“TA’NO ta ako pa? Ta’no ta pinabayaan nin Diyos na mangyari ini sako?” Iyan an dai masabutan kan 24 anyos na si Sidnei na taga Brazil. Puon kan maaksidente siya sa padarusdusan sa swimming pool, pirmi na sana siyang nasa wheelchair.

Madaling makamati an mga tawo nin pagkadisganar o hinanakit sa Diyos pag nag-aagi nin pagsakit huli sa aksidente, hilang, pagkagadan nin mahal sa buhay, kalamidad, o giyera. Bako na ining bago. An patriyarkang si Job, na nabuhay kaidtong panahon, nag-agi nin sunod-sunod na trahedya. Sa paghunang Diyos an nasa likod kaiyan, binasol niya an Diyos: “Nag-arang ako saimo, alagad dai mo ako sinisimbag; nagtitindog, alagad dai hinihiling. Nag-iba ka na, nagi nang makuri sako.”—Job 30:20, 21, An Banal na Biblia (Paulines).

Dai aram ni Job kun siisay an nasa likod kan saiyang pagsakit, kun taano ta nangyayari iyan saiya o kun taano ta pinapabayaan siyang magsakit. Maray na sana ta lininaw sato kan Bibliya kun taano ta nangyayari iyan asin kun paano ta iyan aatubangon.

Mapadapit sa Diyos, sinasabi kan Bibliya: ‘An saiyang gibo mayo nin kakulangan, huli ta an saiyang mga dalan gabos katanusan. Siya Diyos nin katotoohan; banal siya asin matanos.’ (Deuteronomio 32:4) Kaya rasonable daw na isipon na gugustuhon nin sarong ‘banal asin matanos’ na Diyos na magsakit an mga tawo o magpaabot nin mga kalamidad tanganing kastiguhon o itanos sinda?

Sa kabaliktaran, sinasabi kan Bibliya na pag nasa masakit na sitwasyon, ‘dai kita magsabing, “Sinusugutan ako nin Diyos,” huli ta an Diyos dai masusugutan nin maraot asin dai man siya nagsusugot sa kiisay man.’ (Santiago 1:13) Sa katunayan, nanudan niyato sa Bibliya na sa kapinunan perpekto an gabos. Tinawan niya an inot na tawong si Adan asin Eva nin magayon na istaran, kan gabos na kaipuhan ninda para mabuhay, pati nin nakakakontentong gibuhon. Sinabihan sinda nin Diyos: ‘Pangagbunga asin pangagdakul kamo, asin panuon nindo an daga asin sakupon iyan.’ Kaya mayo talagang dahilan si Adan asin Eva na madisganar o maghinanakit sa Diyos.—Genesis 1:28.

Pero ngunyan, ibang-iba an kamugtakan sa kinaban. Sa katunayan, nagin masakiton an buhay sa bilog na kasaysayan nin tawo. Totoo nanggad, ‘an bilog na linalang nag-aagrangay asin nagtitios kan kulog sagkod ngunyan.’ (Roma 8:22) Anong nangyari?

Tanganing maaraman an simbag, balikan ta kun paano iyan nagpuon. Sa pagtentar kan rebelyosong anghel, na kan huri inapod na Satanas na Diyablo, binalga ni Adan asin Eva an pamantayan nin Diyos sa kun ano an tama asin sala, na mahihiling sa pagbabawal sa sainda na kumakan kan bunga kan ‘kahoy nin pakamidbid kan karahayan asin karatan.’ Sinabi kan Diyablo ki Eva na dai man sinda magagadan kun susuwayon ninda an Diyos, na garo man sana sinasabing putikon an Diyos. Inakusaran niya man an Diyos na ipinapanguri sa mga tawo an deretso na magdesisyon kun ano an marahay asin maraot. (Genesis 2:17; 3:1-6) Pinapaluwas ni Satanas na mas mapaparahay an tawo kun mayo sa irarom kan pamamahala nin Diyos. Ibinangon kan gabos na ini an sarong importanteng marhay na isyu—An Diyos daw talaga an dapat mamahala?

May saro pang isyu na ibinangon an Diyablo. Inakusaran niya an mga tawo na naglilingkod sana sa Diyos huli ta may nakukua sindang pakinabang. Kun dapit sa maimbod na si Job, sinabi kan Diyablo sa Diyos: ‘Danay mo siyang sinusurog asin an saiyang pamilya pati an mga rugaring niya. Alagad baluang halia gabos na sadiri niya kun dai ka niya sumpaon.’ (Job 1:10, 11, An Marahay na Bareta Biblia) An mga tataramon na ini ni Satanas para talaga ki Job, pero ipinaparisa niya na an gabos na tawo naglilingkod sana sa Diyos huli ta may nakukua sindang pakinabang.

Ano daw an pinakamarahay na paagi tanganing biyong masimbag an panginot na mga isyu? An Diyos,  na pinakamadunong sa gabos, igwa kan pinakamarahay asin dai nanggad makukuwestiyon na solusyon. (Roma 11:33) Itinugot niya na temporaryong pamahalaan kan mga tawo an saindang sadiri asin patunayan paagi sa mga resulta kun kiisay talagang pamamahala an mas marahay.

An miserableng kamugtakan ngunyan sa kinaban malinaw na ebidensiya na talagang dai kaya kan tawo na pamahalaan an sadiri. Bako sanang dai naitatao kan mga gobyerno ngunyan an tunay na katuninungan, katiwasayan, asin kaugmahan sa kinaban, kundi haros mapuho pa ninda an daga. Pinapatunayan sana kaini an importanteng katotoohan na sinasabi kan Bibliya na dai kayang pamahalaan nin tawo an sadiri. (Jeremias 10:23) An pamamahala sana nin Diyos an makakagarantiya nin daing sagkod na katuninungan, kaugmahan, asin kaginhawahan sa kinaban, huling iyan an katuyuhan nin Diyos.—Isaias 45:18.

Kaya ano ngunyan an gigibuhon nin Diyos tanganing mabago an kamugtakan nin tawo kauyon kan katuyuhan niya? Tandaan na tinukduan ni Jesus an mga parasunod niya na mamibi: ‘Dumatong lugod an Kahadian mo. Gibuhon an buot mo digdi sa daga nin siring sa langit.’ (Mateo 6:10) Iyo, sa itinalaan na panahon nin Diyos, hahalion niya an gabos na kawsa nin pagsakit paagi sa saiyang Kahadian. (Daniel 2:44) An pagtios, hilang, asin kagadanan mawawara na. Sa mga nagtitios, sinasabi kan Bibliya na ‘ililigtas nin Diyos an mga dukha.’ (Salmo 72:12-14) Para sa mga may hilang, an Bibliya nanunuga: ‘Dai nang masabi, “Naghihilang ako.”’ (Isaias 33:24) Pati sa mga nagkagaradan na nasa memorya nin Diyos, si Jesus nagsabi: ‘An oras madatong na an gabos na nasa lulubngan makakadangog kan saiyang tingog asin maruluwas.’ (Juan 5:28, 29) Abaang gayon na mga panuga!

Mga 17 taon pakaaksidente ni Sidnei na nasambit sa inutan, sinabi niya: “Dai ko man talaga binasol an Diyos na Jehova sa pagkaaksidente ko, pero inaako ko na kan inot naghinanakit ako saiya. May mga aldaw na munduon talaga ako, tapos napapahibi ako pag naiisip an sitwasyon ko. Pero nasabutan ko sa Bibliya na bakong padusa nin Diyos an nangyaring aksidente. Sinasabi sa Bibliya na ‘an panahon asin pagkanurungod nangyayari sa gabos.’ An pamimibi ki Jehova saka pagbasa nin espesipikong mga bersikulo sa Bibliya mas nagpakusog kan pagtubod ko asin nakatabang sako na pirming magin positibo.”—Parahulit 9:11; Salmo 145:18; 2 Corinto 4:8, 9, 16.

Kun isinasaisip ta an mga dahilan kun taano ta tinutugutan nin Diyos an pagsakit asin na madali nang halion iyan, makakatabang iyan na malabanan an ano man na pagkadisganar o paghinanakit sa Diyos. Sinisigurado sa sato kan Bibliya na an Diyos ‘nagtatao nin balos sa mga naghahanap sa saiya.’ Dai nin siisay man na nagtitiwala sa saiya asin sa saiyang Aki an magkakaigwa nin dahilan na madisganar o maghinanakit.—Hebreo 11:6; Roma 10:11.