Ɲanmiɛn m’ɔ ti e Yifuɛ’n, ɔ si ngwlɛlɛ tra e lele. Ɔ nian e lika kɛ Siɛ kpa kun fa yo’n sa. W’a yiman e kɛ e tiaun, e bɔbɔ e sie e wun. (Zeremi 10:23) Wafa kunngba ng’ɔ fata kɛ siɛ nin niɛn’m be kle be mma’m be atin’n, i sɔ yɛ ɔ fata kɛ Zoova kle e atin ɔn. (Ezai 48:17, 18) Mmla nga be o Biblu’n nun’n yɛ Zoova fa kle e atin ɔn. Mmla sɔ’m be ti like cinnjin kpa mɔ Ɲanmiɛn fa cɛli e ɔ.​—Kanngan 2 Timote 3:16 nun.

Kɛ mɔ Zoova yɛ ɔ yili e’n ti’n, sɛ ɔ kpɛ mmla man e’n, i sɔ’n ti su. Mmla sɔ’m mɔ Zoova fa mannin e’n, be kle e mɛn dilɛ kpafuɛ’n. Kpɛkun be kle e like nga e ko yo naan cɛn wie lele’n y’a di ye tititi’n.​—Kanngan Jue Mun 19:8, 12 nin Sa Nglo Yilɛ 4:11 be nun.

Biblu’n nun ndɛ cinnjin wie’m be kle e like nga sa sunman nun’n Ɲanmiɛn kunndɛ kɛ e yo’n. Mmla wie’m be liɛ kusu’n, sa trele wie mun ti yɛ be kpɛli be ɔ. (Mmla’n 22:8) Ɔ maan ka naan y’a fa ajalɛ’n, ɔ fata kɛ e bu Biblu’n nun ndɛ nanwlɛ sɔ’m be su akunndan naan y’a si like ng’ɔ fata kɛ e yo’n. (Nyanndra Mun 2:10-12) Ndɛ sɔ’m be nun kun yɛle kɛ Zoova yɛ ɔ mannin e nguan ɔn. Ɔ maan e junman su lɔ o, awlo lɔ o, yɛ kɛ e tu ajalɛ e kɔ lika o, ndɛ cinnjin sɔ’n kwla sasa e naan sa wie w’a ɲanman e annzɛ w’a ɲanman e wiengu.​—Kanngan Sa Nga Be Yoli’n 17:28 nun.

Zezi kannin mmla nɲɔn mɔ be ti mmla’m be nun cinnjin’n be  ndɛ. I klikli’n yɛle kɛ ɔ nin i fata kɛ e si Ɲanmiɛn, e klo i, yɛ e su i ndɛnman su. Sa nga ti yɛ e o asiɛ’n su’n yɛ ɔ o lɛ ɔ. Ɔ maan like kwlaa nga é yó’n nun’n, maan mmla sɔ’n tran e akunndan’n nun. (Nyanndra Mun 3:6) Be kwlaa nga be nanti mmla sɔ’n su’n, be di aklunjuɛ kpafuɛ’n, kpɛkun bé ɲán anannganman nguan.​—Kanngan Matie 22:36-38 nun.

Mmla i nɲɔn sufuɛ’n kle e wafa e ko yo naan e nin sran mun y’a tran kpa’n. (1 Korɛntfuɛ Mun 13:4-7) Ɲanmiɛn ndɛ’n kle like nga e kwla yo naan e nin e wiengu mun y’a nanti fɛfɛ’n. Ɔ nin i fata kɛ e nian afɔtuɛ sɔ’m be su.​—Kanngan Matie 7:12 nin 22:39, 40 be nun.

Kɛ awlobofuɛ’m be nanti Ɲanmiɛn i mmla’m be su’n, be afiɛn mantan kpɛkun be klo be wun kpa. (Efɛzfuɛ Mun 4:32; Kolɔsfuɛ Mun 3:12-14) Asa ekun’n, ndɛ cinnjin kpa kun o Biblu’n nun, m’ɔ sasa awlobo nunfuɛ mun ɔ. Ndɛ sɔ’n yɛle kɛ, kɛ yasua kun nin bla kun be ko ja’n, nn b’a ja.​—Kanngan Bo Bolɛ 2:24 nun.

Sɛ e nanti Biblu’n nun mmla’m be su’n, é yó junman difuɛ kpa kpɛkun e wla gúa ase. Ɔ maan e junman su lɔ’n, sran’m be lafi e su. Afin junman difuɛ nga be nanti Biblu’n nun mmla’n su’n, mɔ be ti nanwlɛfuɛ, mɔ be timan fuɛnfuɛ’n, i sɔfuɛ mun yɛ junman su min’m be kunndɛ ɔ. (Nyanndra Mun 10:4, 26; Ebre Mun 13:18) Asa kusu’n, Ɲanmiɛn Ndɛ’n kle be kɛ maan like kan nga be le i’n, ɔ ju be, naan be nin Ɲanmiɛn be afiɛn m’ɔ mantan’n yɛ ɔ yo be cinnjin tra like kwlaa ɔ.​—Kanngan Matie 6:24, 25, 33 nin 1 Timote 6:8-10 be nun.

Ɲanmiɛn i mmla’m be su falɛ’n sasa e tukpacɛ’m be lika. (Nyanndra Mun 14:30; 22:24, 25) I wie yɛle Ɲanmiɛn i mmla ng’ɔ se e kɛ nán e nɔn nzan ngboko’n. Mmla sɔ’n sasa e tukpacɛ nin ninnge yaya nga be kwla fa e sie i wie nuan’n, be lika. (Nyanndra Mun 23:20) Zoova w’a seman kɛ nán e nɔn nzan mlɔnmlɔn. Sanngɛ, i waan nán e nɔn e tratra su. (Jue Mun 104:15; 1 Korɛntfuɛ Mun 6:10) Asa ekun, Ɲanmiɛn i mmla’m be yo e ye, afin be kle e wafa nga e kwla nian e aeliɛ’n nin e akunndan bulɛ’n su’n. (Jue Mun 119:97-100) Nanwlɛ, Ɲanmiɛn i mmla’m be su nantilɛ’n yo Klistfuɛ kpa’m be ye. Sanngɛ kusu ɔ manman Zoova wie.​—Kanngan Matie 5:14-16 nun.