ:
-
Zoova kpaman sran nun. ?Wafa sɛ yɛ e kwla niɛn i liɛ’n su-ɔ?
-
?Amun asa’n su lɔ’n, sran wafa benin mun yɛ sran’m be buman be wun akunndan kpa-ɔ? ?Yɛ ngue ti yɛ ɔ fata kɛ a kpalo akunndan sɔ’n niɔn?
An kanngan 2 Korɛntifuɛ Mun 6:11-13 nun, i sin’n an koko kosan yɛ’n i su yalɛ:
-
?Kɛ a niɛn i sa’n, ngue yɛ a kwla yo naan a nin aniaan nga amun timan kun’n amun afiɛn w’a mantan kpa-ɔ?
5. Yaci sa cɛ yɛ maan a nin aniaan mun amun siesie amun afiɛn
Kannzɛ Zoova yoman sa tɛ le’n, sanngɛ ɔ yaci e sa tɛ liɛ mun cɛ e. An kanngan Jue Mun 86:5 nun, i sin’n an koko kosan yɛ’m be su yalɛ:
-
?Sa yaci cɛlɛ nun’n, ngue yɛ Biblu’n nun ndɛ mma nga kle e Zoova su-ɔ?
-
?Kɛ Zoova yaci e sa tɛ mun cɛ e’n, i sɔ’n yo wɔ sɛ?
-
?Sa benin nun yɛ kɛ ɔ ko yo naan e nin e wiengu mun e nuan w’a sɛ’n ɔ kwla yo kekle-ɔ?
?Wafa sɛ yɛ e kwla nian Zoova i ajalɛ’n su naan e nin e niaan mun e nuan w’a sɛ titi-ɔ? An kanngan Ɲanndra Mun 19:11 nun, i sin’n an koko kosan yɛ’n i su yalɛ:
-
?Sɛ sran wie be wɔ awlɛn, annzɛ ɔ lo wɔ ngasi’n, ngue yɛ a kwla yo naan ndɛ sɔ’n w’a yoman ndɛ dan-ɔn?
Wie liɛ’n, e lo sran wie ngasi. ?I lɛ nun’n, ngue yɛ ɔ fata kɛ e yo-ɔ? An bo VIDEO’N, i sin’n an koko kosan yɛ’n i su yalɛ.
-
?Video’n nun’n, ngue yɛ aniaan bla’n yoli naan ɔ nin i niaan’n b’a siesie be afiɛn-ɔn?
6. Fa ɔ ɲin sie i ɔ niaan’m be nzuɛn kpa’n su
Kɛ e fa e wun e mantan e niaan mun’n, e wun kɛ be nzuɛn ti kpa. Sanngɛ kusu e wun kɛ ɔ ju wie’n be fɔn. ?É yó sɛ naan e ɲin w’a tran be nzuɛn kpa’n su? An bo VIDEO’N, i sin’n an koko kosan yɛ’n i su yalɛ.
-
?Ngue yɛ ɔ kwla uka wɔ naan w’a fa ɔ ɲin w’a sie i ɔ niaan’m be nzuɛn kpa’n su-ɔ?
Zoova fɛ i ɲin sie i e nzuɛn kpa’n su. An kanngan 2 Be Ɲoliɛ 16:9a nun, i sin’n an koko kosan yɛ’n i su yalɛ:
-
?Kɛ a si kɛ Zoova fɛ i ɲin sie i wɔ nzuɛn kpa’n su’n, i sɔ’n yo wɔ sɛ?
Diaman ng’ɔ ti klanman kpa’n bɔbɔ’n, fiɛn o nun. I wafa kunngba’n, kannzɛ fɔ o e niaan’m be nun, be ndɛ lo Zoova.
SRAN WIE’M BE WAAN: “N kwla yaci n cɛ i, sanngɛ min wla su fi’a su.”
-
?Ngue ti yɛ ɔ fata kɛ e yaci e wiengu’m be wun sa’n e cɛ be klun ufue su-ɔ?
NDƐ’N I KPƆLƐ BOLƐ
Sɛ e yaci e wiengu’m be wun sa’n e cɛ be, naan e kle e niaan’m be kɛ e klo be’n, e nin asɔnun’n nunfuɛ mun e nuan sɛ́.
Ndɛ’n i nun flanlɛ
-
?É yó sɛ naan y’a kpliman y’a diman e niaan’m be jɔlɛ?
-
?Sɛ sa tɔ a nin aniaan wie amun afiɛn’n, ngue yɛ á yó-ɔ?
-
?Ngue ti yɛ ɔ fata kɛ e nian Zoova m’ɔ yaci sran wun sa cɛ’n i ajalɛ’n su-ɔ?
NDƐ WIE MUN EKUN
Sunnzun ase kun mɔ Zezi fali’n ɔ uka e naan y’a kpliman y’a diman e wiengu’m be jɔlɛ.
?Sɛ sran wie w’a fa ɔ wun ya mɔ sanngɛ a wunman kɛ a yoli i sa’n ɔ fata kɛ a kpɛtɛ i?
“Like nga ti yɛ ɔ ti cinnjin kɛ e se yaci’n” (Sasafuɛ Tranwlɛ’n nun ndɛ)
Bian nɲɔn mɔ be wa suannin be nga be nin be be wunnɛn kplo’n timan kun’n be klolɛ’n.
Joni nin Zedeɔn: Laa be kpɔ be wiengu, siɛn’n be tran aniaan tranlɛ (6:42)
Ninnge nga e kwla yo naan y’a siesie e afiɛn naan anuansɛ w’a tran asɔnun’n nun titi’n.
“Maan e siesie e afiɛn wɛtɛɛ su” (Sasafuɛ Tranwlɛ’n, afuɛ 2016, Mɛ)
a Ndɛ Wie’m be nun Yiyilɛ 6 su’n ɔ kan wafa nga klolɛ mɔ e klo e niaan mun’n ti’n, e mian e ɲin naan y’a faman tukpacɛ wie y’a saman be’n i ndɛ.
b Ndɛ Wie’m be nun Yiyilɛ 7 su’n ɔ kan wafa nga sɛ sika ndɛ annzɛ ndɛ mɔ be kwla fa kɔ jɔlɛ difuɛ’m be ja su’n yɛ ɔ tɔ e nin e niaan’n e afiɛn’n e kwla siesie’n i ndɛ.
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
