Disisiyete anyos si Mama kan ipangaki niya ako kan 1960. Binayaan kami ni Papa bago pa ako mamundag. Nakiistar kami ni Mama sa Lolo saka Lola ko sa Burg, sarong sadit na banwaan sa dating German Democratic Republic, o East Germany. Dakul duman nin ateista, arog kan pamilya mi. Mayo sa bokabularyo mi an Diyos.

Kan aki pa ako, gusto ko pirming kaiba si Lolo. Dakul siyang pinapagibo sako, arog kan pagsakat sa kahoy para takrason an mga sanga. Dahil aki pa, gustuhon ko an mga arog kaiyan dawa delikado. Maugma saka dai akong ikinakahadit.

Sarong aldaw kan siyete anyos ako, may marauton na nangyari sako. Grade II na ako kaidto tapos puruunan pa sana nin klase. Kan papuli na ako, nagsakat ako sa sarong tower nin kuryente. Kan 8 metros na an nasakat ko, biglang tuminama sako an makusog na silyab nin kuryente kaya nawaran ako nin malay. Pagmata ko sa ospital, dai ko na namati an mga takyag ko. Grabe an pagkasulo kaiyan kaya parehong kinaipuhan putulon an duwa kong takyag para malikayan an impeksiyon sa dugo. Siyempre, munduon si Mama saka sa Lolo. Pero dahil aki pa, dai ko pang gayo naiisip kun ano an magigin epekto sako pag-abot nin panahon kan pagkaputol kan mga kamot ko.

Pagkaluwas ko sa ospital, nagpadagos ako sa pagklase. Dai ko kayang idepensa an sadiri ko kaya pigngingiriritan ako kan ibang mga aki, pigtuturuklang, saka pigdadaraklag. Talagang nakulgan ako kan mga pang-iinsulto saka pangmemenos ninda sako. Kan huri, pinaklase ako sa Birkenwerder School for the Disabled, sarong eskuwelahan para sa mga may diperensiya sa pisikal na duman na mismo nag-iistar. Harayo iyan sa harong mi kaya dai ako nabibisita ni Mama saka na Lolo. Nahihiling ko sana sinda pag bakasyon. Sa laog nin sampulong taon, nagdakula ako na harayo sa sainda.

Nakanuod akong gibuhon an mga bagay-bagay gamit an mga bitis ko. Napurbaran mo nang magkakan na nakakutsara o tinidor na an gamit mga bitis? Nasanay akong gibuhon iyan. Nakanuod man akong magsipilyo saka magsukray gamit an bitis. Pag nakikipag-ulay ngani ako, bitis na man an naikukumpas ko. Kaya mga bitis na an nagin kamot ko.

Kan magtin-edyer ako, gustong-gusto kong magbasa nin mga science fiction. Kun minsan naiisip ko  na igwa akong high-tech na mga takyag na kayang gibuhon dawa ano. Kan mag-14 anyos ako, nakanuod akong magsigarilyo. Garo natatawan ako kaiyan nin kumpiyansa sa sadiri saka pagmati ko arog na man ako kan iba. Sa isip-isip ko: ‘Kaya ko man ‘yan. Dakula ka na pag nagsisigarilyo ka—may kamot ka man o mayo.’

Ginibo kong sibot an sakong sadiri kaya nagbabali ako sa mga social activity. Nagi akong miyembro kan Free German Youth, sarong organisasyon nin mga hoben na nagpapalakop nin sosyalismo asin suportado kan Estado. Nagin sekretaryo ako kan mga miyembro kaiyan sa lugar mi, na sarong magabat na responsabilidad. Nagbali man ako sa sarong singing club, paggibo nin tula, saka sa mga kawat para sa mga may diperensiya sa pisikal. Pagkatapos na magsanay, nagtrabaho ako sa sarong kompanya sa lugar mi. Mantang nagdadakula, mas parati ko nang ginagamit an artipisyal kong kamot ta gusto kong magin normal arog kan iba.

Sarong aldaw mantang naghahalat nin tren pasiring sa trabaho, may lalaking nagrani sako. Hinapot niya ako kun baga naiisip ko man na puwedeng ibalik nin Diyos an duwa kong kamot. Napaisip ako kaiyan. Siyempre gusto kong magkaigwa giraray nin mga takyag asin kamot, pero para sako harayong mangyari iyan, imposible ngani! Bilang sarong ateista, kumbinsido ako na mayong Diyos. Magpuon kaidto, nag-iiwas na ako sa lalaking iyan.

Dangan sarong beses, iniba ako kan katrabaho kong babayi kan magbisita siya sa pamilya niya. Mantang nagkakape, nag-istorya an mga magurang niya dapit sa Diyos—sa Diyos na si Jehova. Pakadangog ko kaidto na may pangaran an Diyos. (Salmo 83:18) Pero sa buot-buot ko: ‘Dawa ano pang pangaran iyan, imposibleng may Diyos. Ipapahiling ko sa mga tawong ini na sala sinda.’ Dahil kumbinsido ako sa pananaw ko, nagtugot akong pag-ulayan mi an Bibliya. Pero dai ko hunaon na dai ko palan mapapatunayan na mayong Diyos.

Mantang pinag-aadalan mi an mga hula sa Bibliya, luway-luway na akong nagtutubod na may Diyos. Sinabi an mga hula ginatos o rinibong taon pa bago nangyari, pero nagkatotoo an mga iyan. Sarong beses sa pag-urulay mi, pigkumparar mi an presenteng sitwasyon sa kinaban sa mga hula sa Mateo kapitulo 24, Lucas kapitulo 21, saka 2 Timoteo kapitulo 3. Kun paanong an kumbinasyon nin mga sintomas nakakatabang sa doktor na maaraman kun ano talaga an hilang kan pasyente, natabangan man ako kan kumbinasyon nin mga pangyayari na sinambit sa mga hulang iyan na masabutan na nabubuhay na kita sa inaapod kan Bibliya na ‘huring mga aldaw.’ * Dai talaga ako makatubod. Hiling-hiling ko na nauutob an mga hulang iyan.

Kumbinsido ako na an nanunudan ko iyo an katotoohan. Nagpuon na akong mamibi sa Diyos na Jehova saka nagpundo sa pagsigarilyo—dawa labing 10 taon akong grabe magsigarilyo. Dagos-dagos akong nag-adal nin Bibliya sa laog nin mga sarong taon. Kan Abril 27, 1986, patago akong binawtismuhan  sa sarong bathtub, huling kan panahon na idto ipinagbabawal an mga Saksi sa East Germany.

Dahil sa pagbabawal, nagtitiripon kami sa mga pribadong harong sa sadit sanang mga grupo saka dikit sana an bistado kong mga Saksi. Dangan dai ko inaasahan na tutugutan ako kan gobyerno na magbiyahe pasiring sa West Germany, kun sain bakong bawal an mga Saksi. Sa bilog kong buhay, kaidto lang ako nakapag-atender nin mga kumbensiyon na basado sa Bibliya asin nakahiling nin rinibong kapagtubod. Magayunon na eksperyensiya idto.

Kan gabaon na an Berlin Wall, hinali na man an pagbabawal sa Mga Saksi ni Jehova. Naeksperyensiyahan mi man giraray na libreng makapagsamba sa Diyos na Jehova. Gusto kong dagdagan an ginigibo ko sa paghuhulit. Pero, natatakot akong makipag-ulay sa mga dai ko kabisto. Hababa an paghiling ko sa sadiri huli sa kamugtakan ko saka huling haros sa istaran nin mga may diperensiya sa pisikal ako nagdakula. Pero kan 1992, pinurbaran kong maghulit nin 60 oras sa sarong bulan. Nakaya ko iyan, saka talagang naugma akong maray. Kaya nagdesisyon akong gibuhon iyan bulan-bulan, asin naipagpadagos ko iyan nin mga tulong taon.

Pirmi kong iniisip an mga tataramon na ini sa Bibliya: “Pag igwa nin nangluluya, bako daw na nangluluya man ako?” (2 Corinto 11:29, NW) Mayo man akong takyag, igwa pa man akong isip saka boses. Kaya ginibo ko an pinakamakakaya ko na makatabang sa iba. Dahil sa kamugtakan ko, naiintindihan ko an mga tawong may mga limitasyon man sa pisikal. Aram ko an pagmati pag may gustong-gusto kang gibuhon pero dai mo magibo. Naghinguwa akong pakusugon an mga nakakamati nin arog kaiyan. Pag nagtatao ako sa arog kaiyan na paagi nauugma ako.

Siyempre may mga panahon man na nangluluya ako. Gusto ko man kuta na magin kumpleto. Nakakaya ko man an dakul na gibuhon sa aroaldaw dawa ako sana, pero makioras, saka kaipuhan nin mas dakul na kusog saka paghihinguwa bakong arog kan kumpleto an hawak. Ini an pirming isinasaisip ko kada aldaw: “Kaya kong atubangon an gabos na bagay paagi sa saiya na nagtatao sa sako nin kusog.” (Filipos 4:13, NW) Aroaldaw akong tinatawan ni Jehova kan kinakaipuhan na kusog tanganing magibo an “normal” na mga gibuhon sa aroaldaw. Nahiling kong dai ako pinabayaan ni Jehova. Kaya dai ko man siya babayaan.

Binendisyunan ako ni Jehova nin pamilya—an bagay na kulang sako puon pagkaaki sagkod na magdakula ako. Nagkaigwa ako nin mamumuton asin maasikasong agom, si Elke. Tapos an minilyon na mga Saksi ni Jehova nagin mga tugang ko man sa espirituwal—sarong internasyonal na pamilya.

Naranga man ako kan panuga nin Diyos na Paraiso, na diyan gigibuhon niyang “bago an gabos na bagay,” kaiba na an takyag ko saka kamot. (Kapahayagan 21:5) Mas nasabutan ko an panugang iyan kan pinag-isipan ko an ginibo ni Jesus kan yaon siya digdi sa daga. Tulos-tulos niyang pinaumayan an sarong kimay, pati ngani su natakras na talinga kan sarong lalaki sinulit niya. (Mateo 12:13; Lucas 22:50, 51) Huli sa mga panuga ni Jehova saka sa mga milagro ni Jesus, kumbinsido ako na dai na mahahaloy makukumpleto giraray an hawak ko.

Pero an pinakanangungurog na bendisyon iyo na mamidbid an Diyos na Jehova. Nagi siyang ama ko saka amigo, na nagraranga asin nagpapakusog sako. Namatian ko an arog kan ki Hading David, na nagsabi: ‘Si Jehova an sakuyang kusog. Tinabangan niya ako. Nin huli kaiyan, naugma an sakuyang puso.’ (Salmo 28:7) Gusto kong pangaptan an mahalagang marhay na katotoohan na ini sa bilog kong buhay—dawa mayo akong mga kamot.