Like nga ti yɛ a su yiyi ndɛ’n nun’n, maan ɔ tran ɔ klun. Wienun-ɔn a kunndɛ kɛ á kán ndɛ trele wie klé ɔ ndɛ tiefuɛ mun. Annzɛ kusu a kunndɛ kɛ be lafi ndɛ wie su, annzɛ be fa ajalɛ wie. Bu i kwlaa sɔ’n i akunndan naan w’a di ɔ junman’n. Ndɛ cinnjin kwlaa nga be kwla uka wɔ naan w’a di ɔ junman’n kɛ ɔ nin i fata’n sa’n, fa ɔ ɲin sie su kpa.

Yo maan ɔ ndɛ’n i flɛlɛ’n i ɲin’n fite kpa. Kɛ á yíyí ndɛ’n nun kɔ́’n, bo ndɛ’n i flɛlɛ’n i nun ndɛ mma cinnjin’m be su flan nun. Annzɛ kusu a kwla kan ndɛ kunngba’n i wafa uflɛ.

Yiyi ɔ ndɛ cinnjin’m be nun weinwein, yɛ maan be wlɛ wunlɛ’n yo pɔpɔ. Ndɛ nga be nin ɔ ndɛ’n i flɛlɛ’n be kɔ likawlɛ mɔ a kwla ɲan blɛ yiyi be nun’n, be ngunmin yɛ ɔ fata kɛ a fa-ɔ. Nán fa ndɛ cinnjin kpanngban. Bo ndɛ cinnjin’m be kwlaa be su. Kɛ a ko wie kun nun yiyi’n, jran kan naan w’a yiyi uflɛ nun. Maan ndɛ cinnjin’m be lɔngɔ su klanman.