Inkola beta ukuti limpet ikala mu menshi kabili yakwata icipanga icasompa pa muulu. Iyi inkola yalikwata ameno ayaibela kabili ayakosa nga nshi. Aya ameno yapangwa no twaba ngo tubushishi utunono sana utwingi nga nshi utwapangwa ne libwe beta ukuti goethite, utwaikata mu ma protein ayanakilila.

 Tontonkanyeni pali ici: Inkola beta ukuti limpet yalikwata ico ibomfya pa kulya, icaba ngo lulimi icacingililwa na meno ayaongama. Aya ameno yepi ica kuti ilino limo talifika na kuli milimita imo ukulepa. Cila lino lifwile ukuba ilyakosa sana, pantu iyi inkola ibomfya ameno pa kukoola limbwelimbwe ku mabwe ilyo ilelya.

 Abafwailisha pa fintu balibomfeshe mashini ya microscope iya maka sana pa kupima ifyo aya ameno yakosa. Basangile ukuti tabatala abasangapo icintu icakosa nga ameno ya nkola beta ukuti limpet. Yalikosa ukucila no tutambo twa kwa tandabube. Umukalamba wa aba balefwailisha atile: “Tufwile ukutendeka ukwesha ukupanga ifintu ifyakosa nga meno ya nkola beta ukuti limpet.”

 Abafwailisha pa fintu batontonkanya ukuti nga bapanga ifintu ifyakosa nga meno ya nkola beta ukuti limpet, kuti balefibomfya ukupangilako bamotoka, amato, indeke, e lyo fye na meno ya kuti abantu balebomfya.

 Muletipo shani? Bushe ameno ya nkola beta ukuti limpet ayakosa nga nshi yaishilebako fye ayene, nelyo kwali uwayabumbile?