1. Anong mga tema an parating pinag-aadalan kan banwaan nin Diyos, asin paano kita nakikinabang sa pagrepaso kaiyan?

MANTANG naghahanda para sa Pag-adal sa Torrengbantayan, nasabi mo na daw sa sadiri, ‘Bakong napag-adalan na ini kaidto?’ Kun haloy-haloy ka nang nakikiasosyar sa Kristiyanong kongregasyon, posibleng marhay na narisa mo na may mga tema na inuutrong pag-adalan. Parating kaiba sa satong espirituwal na pagkakan an pag-adal manungod sa Kahadian nin Diyos, pantubos, paggibo nin disipulo, saka mga kuwalidad na arog kan pagkamuot asin pagtubod. Sa pagrepaso kan mga temang ini, natatabangan kita na magdanay na makusog sa pagtubod asin ‘magin mga paragibo kan tataramon, bako sanang mga paradangog.’—Sant. 1:22.

2. (a) Sa ano parating nanunungod an mga pagirumdom nin Diyos? (b) Ano an pagkakalain kan mga pagirumdom nin Diyos asin kan mga ley nin tawo?

² An termino sa Hebreo na trinadusir na “pagirumdom” sa parati nanunungod sa mga ley, pagbuot, asin susundon na itinatao nin Diyos sa saiyang banwaan. Bakong arog kan mga ley nin tawo, na sa parati kaipuhan na amendaran o gibuhon na aplikable sa panahon, an mga ley asin susundon na itinatao ni Jehova pirming mapagtitiwalaan. Dawa ngani an iba diyan itinao para sa sarong partikular na panahon o sitwasyon, dai iyan nuarin man nagkaigwa nin depekto o kakulangan. An salmista nagsabi: “An katanusan kan saimong mga pagirumdom sagkod sa panahon na daing talaan.”—Sal. 119:144, NW.

3, 4. (a) Ano kun minsan an kaiba sa mga pagirumdom ni Jehova? (b) Paano makikinabang an mga Israelita kun susunudon ninda iyan?

³ Tibaad narisa mo na kun minsan an mga pagirumdom ni Jehova may kaibang mga mensahe na nagpapatanid. An nasyon nin Israel parating tinatawan nin patanid paagi sa mga propeta nin Diyos. Halimbawa, kan an mga Israelita madali nang lumaog sa Dagang Panuga, pinatanidan sinda ni Moises: ‘Pagmaan kamo [ta tibaad] madayaan an saindong puso, asin sumuhay kamo asin maglingkod sa mga diyos na putik asin magduko sa sainda, asin lumaad an kaanggutan ni Jehova sa saindo.’ (Deut.  11:16, 17) Ipinapahiling kan Bibliya na dakul na kapakipakinabang na pagirumdom an itinao nin Diyos sa saiyang banwaan.

⁴ Sa dakul na iba pang pagkakataon, sinadol ni Jehova an mga Israelita na matakot sa saiya, maghinanyog sa saiyang tingog, asin pakangbanalon an saiyang pangaran. (Deut. 4:29-31; 5:28, 29) Kun susunudon ninda an mga pagirumdom na ini, siyertong maako sinda nin dakul na bendisyon.—Lev. 26:3-6; Deut. 28:1-4.

5. Taano ta nakipaglaban si Jehova para ki Hading Hezekias?

⁵ Sa bilog na kasaysayan kan Israel, na dakul nin kadipisilan, pirming inuutob nin Diyos an saiyang panuga. Halimbawa, kan si Hading Senakerib kan Asiria magsakyada sa Juda asin maghuma na ibabagsak si Hading Hezekias, nakiaram si Jehova paagi sa pagsugo nin sarong anghel. Sa laog sana nin sarong banggi, ginadan kan anghel ni Jehova an ‘gabos na maisog asin makusog’ na parapakilaban sa hukbo kan Asiria, kaya napiritan si Senakerib na magpuli na may kasusupgan. (2 Cron. 32:21; 2 Ha. 19:35) Taano ta nakipaglaban an Diyos para ki Hading Hezekias? Huling si Hezekias ‘nagdulok ki Jehova, asin dai saiya nagsuhay, kundi nagkuyog kan mga tugon na itinao ni Jehova.’—2 Ha. 18:1, 5, 6.

6. Paano si Hading Josias nagpahiling nin pagtitiwala ki Jehova?

⁶ An saro pang halimbawa nin saro na nagsunod sa mga pagbuot ni Jehova iyo si Hading Josias. Magpuon sa amay pang edad na otso anyos, siya ‘naggibo kan matanos sa mga mata ni Jehova, asin dai siya nagsuki-suki minsan sa tuo minsan sa wala.’ (2 Cron. 34:1, 2) Ipinahiling ni Josias an saiyang pagtitiwala ki Jehova paagi sa paghali sa mga idolo asin pagbalik sa nasyon kan tunay na pagsamba. Huli kaiyan, bako sana si Josias an nag-ako nin mga bendisyon kundi an bilog na nasyon man.—Basahon an 2 Cronica 34:31-33.

7. Pag binabaliwala kan Israel an mga pagirumdom ni Jehova, ano an nagigin resulta?

⁷ Pero makamumundo ta an banwaan nin Diyos dai pirming nagtiwala nin lubos sa mga pagirumdom ni Jehova. Sa laog nin mga siglo, paburubago sinda—minsan nagsusunod, minsan dai. Pag minaluya an pagtubod ninda, sa parati sinda, arog kan pagkasabi ni apostol Pablo, ‘pinagdadara-dara nin gabos na duros nin katukduan.’ (Efe. 4:13, 14) Asin arog kan ihinula, pag dai sinda nagtitiwala sa mga pagirumdom nin Diyos, nag-aani sinda nin mapait na bunga.—Lev. 26:23-25; Jer. 5:23-25.

8. Ano an manunudan ta sa nangyari sa Israel?

⁸ Paano kita makikinabang sa nangyari sa Israel? Arog ninda, an mga lingkod nin Diyos ngunyan tinatawan nin konseho asin disiplina. (2 Ped.  1:12) An ipinasabong na Tataramon nin Diyos nagseserbing pagirumdom sa sato sa kada pagkakataon na binabasa ta iyan. Bilang mga linalang na may libertad na magdesisyon, puwede tang pilion na sunudon an paggiya ni Jehova o puwede tang gibuhon kun ano an garo baga tama sa sadiri tang paghiling. (Tal. 14:12) Pag-ulayan niyato an pirang dahilan kun taano ta makakapagtiwala kita sa mga pagirumdom ni Jehova asin kun paano kita makikinabang sa pagsunod diyan.

9. Kan an mga Israelita nasa kaawagan, paano inasegurar sa sainda ni Jehova na sinusuportaran niya sinda?

⁹ Kan punan kan mga Israelita an pagbaklay sa “makatatakot na kapatagan” na inabot nin 40 taon, si Jehova dai patiinot na nagtao nin espesipikong mga detalye dapit sa kun paano niya sinda gigiyahan, poprotektaran, asin aatamanon. Pero, pauruutro niyang ipinahiling na makakapagtiwala sinda sa saiya asin sa saiyang mga instruksiyon. Paagi sa hariging panganuron kun aldaw asin hariging kalayo kun banggi, ipinagirumdom ni Jehova sa mga Israelita na sinusuportaran niya sinda mantang nagbabaklay sa kaawagan na idto na masakit an kamugtakan. (Deut. 1:19; Ex. 40:36-38) Itinao niya man an saindang panginot na mga pangangaipo. “Dai nagdaan an sulot nindang mga gubing asin dai naggatok an saindang mga bitis.” Iyo, ‘dai sinda nagkulang nin ano man.’—Neh. 9:19-21, BPV. *

10. Paano ginigiyahan ni Jehova an saiyang banwaan ngunyan?

¹⁰ An mga lingkod ni Jehova ngunyan madali nang lumaog sa matanos na bagong kinaban. Nagtitiwala daw kita na itinatao ni Jehova an kinakaipuhan ta tanganing makaligtas sa nagdadangadang na ‘dakulang kahurasaan’? (Mat. 24:21, 22; Sal. 119:40, 41) Totoo, si Jehova dai naggagamit nin hariging panganuron o hariging kalayo tanganing giyahan kita pasiring sa bagong kinaban. Pero, ginagamit niya an saiyang organisasyon tanganing tabangan kita na magdanay na mapagbantay. Halimbawa, tinatawan nin urog na pagduduon an pagpakusog kan satong espirituwalidad paagi sa personal na pagbasa kan Bibliya, Pampamilyang Pagsamba, saka pagigin regular sa mga pagtiripon asin sa ministeryo. Naggibo na daw kita nin mga pagliliwat tanganing masunod an mga instruksiyon na ini? Matabang iyan sa sato na magkaigwa nin makusog na pagtubod, na kakaipuhanon ta tanganing makaligtas asin makalaog sa bagong kinaban.

11. Sa anong mga paagi ipinapahiling nin Diyos na siya nagmamakulog sa sato?

¹¹ Apuwera sa pagtabang sa sato na magdanay na puka sa espirituwal, an paggiya na inaako niyato nakakatabang man sa pang-aroaldaw tang buhay. Kaiba diyan an pagpadanay nin timbang na pagmansay sa materyal na mga bagay asin pagpadanay nin simpleng mata tanganing mabawasan an kahaditan sa buhay. Nakikinabang man kita sa itinataong paggiya mapadapit sa satong pagbado saka pagpakarhay sa sadiri, pagpili nin marahay na libangan, asin pagdesisyon kun sagkod sain sana an kukuanon na edukasyon. Asin isip-isipa an mga pagirumdom tanganing makalikay sa peligro may koneksiyon sa satong harong, awto, Kingdom Hall, asin pag-andam enkaso magkaigwa nin emerhensiya. An siring na mga paggiya nagpapahiling na an Diyos nagmamakulog sa sato.

12. (a) Ano an sarong bagay na pauruutrong ipinakipag-ulay ni Jesus sa saiyang mga disipulo? (b) Anong akto nin kapakumbabaan an nagtao ki Pedro nin dai malilingawan na leksiyon, asin ano an maninigong epekto kaiyan sa sato?

¹² Kan inot na siglo, an banwaan nin Diyos regular na tinatawan nin mga pagirumdom. Pauruutrong ipinakipag-ulay ni Jesus sa saiyang mga disipulo na mahalaga an magin mapakumbaba. Alagad, dai sana niya sinabi sa saiyang mga disipulo kun ano an buot sabihon kan pagigin mapakumbaba—ipinahiling niya iyan sa sainda. Kan huring aldaw niya digdi sa daga bilang tawo, tinipon ni Jesus an saiyang mga apostol para sa Paskuwa. Mantang nagkakakan an mga apostol, buminuhat si Jesus dangan hinugasan an saindang mga bitis—sarong bagay na sa parati ginigibo nin sarong  uripon. (Juan 13:1-17) An aktong ini nin kapakumbabaan nagtao sa sainda nin dai malilingawan na leksiyon. Pakalihis nin mga 30 taon, si apostol Pedro, na presente sa pamanggihan na idto, nagtao nin konseho sa saiyang mga kapagtubod mapadapit sa kapakumbabaan. (1 Ped. 5:5) An halimbawa ni Jesus maninigong magpahiro sa sato gabos na magin mapakumbaba sa pagtratar sa lambang saro.—Fil. 2:5-8.

13. Ipinagirumdom ni Jesus sa saiyang mga disipulo na kaipuhan patalubuon an anong mahalagang marhay na kuwalidad?

¹³ An saro pang bagay na parating ipinapakipag-ulay ni Jesus sa saiyang mga disipulo iyo an kahalagahan nin pagkaigwa nin makusog na pagtubod. Kan dai mapaluwas kan mga disipulo an demonyo sa sinasaniban kaiyan na aking lalaki, sinda naghapot ki Jesus: ‘Tadaw ta dai kami nakapaluwas saiya?’ Si Jesus nagsimbag: ‘Huli ta diit an saindong pagtubod. Ta sa katotoohan ako nagsasabi saindo, “Kun igwa kamo nin pagtubod na siring sa sarong pisog nin mustasa, dai nin ano man na dai nindo magigibo.”’ (Mat. 17:14-20) Sa bilog na ministeryo ni Jesus, itinukdo niya sa saiyang mga disipulo na an pagtubod sarong mahalagang marhay na kuwalidad. (Basahon an Mateo 21:18-22.) Inaaprobetsaran ta daw an mga oportunidad na bukas sa sato tanganing mapakusog an satong pagtubod paagi sa nakakaparigon na pagtutukdo sa mga kumbensiyon, asembleya, asin Kristiyanong pagtiripon? An mga ini bako sanang maugmang mga pagtiripon, kundi mga oportunidad man na ipahiling an satong pagtitiwala ki Jehova.

14. Taano ta mahalagang magkaigwa nin arog-Cristong pagkamuot ngunyan?

¹⁴ An Kristiyanong Griegong Kasuratan kadakul nin pagirumdom dapit sa kun paano niyato ipapahiling an pagkamuot sa lambang saro. Sinabi ni Jesus na an ikaduwang pinakanangungurog na tugon iyo an ‘mamutan mo an saimong kataid [o kapwa] siring sa saimo man sana.’ (Mat. 22:39) Si Santiago, na tugang ni Jesus sa ina, inapod man an pagkamuot na “sa hading ley,” o nangungurog na ley. (Sant. 2:8, NW) Si apostol Juan nagsurat: ‘Mga namumutan, dai ako nagsusurat sa saindo nin bagong tugon, kundi sarong daan na tugon na kinamtan nindo magpuon sa kapinunan.’ (1 Juan 2:7, 8) Sa ano nanunungod an sinabi ni Juan na ‘daan na tugon’? An sinasabi niya iyo an tugon na mamuot. Iyan “daan,” o luma, sa sentido na iyan itinao ni Jesus ‘magpuon sa kapinunan,’ o mga dekada na an nakaagi. Pero iyan ‘bago’ man huling naghahagad iyan nin mapagsakripisyong pagkamuot, na tibaad kaipuhan na ipahiling kan mga disipulo sa pag-atubang nin bagong mga kamugtakan. Bilang mga disipulo ni Cristo, bako daw na pinapahalagahan ta an mga patanid na nakakatabang sa sato na dai magkaigwa nin makasadiring espiritu na lakop na marhay sa kinaban, na puwedeng makapalipot kan satong pagkamuot sa kapwa?

15. Ano an panginot na misyon ni Jesus digdi sa daga?

¹⁵ Nagpahiling si Jesus nin personal na interes sa mga tawo. Mahihiling ta an saiyang mamumuton na pagmakulog kan paumayan niya an mga  may hilang saka may diperensiya sa hawak asin kan buhayon niya liwat an mga gadan. Pero, an panginot na misyon ni Jesus bako an pagpaumay sa mga tawo sa pisikal. An saiyang paghuhulit asin pagtutukdo nagtao nin mas nagdadanay nanggad na pakinabang sa mga tawo. Paano? Halimbawa, aram tang an mga pinaumayan asin binuhay liwat ni Jesus kan inot na siglo pag-abot nin panahon guminurang asin nagadan, mantang idtong mga naghimati sa ihinulit niyang mensahe nagkaigwa nin paglaom na buhay na daing katapusan.—Juan 11:25, 26.

16. Gurano kahiwas ngunyan an paghuhulit kan Kahadian asin paggibo nin mga disipulo?

¹⁶ An gibuhon na paghuhulit na pinunan ni Jesus kan inot na siglo ginigibo ngunyan nin mas mahiwas nanggad. Iyo, isinugo ni Jesus an saiyang mga disipulo, na sinasabi: ‘Paduman kamo asin gibuhon nindong disipulo an gabos na nasyon.’ (Mat. 28:19) Talagang ginibo ninda iyan, asin masasabi niyato na talagang ginigibo ta iyan ngunyan! Labing pitong milyon na aktibong Saksi ni Jehova an maigot na nagbabalangibog kan Kahadian nin Diyos sa labing 230 kadagaan, asin minilyon an regular nindang tinutukduan sa Bibliya. An paghuhulit na ini patunay na nabubuhay na kita sa huring mga aldaw.

17. Anong pagirumdom an itinao ni Pablo asin Pedro?

¹⁷ Malinaw nanggad na an mga pagirumdom nakatabang sa inot na mga Kristiyano na magdanay na marigon sa pagtubod. Isip-isipa an pamparigon sa buot na siguradong inako ni Timoteo kan si apostol Pablo, na nakapreso kaidto sa Roma, magsabi sa saiya: ‘An arugan nin mga marahay na tataramon na nadangog mo sako ingatan mo.’ (2 Tim. 1:13) Pagkatapos na dagkahon an mga kapwa Kristiyano na patalubuon an mga kuwalidad na arog kan pakatagal, pagkamuot na sa magturugang, asin pagpupugol sa sadiri, sinabi ni apostol Pedro: ‘Ako magigin danay na andam sa pagpagirumdom saindo dapit sa mga bagay na ini, minsan kamo tatao na kaiyan asin napasarig na sa katotoohan na nasa saindo.’—2 Ped. 1:5-8, 12.

18. Paano minansay kan mga Kristiyano kan inot na siglo an mga pagirumdom?

¹⁸ Iyo, an mga surat ni Pablo asin Pedro nagpapahayag nin ‘mga tataramon na ipinagtaram kaidto kan mga banal na propeta.’ (2 Ped. 3:2) Nakulgan daw an buot kan mga tugang ta kan inot na siglo kan itao sa sainda an siring na paggiya? Dai, huli ta iyan kapahayagan kan pagkamuot nin Diyos, na nakatabang sa sainda na ‘magtalubo sa biyaya asin sa pakamidbid sa satong Kagurangnan asin Paraligtas na si Jesu-Cristo.’—2 Ped. 3:18.

19, 20. Taano ta maninigo kitang magtiwala sa mga pagirumdom ni Jehova, asin paano kita makikinabang sa paggibo kaiyan?

¹⁹ Sa ngunyan, kadakul nin dahilan kun taano ta kita nagtitiwala sa mga pagirumdom ni Jehova, na yaon sa saiyang dai nasasalang Tataramon, an Bibliya. (Basahon an Josue 23:14.) * Mababasa ta sa mga pahina kaiyan kun paano trinatar nin Diyos an bakong perpektong mga tawo sa laog nin rinibong taon. An historikong pagkasaysay na ini isinurat sa kapakinabangan niyato. (Roma 15:4; 1 Cor. 10:11) Nahihiling ta man an kautuban kan hula sa Bibliya. An mga hula puwedeng iagid sa mga pagirumdom na itinao nin patiinot. Halimbawa, minilyon an nagkakaburunyog sa dalisay na pagsamba ki Jehova, na ihinula na mangyayari sa ‘huring mga panahon.’ (Isa. 2:2, 3) An naggagrabeng mga kamugtakan sa kinaban kautuban man kan hula sa Bibliya. Asin, arog kan nasambit na, an mahiwas na paghuhulit ngunyan sa bilog na kinaban direktang kautuban kan sinabi ni Jesus.—Mat. 24:14.

²⁰ Napatunayan na kan satong Kaglalang na makakapagtiwala kita sa saiya. Nagtitiwala daw kita sa saiya? Kaipuhan na magtiwala kita sa mga pagirumdom niya. Iyan an ginibo ni Rosellen. Sinabi niya: “Kan ako lubos nang magtiwala ki Jehova, nagin mas malinaw sako na ako mamumuton niyang sinususteniran saka pinapakusog.” Lugod na kita man makinabang sa pagsunod sa mga pagirumdom ni Jehova.