An mga Saksi ni Jehova nakakaresibi ngunyan nin dakul na espirituwal na kakanon sa digital format urog kisa kasuarin man. Pero sa dakul na parte kan kinaban, dai kaya kan mga tugang na magkaigwa nin Internet access. An iba nakaistar sa mga lugar na an Internet pawara-wara, maluyahon, o mayo nganing Internet.

 Dawa arog kaiyan, dakul sa satong mga tugang an makaka-download na nin digital na mga publikasyon dawa mayo nin koneksiyon sa Internet! Paano?

 An JW Box sarong sadit na gadyet na itinatao sa mga kongregasyon na limitado an access sa Internet. Igwa iyan nin sarong router device na binakal sa sarong kompanya, nin software na ginibo kan Computer Department sa Bethel, asin nin mga digital na publikasyon na makukua sa jw.org. An kada saro sa mga gadyet na iyan nagkakantidad nin mga $75 U.S.

 Sa Kingdom Hall, pigko-connect nin wireless kan mga tugang an saindang mga mobile device sa JW Box para mag-download nin mga publikasyon asin mga video. Puwedeng i-connect dawa an luma o baratong mga device. Pero kun mayong Internet access an kongregasyon, paano pirming magigin up-to-date an JW Box? Regular na nagpapadara an sangang opisina nin mga USB flash drive (mga $4 U.S. kada saro) na may bagong mga publikasyon, video, asin audio hali sa jw.org na puwedeng ilipat sa JW Box.

 Paano nakatabang an JW Box sa satong mga tugang? Si Nathan Adruandra, na sarong ama na nakaistar sa Democratic Republic of Congo, nagsabi: “Haloy ko nang pigpupurbaran na i-download an mga dramang “O Jehova, . . . sa Saimo Ako Nagtitiwala” saka Girumdumon an Agom ni Lot. Pero dai lamang ako naka-download, kaya namundo ako. Ngunyan mada-download ko na an mga videong ’yan sa cellphone ko. Nakatabang ining marhay samo bilang mga magurang na mas matukduan mi an mga aki mi.”

 Sinabi nin sarong brother na nagtatabang sa pag-set up nin JW Box sa mga kongregasyon sa Nigeria: “Para sa mga tugang, espesyal na regalo ni Jehova an JW Box. Ugmahon sinda ta pasil na nindang mada-download ngunyan an mga publikasyon asin video sa Toolbox sa Pagtutukdo.”

 Labing 1,700 na JW Box an ipinadara sa satong mga tugang sa Aprika, Oceania, saka Timog Amerika, asin plano pang magpadara kaiyan sa dakul pang kongregasyon. Sain hali an pondo na ginagamit para sa areglong ini? Sa mga donasyon para sa pambilog na kinaban na gibuhon, na dakul diyan ipinadara paagi sa donate.dan124.com. Salamat sa bukas palad nindong pagsuporta.