Ee. Ifintu fine ifyakonkapo ifyo Baibolo yalandapo kuti fyamwafwa ukupwisha ubwafya bwa ndalama e lyo ne nkongole:

1.   Muletantika ifyo mulefwaya ukushita. “Amapange ya wacincila yamulenga ukubomba bwino, lelo onse uususwa ukucita ifintu alola ku kubulwa.” (Amapinda 21:5) Mwilashita fye ifintu icishiteshite pa mulandu fye wa kuti na babwesha umutengo. Mulelemba ifyo mulefwaya ukushita kabili muleshita fye ifyo fine mulembele.

2.   Mwilakongola indalama icikongolekongole. “Uukongola musha ku o akongolako.” (Amapinda 22:7) Nga ca kuti mwalikongola e lyo mwafilwa ukufikilisha ifyo mwaumfwene na bo mwakongolako, mufwile na kabili ukulanshanya na bo ifyo mulepanga ukucita pa kubabwesesha inkongole. Mufwile ukuba no mute. Nga ca kuti abamupeele loni babomfeshe ubucenjeshi, mufwile ukubika amano ku kubwesha inkongole no kumfwila ukupanda amano kwa mu Baibolo ukutila: “Kabiye unakilile no kupapaata sana ku munobe. Wisuminisha utulo ku menso yobe, nangu ukushipula ku menso yobe.” (Amapinda 6:​1-5) Nangu cingati abo mwakongolako te kuti basumine ukumubweseshako pa muku wakubalilapo, tamufwile ukuleka ukubalomba ukumubweseshako.

3.   Mwilabika sana amano ku ndalama. “Umuntu wa menso ya lunkumbwa apamfiwa ku kukwata ifyuma, lelo teshiba ukuti ku ntanshi akabulwa.” (Amapinda 28:22) Ulunkumbwa no bufunushi kuti fyalenga umuntu ukubulwa indalama e lyo no kulekelesha ifya kwa Lesa.

4.   Muleteka umutima. “Pa kuba ne fya kulya ne fya kufwala no mwa kwikala, tuteke imitima kuli ifi fine.” (1 Timote 6:8) Indalama te kuti shilenge umuntu ukuba ne nsansa. Abantu bamo ababa ne nsansa sana tabakwata ne ndalama ishingi. Ifibalenga ukuba ne nsansa, kutemwa ba lupwa lwabo, ifibusa e lyo na bucibusa bakwata na Lesa.​—Amapinda 15:17; 1 Petro 5:​6, 7.