AN MGA Kristiano pinagbotan na selebraron an Memorial kan kagadanan ni Cristo. An selebrasyon na ini inaapod man na “an pamanggihan kan Kagurangnan.” (1 Corinto 11:20) Ano an makahulogan na marhay manongod dian? Noarin asin paano iyan maninigong selebraron?

Inestablisar ni Jesu-Cristo an selebrasyon na ini kan banggi kan Judiong Paskua kaidtong 33 C.E. An Paskua sarong selebrasyon na ginigibo sarong beses sana kada taon, sa ika-14 aldaw kan Judiong bulan nin Nisan. Tanganing makalkulo an petsang iyan, minalataw na hinahalat kan mga Judio an spring equinox. Ini an aldaw na poko mas o menos may 12 oras na liwanag nin aldaw asin 12 oras na kadikloman. An primerong naheheling na bagong bulan na pinakaharani sa spring equinox iyo an kapinonan kan Nisan. An Paskua pakalihis nin 14 aldaw, pagkasolnop kan saldang.

Sinelebrar ni Jesus an Paskua kaiba an saiyang mga apostol, pinahale si Judas Iscariote, dangan inestablisar an Pamanggihan kan Kagurangnan. Sinalidahan kan pamanggihan na ini an Judiong Paskua asin kun siring iyan maninigong selebraron nin saro sanang beses kada taon.

An Ebanghelyo ni Mateo nagsasaysay: “Si Jesus nagkua nin tinapay asin, pakapamibi, binaraak nia iyan asin, sa pagtao kaiyan sa mga disipulo, sia nagsabi: ‘Kua, kakan kamo. Ini nangangahulogan kan sakong hawak.’ Siring man, nagkua sia  nin sarong kopa asin, pakapagpasalamat, itinao nia iyan sa sainda, na an sabi: ‘Inom kamo kaiyan, kamo gabos; huli ta ini nangangahulogan kan sakong “dugo kan tipan,” na papaboloson para sa dakol para sa kapatawadan nin mga kasalan.’”​—Mateo 26:26-28.

May mga naniniwala na ginibo ni Jesus na magin literal na laman nia an tinapay asin magin dugo nia an arak. Minsan siring, an hawak na laman ni Jesus kompleto pa man giraray kan ialok nia an tinapay na ini. An mga apostol daw ni Jesus nagkakan talaga kan saiyang literal na laman asin nag-inom kan saiyang dugo? Dai, huling iyan kanibalismo asin sarong pagbalga kan ley nin Dios. (Genesis 9:3, 4; Levitico 17:10) Segun sa Lucas 22:20, si Jesus nagsabi: “An kopang ini nangangahulogan kan bagong tipan paagi sa sakong dugo, na papaboloson para sa saindo.” An kopa daw na iyan literal na nagin “bagong tipan”? Imposible iyan, huling an tipan sarong kasundoan, bakong bagay na nadudutaan.

Huli kaini, an tinapay sagkod an arak mga simbolo sana. An tinapay nagsisimbolo sa sangkap na hawak ni Cristo. An ginamit ni Jesus tinapay na natada sa pamanggihan nin Paskua. An tinapay na iyan linuto na mayo nin ano man na lebadura. (Exodo 12:8) Sa parate, ginagamit kan Biblia an lebadura bilang simbolo nin kasalan o karatan. Kun siring an tinapay nagrerepresentar sa sangkap na hawak na iinatang ni Jesus. Iyan daing kasalan.​—Mateo 16:11, 12; 1 Corinto 5:6, 7; 1 Pedro 2:22; 1 Juan 2:1, 2.

An pulang arak nagrerepresentar sa dugo ni Jesus. Ginigibong balido kan dugong iyan an bagong tipan. Sinabi ni Jesus na an saiyang dugo pinabolos “para sa kapatawadan nin mga kasalan.” Sa siring an mga tawo puedeng magin malinig sa pagheling nin Dios asin puedeng makipagtipan ki Jehova sa bagong tipan. (Hebreo 9:14; 10:16, 17) An tipan na ini, o kontrata, ginigibong posible na makaduman sa langit an 144,000 na maimbod na Kristiano. Duman maglilingkod sinda bilang mga hade asin saserdote para sa pagbendisyon sa bilog na katawohan.​—Genesis 22:18; Jeremias 31:31-33; 1 Pedro 2:9; Kapahayagan 5:9, 10; 14:1-3.

Sairisay an maninigong makikabtang sa mga emblemang ini sa Memorial? Rasonable sana, an mga nasa bagong tipan sana​—an boot sabihon, an mga may paglaom na magduman sa langit—​an maninigong makikabtang sa tinapay asin arak. Kinokombensir kan banal na espiritu nin Dios an mga siring na sinda pinili na magin langitnon na mga hade. (Roma 8:16) Igwa man sinda nin pakipagtipan ki Jesus para sa Kahadean.​—Lucas 22:29.

 Kumusta man an mga may paglaom na mabuhay sagkod lamang sa Paraiso digdi sa daga? Kinukuyog ninda an pagboot ni Jesus asin nag-aatender sinda sa Pamanggihan kan Kagurangnan, alagad yaon sinda bilang magalang na mga nagmamasid, bakong mga nakikikabtang. Sarong beses kada taon pagkasolnop kan saldang sa Nisan 14, sineselebrar kan Mga Saksi ni Jehova an Pamanggihan kan Kagurangnan. Minsan ngani pirang ribo sana sa bilog na kinaban an naghihingako na may langitnon na paglaom, an selebrasyon na ini mahalagang marhay para sa gabos na Kristiano. Iyan sarong okasyon na puedeng horophoropon kan gabos an daing kabaing na pagkamoot ni Jehova Dios asin ni Jesu-Cristo.​—Juan 3:16.