May kaamigo ka daw na dai mo aram an pangaran? Posibleng marhay na mayo. Si Irina na taga Bulgaria nagsabi na, “Imposibleng magin harani sa Diyos kun dai mo aram an pangaran niya.” Pero nakakaugma ta arog kan sinabi sa nainot na artikulo, gusto nin Diyos na magin harani ka sa saiya. Kaya paagi sa Bibliya, garo siya nagpapamidbid sa saimo: ‘Ako si Jehova. Ini an sakuyang ngaran.’—Isaias 42:8.

Mahalaga daw talaga ki Jehova kun baga aram mo an pangaran niya asin kun baga ginagamit mo iyan o dai? Pag-isipan ini: An pangaran nin Diyos, na isinurat sa apat na Hebreong letrang katanog (consonant) na inaapod na Tetragrammaton, naglataw nin haros 7,000 na beses sa orihinal na teksto kan Hebreong Kasuratan. Mas dakul na beses iyan na naglataw kisa sa iba pang pangaran na sinambit sa Bibliya. Malinaw na patunay ini na gusto ni Jehova na maaraman ta asin gamiton ta an saiyang pangaran. *

Pero, huling an Diyos banal asin makakamhan sa gabos, tibaad iniisip nin nagkapira na kawaran nin paggalang an paggamit kan saiyang pangaran. Siyempre, sala talaga na gamiton an pangaran nin Diyos sa daing kamanungdanan na paagi, kun paanong dai mo man iyan gigibuhon sa pangaran kan amigo mo. Pero, kabutan ni Jehova na umawon an pangaran niya asin ipamidbid iyan kan mga namumuot sa saiya. (Salmo 69:30, 31; 96:2, 8) Girumdumon na tinukduan ni Jesus an saiyang mga parasunod na mamibi: ‘Ama niyamo na yaon sa langit, pabanalon an ngaran mo.’ Mapapakangbanal ta man an pangaran nin Diyos paagi sa pagpamidbid kaiyan sa iba. Sa paggibo kaiyan, mas mapaparani kita sa saiya.—Mateo 6:9, An Banal na Biblia.

Ipinapahiling kan Bibliya na mahalaga sa Diyos ‘an mga naghuhurop-hurop sa saiyang ngaran.’ (Malaquias 3:16) Mapadapit sa sainda, nangangako si Jehova: ‘Aatamanon ko siya, huli ta aram niya an sakong pangaran. Kun apudon niya ako, sisimbagon ko siya. Iibahan ko siya sa kasakitan.’ (Salmo 91:14, 15, An Marahay na Bareta Biblia) Kun gusto tang magkaigwa nin haraning relasyon ki Jehova, mahalaga na aram ta asin ginagamit ta an pangaran niya.