An Bibliya bakong ordinaryong libro. Igwa iyan nin mga giya hali sa satong Kaglalang. (2 Timoteo 3:16) An mensahe kaiyan puwedeng magkaigwa nin dakulang impluwensiya sa sato. An totoo, an Bibliya nagsasabi: “An tataramon nin Diyos buhay asin igwa nin puwersa.” (Hebreo 4:12) Kaya kaiyan na pakarhayon an buhay ta sa duwang panginot na paagi—nagtatao nin paggiya sa pang-aroaldaw na buhay ta ngunyan asin nagtatabang sa sato na mamidbid an Diyos asin maaraman an saiyang mga panuga.—1 Timoteo 4:8; Santiago 4:8.

Mas marahay na buhay ngunyan. Matatabangan ka kan Bibliya may koneksiyon sa personal mong buhay. May mga praktikal na giya iyan manungod sa mga minasunod na bagay.

•   Magayon na relasyon sa iba.—Efeso 4:31, 32; 5:22, 25, 28, 33.

• Marahay na kamugtakan sa emosyon asin hawak.—Salmo 37:8; Talinhaga 17:22.

• Halangkaw na pamantayan sa moral.—1 Corinto 6:9, 10.

• Tamang kaisipan sa paghanap-buhay.—Talinhaga 10:4; 28:19; Efeso 4:28. *

Pinahalagahan na marhay nin sarong hoben na mag-agom sa Asia an pakinabang kan mga giya sa Bibliya. Arog kan dakul na bagong kasal, nasakitan man sinda na pakibagayan an lambang saro asin na magkaigwa nin marahay na komunikasyon. Pero pinunan nindang iaplikar an nababasa ninda sa Bibliya. Anong resulta? An agom na lalaki na si Vicent, nagsabi: “Nakatabang sako an nababasa ko sa Bibliya na atubangon sa mamumuton na paagi an mga problema ming mag-agom. An pagsabuhay kan mga nababasa mi sa Bibliya nakatabang sa samo na magin maugma an pag-ibanan mi.” An saiyang agom na si Annalou nag-uyon: “Nakatabang samo an mga halimbawang nababasa mi sa Bibliya. Maugma asin kontento na ako ngunyan sa relasyon mi asin sa mga plano mi sa buhay.”

Mas mamimidbid an Diyos. Apuwera sa mga sinabi ni Vicent dapit sa relasyon nindang mag-agom, sinabi pa niya: “Paagi sa pagbasa ko nin Bibliya, masasabi kong mas naparani akong marhay ki Jehova ngunyan.” Ipinaparisa sa sinabi ni Vicent an sarong importanteng bagay—an Bibliya makakatabang saimo na urog na mamidbid an Diyos. Apuwera sa mga giya na makukua mo sa pagbasa kaiyan, mas mamimidbid mo pa siya bilang sarong amigo. Asin maaaraman mo na may ihinahayag siyang mga detalye manungod sa magayon na puturong naghahalat sa saimo, na diyan aakuon mo an “tunay na buhay”—na magdadanay sagkod lamang. (1 Timoteo 6:19) Mayo kaiyan sa ibang mga libro.

Kun pupunan mo asin padagos na babasahon an Bibliya, makakamtan mo man an mga pakinabang na iyan—mas marahay na buhay ngunyan saka mas mamimidbid mo an Diyos. Pero, mantang binabasa mo an Bibliya, posibleng dakul kang maiisip na mga hapot. Pag nangyari iyan, makakatabang saimo an magayon na halimbawa kan sarong Etiopeng opisyal na nabuhay 2,000 na taon na an nakaagi. Dakul siyang mga hapot sa Bibliya. Kan haputon siya kun nasasabutan niya an binabasa niya, nagsimbag siya: “Paano ko man ini masasabutan kun mayo nin magtukdo sa sako?” * Dangan maugma niyang inako an tabang nin saro na kuwalipikado nang magtukdo sa Bibliya, si Felipe, saro sa mga nainot na disipulo ni Jesus. (Gibo 8:30, 31, 34) Kun gusto mo man na makanuod pa nin urog sa Bibliya, dinadagka mi ika na magpadara nin request online sa www.dan124.com/bcl o sumurat sa pinakaharaning adres, na yaon sa magasin na ini. Puwede mo man kontakon an mga Saksi ni Jehova na harani saimo o bisitahon an sarong Kingdom Hall sa lugar nindo. Kaya, ano ta dai kumua nin Bibliya ngunyan para magiyahan ka sa mas marahay na buhay?