TABANG PARA SA PAMILYA
Kun Paano Tatabangan an Saimong Aki na Makayanan an Pagkadisganar
Siguradong makakaeksperyensiya nin pagkadisganar an saindong mga aki. Paano mo sinda matatabangan na makayanan iyan?
Kun ano an dapat mong maaraman
Parte nin buhay an pagkadisganar. Sinasabi kan Bibliya na ‘gabos kita napapasala.’ (Santiago 3:2) Napapasala man an mga aki. Pero, puwede man iyan magkaigwa nin positibong resulta—makakatabang iyan na manudan ninda kun paano makakayanan an dipisil na mga sitwasyon. An mga aki dai namundag na igwa na kan kakayahan na iyan, pero puwede ninda iyan manudan. “Narisa mi ni agom na mas marahay kun tataong mag-atubang sa pagkadisganar an mga aki kisa magsagin na garo mayo sanang nangyari,” an sabi nin sarong ina na si Laura. “Makakaya nindang atubangon an sitwasyon pag iba sa inaasahan ninda an mangyari.”
Dakul na aki an nasasakitan na atubangon an pagkadisganar. May mga aki na dai nakanuod na atubangon an pagkadisganar huling ipinapamati sainda kan saindang mga magurang na mayo sindang ano man na salang ginibo. Halimbawa, kun hababa an marka kan aki, an mga maestra tulos an binabasol kan ibang magurang. Kun nag-iiwal an saindang aki asin an amigo kaini, binabasol tulos kan mga magurang an amigo kan saindang aki.
Pero paano makakanuod an mga aki na manimbag sa saindang sala kun pinoprotektaran sinda kan mga magurang sa gabos na konsekwensiya kaiyan?
Kun ano an puwede mong gibuhon
Itukdo sa saimong mga aki na may epekto an gabos nindang ginigibo.
Sinasabi kan Bibliya: “Ano man an itinatanom nin sarong tawo, iyo man ini an saiyang aanihon.”—Galacia 6:7.
May epekto an gabos niyatong ginigibo. Pag nakaraot kita, babayadan ta an pagpahirahay kaiyan. Pag nakagibo kita nin sala, may konsekwensiya iyan. Dapat na masabutan kan mga aki na kun ano an itinanom ninda, iyan man an saindang aanihon asin na may paninimbagan sinda sa mga ginigibo ninda. Kaya likayan na ibasol sa iba an sala kan saimong aki o purbaran na tahuban iyan. Imbes, pabayaan na maeksperyensiyahan ninda an konsekwensiya na angay sa edad ninda. Siyempre, dapat na malinaw na maintindihan kan aki na an konsekwensiyang iyan resulta kan sala nindang ginibo.
Tabangan an saimong mga aki na makahanap nin solusyon.
Prinsipyo sa Bibliya: “Pitong beses man na matumba an matanos, mabangon siya liwat.”—Talinhaga 24:16, NWT.
Puwedeng magin makulugon pag dai nangyari an inaasahan mo, pero bako pa iyan an katapusan kan kinaban. Tabangan an saimong mga aki na magpokus sa paghanap nin solusyon imbes na pagparaisipon na bakong makatanusan an nangyari. Halimbawa, kun nagbagsak sa test an saimong aki, i-suggest saiya na mas mag-adal na marhay para mas handa na siya sa sunod na test. (Talinhaga 20:4) Kun may dai pagkakaintindihan an saimong aking babayi asin an saiyang amiga, tabangan siya na iyo na an mag-inot na makipag-ulian, dawa ngani kun bako man siya an panginot na may kasalan.—Roma 12:18; 2 Timoteo 2:24.
Tabangan an saimong mga aki na akuon na may limitasyon sinda.
Prinsipyo sa Bibliya: “Sinasabihan ko an lambang saro diyan sa saindo na dai magin sobra an hiling sa sadiri.”—Roma 12:3.
An pagsabi sa saimong aki na siya an “pinakamatibay” sa sarong bagay bakong realistiko saka dai nakakatabang. Dawa an mga aking matibayon sa klase dai man pirming makaka-perfect. Asin an mga aking matibayon sa partikular na isport dai man pirming manggagana. An mga aki na inaako na may limitasyon sinda mas nakakayang atubangon an mga pagkadisganar.
Sinasabi kan Bibliya na makakatabang sato an mga kasakitan na magin mas makusog asin magkaigwa nin pakatagal. (Santiago 1:2-4) Kaya dawa ngani makulog asin nakakadisganar pag dai nangyari an inaasahan mo, matatabangan mo an saimong mga aki na dai gayong magpaapekto sa pagkadisganar.
Arog sa pagtukdo nin ano man na kasanayan, nangangaipo nin dakul na panahon asin paghihinguwa an pagtukdo sa mga aki kun paano makakayanan an pagkadisganar. Pero dakula an magigin pakinabang kaiyan pag tin-edyer na sinda. “An mga tin-edyer na tataong mag-atubang sa problema mas dikit an tsansa na gumibo nin peligrosong mga desisyon pag nagagabatan na sinda,” an sabi kan librong Letting Go With Love and Confidence. “Mas dakula an tsansa na makaya nindang atubangon an mga sitwasyon na bago asin dai ninda inaasahan.” Siyempre, kun tatao sindang mag-atubang sa problema, papakinabangan man ninda iyan pag magin adulto na sinda.
Tip: Magpahiling nin marahay na halimbawa. Tandaan, an paagi mo nin pag-atubang sa pagkadisganar makakatabang na matukduan mo an saimong mga aki kun paano man ninda aatubangon an pagkadisganar.